Пресс-тур: журналистлар янги техникалар билан танишдилар
30 май куни “Ўзбеккўмир” акциядорлик жамиятига пресс-тур ташкил этилди. Республикамизнинг етакчи оммавий ахборот воситалари вакиллар ҳамда блогерлар иштирок этган тадбирда корхонага келтирилаётган янги кон ва уларнинг очиқ конда ишлаш жараёнлари кўрсатилди.
Тадбир аввалида “Ангрен кўмир кони” филиали марказий диспетчерлик пункти мажлислар залида журналистлар учун матбуот анжумани ўтказилди.
Таъкидландики, мамлакатимизда иқтисодиёт ва аҳоли сони ошгани сайин энергияга бўлган талаб ҳам ортиб бормоқда. Бу эҳтиёжни қондириш учун барча энергия ресурслари билан бир қаторда кўмир қазиб олиш ҳам кенгаймоқда. Охирги беш йилда мазкур хомашё ишлаб чиқариш йилига 4 миллион тоннадан 6 миллион 200 минг тоннагача ошди.
Ҳисоб-китобларга кўра, мамлакатимиздаги кўмир захиралари 2 миллиард тоннага яқин. Давлатимиз раҳбари ушбу салоҳиятдан самарали фойдаланиш, ишлаб чиқариш ҳажмини изчил ошириш вазифасини қўймоқда. “Ўзбеккўмир” АЖда ушбу вазифаларни бажариш учун энг аввало кон устки қатламини очиш ишларини жадаллаштириш, бунинг учун мавжуд техника паркини янгилаш тақозо этилади. Шу мақсадда янги ва энг замонавий, серунум кон техникалари харид қилиш мақсадида 2023 йили ҳукумат кўмаги билан 77,1 млн долларлик лизинг шартномалари имзоланди, деди анжуманда жамият бош геологи Эркин Жўраев.
Бугунги кунга қадар ушбу шартномалар асосида Японияда ишлаб чиқарилган 44 дона (юк кўтариш қуввати 90 тн.) “Каматсу” самосвалининг 39 таси келтирилди ва 22 таси йиғилиб, тўлиқ ишга туширилди. Шунингдек, 6 та занжирли бульдозер, 2 дона 6 кубометрли автоюклагич, учта “КамАЗ”, учта “УАЗ” русумли автомашиналар харид қилинди. Ушбу кон техникаларидан ишлаб чиқаришда кенг фойдаланилмоқда.
Айни пайтда лизинг шартномаси бўйича корхонага янги кон техникалари келиши давом этмоқда. Шу билан бирга янги техникаларга зарур ускуналар, эҳтиёт қисмлар ва бутловчи қисмлар харид қилинаяпти. Кон ҳудудидаги технологик йўллар кенгайтирилиб, янги машиналар ҳаракатланиши учун мослаштирилаётгани айтиб ўтилди.
Акциядорлик жамиятида мавжуд техника паркини янгилаши ортидан жорий йилда кон устки қисмини очиш ишларини – 48,6 млн. куб метрга етказиш, 6,2 млн. кўмир, 850 минг тонна кўмир қазиб олиш режалаштирилган.
“Ўзбеккўмир” акциядорлик жамияти Ўзбекистонда кўмир қазиб олувчи ва етказиб берувчи йирик ва етакчи корхона бўлиб, унинг тасарруфида ўртача йиллик умумий қуввати 4,5 млн. тонна бўлган иккита очиқ (“Ангрен” ва “Апартак”) ҳамда битта шахта усулида кўмир қазиб олувчи кон ишлаб турибди. Ушбу конлардан 2023 йилда 2020 йилдаги 3,7 млн. тоннадан 5,8 млн тоннага кўмир қазиб олинди.
Янги кон техникалари эвазига жамият томонидан 2024 йилда 6,2, 2025 йилда 6,5, 2026 йилда 7,1 млн. тонна кўмир қазиб олиш режалаштирилган.
Тайёр маҳсулот тўлиғича республика ички эҳтиёжига (Ангрен ва Янги Ангрен ИЭСлари, республика бюджет ташкилотлар ҳамда аҳоли истеъмолчилари, шунингдек тадбиркорлик тузилмаларига (биржа орқали) йўналтирилмоқда.
Анжуманда жамият техник бўлими бошлиғи Роберт Еникеев, стандартлаштириш, сертификатлаштириш ва метрология бўлими бошлиғи Анвар Абдураҳимовлар журналистларнинг корхонани техник қайта жиҳозлаш, кўмир қазиб олиш ҳажмларини ошириш, маҳсулот сифати бўйича саволларига атрофлича жавоб бердилар.
Журналистлар пресс- тур давомида жамият техника паркида бўлиб, “Каматсу” автосамосвалларини йиғиш жараёни билан танишдилар, кўмир конида ушбу техникаларнинг қандай ишлаётганини кузатиб, мутахассислар билан мулоқотда бўлдилар.
Неъмат Душаев,
“Ўзбеккўмир” АЖ Ахборот хизмати
