“Qodiriy izdoshlari” stipendiyasi o`quvchilarga topshirildi

Prezident, ijod va ixtisoslashtirilgan maktablarni rivojlantirish agentligi tassarufidagi Abdulla Qodiriy nomidagi ijod maktabi, Abdulla Qodiriy uy-muzeyi, Islom Karimov nomidagi Toshkent davlat texnika universiteti hamkorligida Abdulla Qodiriy tavalludining 127 yilligi munosabati bilan “Abdulla Qodiriy - millat ko`zgusi” mavzusidagi ma’naviy-ma’rifiy anjuman Abdulla Qodiriy uy muzeyida bo`lib o`tdi.

Tadbirda universitet rektori S.M. Turobjonov, Abdulla Qodiriyning nabirasi Xondamir Qodiriy, Abdulla Qodiriy ijod maktabi direktori Nilufar Yuldasheva va boshqa qodiriyshunos olimlar nutq so`zlashdi.

Tadbir davomida O`zbekiston Milliy akademik drama teatri, Muqumiy nomidagi O`zbekiston davlat musiqali drama teatri aktyor va aktrisalari ijrosida “O`tkan kunlar”, “Mehrobdan chayon” asarlaridan sahna ko`rinishlari namoyish etildi. Shuningdek, “Qodiriy izdoshlari” to`garagi a’zolari “Qodiriyga armug`on” nomli badiiy-ijodiy namunalaridan namoyish etishdi.

Tadbir yakunida Toshkent davlat texnika universiteti tashabbusi bilan ta’sis etilgan “Qodiriy izdoshlari” stipendiyasi III chorak yakuniga ko`ra eng yuqori natijalarga erishgan 4 nafar o`quvchiga topshirildi.

 Abdulla Qodiriy nomidagi ijod maktabining 6-sinf o`quvchisi Xurramova Mohinur, 7-sinf o`quvchisi Mamanabiyeva Gulsanam, 8-sinf o`quvchisi Abdullayeva Sevinch, 9-sinf o`quvchisi Egamberganova Sevaralar taqdirlandi.