ОКМКда экспорт: 9 ойлик прогнозларнинг бажарилиши таъминланди

Жорий йилнинг 9 ойида Олмалиқ кон-металлургия комбинати томонидан маҳсулотлар экспорти борасида барча белгиланган прогнозларнинг бажарилиши таъминланди.

Хусусан, хорижий истеъмолчиларга 9 ой давомида 42 222 тонна мис маҳсулотлари экспорти амалга оширилиб, прогноз 147,1%га бажарилди. 

Шунингдек, хорижга 21554 тонна рух маҳсулотлари жўнатилган.

Бундан ташқари, 9069 тонна мис купороси экспорти амалга оширилиб, прогноз 151,2%га бажарилганини алоҳида қайд этиш лозим. 

Рений, кадмий, палладий кукуни, каби маҳсулотларнинг экспортида белгиланган прогнозлар бажарилишига эришилган.

Молибден маҳсулотлари ҳамда қўрғошин концентрати экспортида ҳам юқори натижалар кузатилган. 9 ойда 580 тонна молибден маҳсулотлари(прогноз 107,4%), 12 289 тонна қўрғошин концентрати(прогноз 108,8%) экспорт қилинган.

Январь-сентябрь ҳолатига экспорт прогнози 120,1%га бажарилиб, 486 107 000 долларлик маҳсулот экспорти амалга оширилган.

Бугунги кунда юртимизда хом ашёдан юқори қийматли маҳсулотлар ишлаб чиқариш давлат сиёсати даражасига кўтарилган. Юртимизда қўшимча қийматли маҳсулотлар ишлаб чиқариш жадал ривожланиши оқибатида ички бозорда мисга бўлган талаб кундан-кунга ошиб бормоқда. Шунингдек, комбинатда қўшимча қийматли маҳсулотлар ишлаб чиқаришга ҳам катта эътибор қаратилмоқда.

Маълумот учун: Йилдан йилга ОКМК экспорт географияси кенгайиб бормоқда. Ҳозирда комбинат маҳсулотлари 19та давлатга экспорт қилинмоқда. 2024 йилда янги экспорт бозорлари ўзлаштирилди. Жумладан, жорий йилдан бошлаб Гвинея, Сенегал, Сербия, Жанубий Африка Республикаси, Марокаш, Португалия каби давлатларга мис катанкаси ва мис купороси экспорти амалга оширилаяпти.

ОКМК Сотиш ва металлургия хом ашёларини етказиб бериш бошқармаси