Ош тузини йодлаш талабларига риоя этмаган 11 та корхона фаолияти тўхтатилди

Бу ҳақда АОКАда ўтказилган брифингда Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков маълум қилди:

✔️ Бугунги кунда республикада 56 та ош тузини йодлаш корхоналари ва 46 та йодланган ош тузини қадоқлаш цехлари фаолият юритиб келмоқда.

Жорий йилнинг биринчи чораги давомида Санитария-эпидемиология хизмати ходимлари томонидан савдо нуқталарида сотилаётган йодланган ош тузларидан харид қилиб, лаборатория таҳлиллари ўтказилганда улардан 45-50 % ош тузи намуналари таркибида йод миқдори белгиланган меъёрдан паст эканлиги, 9% намуналарда умуман йод йўқлиги аниқланган эди.

Олиб борилган тадбирлар, тарғибот ишлари ҳамда ОАВ орқали ёритишлар натижасида таркибида йод миқдори кам бўлган ёки умуман бўлмаган ош тузи намуналари миқдори 13- 18% гача камайган. Бу эса аввалгисига қараганда 3 баравар камайганидан далолат беради. Ноқонуний тарзда фаолият юритаётган ёки ош тузини йодлаш талабларига риоя этмаган ҳолда ишлаб чиқараётган ҳамда қадоқлаш билан шуғулланаётган 11 та корхона ўз фаолиятини тўхтатган.

Ваколатли органни хабардор қилган ҳолда ўтказилган 69 та текширишлар давомида лаборатория таҳлиллари учун олинган 178 та ош тузи намуналаридан 58 таси (32,5%) белгиланган меъёрларга жавоб бермаслиги аниқланиб, 74,8 тонна ош тузи қайта ишлашга қаратилди. Аниқланган камчиликлар бўйича бўйича 56 нафар жавобгар масъулларга нисбатан баённомалар расмийлаштирилиб, ҳудудий судларга юборилди, 4 та ҳолатда йодланган ош тузини ишлаб чиқариш корхоналарининг иш фаолияти аниқланган камчиликлар бартараф этилгунга қадар вақтинчалик тўхтатилган.

Ҳозирда ош тузини йодлаш учун 5063,2 кг калий йодат заҳираси мавжуд бўлиб, жорий йилнинг 9 ойи давомида йодланган ош тузини ишлаб чиқариш корхоналари томонидан шартнома асосида 2288 кг га яқин калий йодат моддаси харид қилинган.

Шу ўринда, фуқароларимиздан йодланган ош тузини сақлаш қоидаларига риоя қилишларини сўраб қоламиз.