Падборка беларускіх кніг на лета

ШТО ПАЧЫТАЦЬ ЛЕТАМ

Склала падборку беларускіх кніг, якія цудоўна будзе чытаць летам. Прайшлася выключна па сучаснай літаратуры.

1. Зараслава Камінская "Русалкі клічуць".

Дэбютная кніга маладой пісьменніцы, якая выдатна падыходзіць на лета і зместам, і аб'ёмам. Бо русалкі, міфалогія, мастацтва... Усё гэта стварае цудоўную атмасферу. І кніга невялікая, чытаецца за пару гадзін на прыродзе.

Купіць электронную кнігу: https://kniharnia.by/catalog/suchasnaya_proza/rusalki_klichuts/

2. Зміцер Бартосік "Клініка кітайскага дантыста".

Для мяне лета — гэта ў першую чаргу падарожжы. А гэтая кніга даволі моцна на іх натхняе, нават у анатацыі напісана "падарожжа па забытых адрасах культуры". Цікавы культуры нон-фікшн.

Спампаваць электронную кнігу ў Бібліятэцы Свабоды: https://www.svaboda.org/a/29519816.html

3. Рома Свечнікаў "Рома едзе. Кніга 1 і 2".

Кніга ад звычайнага беларускага хлопца, які ў 2012 годзе ў 20 гадоў кінуў універ і паехаў у падарожжа вакол свету. З падарожных нататак і складаюцца дзве гэтыя кнігі.

Спампаваць электронную кнігу ад 34mag.net: https://34mag.net/post/roma-edze-kniga-i

https://34mag.net/post/roma-edze-kniga-2

4. Ганна Янкута "Кот Шпрот і таямніца атракцыёнаў".

Няхай тут будзе і дзіцячая кніга, бо нават мне, дарослай, было цікава яе чытаць. Калі вы ў Мінску, то бярыце сваіх дзяцей, гэтую кнігу і ідзіце ў парк Чалюскінцаў. Я гарантую вам цікавае падарожжа па старонках кнігі з пашыранай рэальнасцю, калі ў парку перад вамі паўстануць сапраўдныя атракцыёны з кнігі.

Купіць кнігу: https://januskevic.by/catalog/mast_lit/3872/

5. Каміла Цень "Я прыду за табой у аўгусце".

Куды ў летняй падборцы без дэтэктыва. Самы час, каб чытаць такія лёгкія і захапляльныя кнігі. Калі ў творы змрочная атмасфера забойства, а над вамі свеціць сонца.

Купіць электронную кнігу: https://kniharnia.by/catalog/suchasnaya_proza/ya_prydu_za_taboy_u_a_gustse/