ПРО ЛИГА ЧЕМПИОНИ ТАҚДИРЛАНДИ!

Уч йил, уч лига ғолиблиги ва Суперлигага йўл. Ушбу тарифларни бу йилги Про лига баҳсларни муваффақиятли ўтказиб, кучлилар сафига йўлланма олган Яйпаннинг “Турон” жамоасига ишлатиш мумкин. 2017 йилда ташкил топган жамоа қисқа фурсат ичида Суперлигага йўлланма олди. Айтиш жоизки, бу вақт ичида клубнинг барча аъзолари катта ҳажмдаги ишларни амалга оширишди.

Тақдирлаш маросими

Бугун “Турон” жамоаси мавсум якунларига бағишланган тадбир ўтказди. Тадбирнинг биринчи қисмида жамоа аъзолари суперлига йўлланмасини қўлга киритишгани муносабати "Ўзбекистон" ўйингоҳида клуб вакилларини тақдирлаш маросими ташкил этилди.

Мазкур маросимда Ўзбекистон тумани ҳокими Қаҳрамонжон Джўраев иштирок этиб клуб вакилларини чемпионлик билан қизғин қутлаб, клуб раҳбарияти, мураббийлар штаби, футболчилар ҳамда клуб ходимларини қимматбаҳо совғалар билан тақдирлади. Шунингдек, маросимда туман ҳокимлиги, туман ИИБ ҳамда бошқа мутасадди ташкилотлар вакиллари қатнашдилар.

Тақдирлаш маросими кўплаб мухлислар қаршисида юқори суръатда ўтказилди. Айтганча, маросимда жамоа мухлисларига ҳам қимматбаҳо совғалар тақдим этилди. Ўз навбатида жамоа ишқибозлари “Турон” клубининг мадҳиясини жур бўлиб куйлашди.  Шу тариқа, “Турон” клуби тарихига янги саҳифа очилди. Ислом Исмоилов шогирдлари кучлилар қаторида ҳам муваффақиятли иштирок этишларини тилаб қоламиз.

Учинчи чемпионлик

Юқорида таъкидлаб ўтганимиздек, “Турон” жамоаси улкан орзулар билан 2017 йилда ташкил этилган эди. 2018 йилда жамоа вилоят биринчилига ғолиб бўлган эди. 2019 йилда “Турон” “В” Про лигада ҳам аввалига ўз минтақасида кейин эса плей-офф баҳсларида ғолибликни қўлга киритган эди. Бу йил эса “Турон” Про лигада ҳам тенгсиз эканлигини исботлади ва ҳақли равишда Суперлигага йўлланма олди.

Айтиш жоизки, “Турон” уч лигада чемпион бўлган жамоа саналади. Адашмасам, шу кунга қадар кетма-кет уч йил ичида учта лигада чемпион бўлган жамоа футболимиз тарихида бўлмаса керак. Яйпанликлар бу борада ҳам янги тарих яратишди, деб уйлаймиз.

Янги логотип

Тақдирлаш маросимда шунингдек, клубнинг янги логотипи намойиш этилди. Яйпанликлар суперлига баҳсларида янги логотипдан фойдаланишга қарор қилишди.

40-жамоа

Шу кунга қадар Ўзбекистон барча чемпионатларини ҳисобга олганда 39 та жамоа иштирок этган эди. “Турон” мамлакат чемпионатида иштирок этаётган 40-жамоа сифатида тарихда қоладиган бўлди.

Байрам тадбири

Тақдирлаш маросимининг иккинчи қисми Қўқон шаҳрида "Фирдавс" ресторанида бўлиб ўтди. Бугунги тадбир учун байрамона дастурхон ташкил этилди. Шу тариқа, “Турон” клуби учун мавсумни юқори нотада якунланди.

Аброр ДЕҲҚОНОВ,

Яйпан шаҳридан махсус тайёрланди