NetSurf Internet: Mobile Gaming

Mobile phone hmangin online game kan khel nasa a, a tha thei ang bera kan khelh theih nan kan mamawh leh hriat tur pawimawh thenkat tarlang ang.

Wired VS Wireless

Online a game khelh nan chuan latency hniam thei ang ber kan mamawh avangin englai pawhin Wired (cable hmanga connect) nge nge chu a tha zawk char char ang.

Chuvang chuan NetSurf Internet ah pawh game khelh nan chuan Fiber connection hi ni thei ngei se kan ti.

WiFi Router

Mobile phone a game khel kan nih avangin cable chuan kan phone connect duh ve viau mah ila a buaithlak khawp mai, chuvangin WiFi kan hman ngei angai ang.

Kan WiFi router te hi chhungkua in kan connect tlangpui a. A then inhnuai ah, a then inchungah te awmin signal chhe tak takin connect ve te pawh an awm thin.

Kan WiFi router hian a in dawt in, a mal te tein kan data mamawh te min thawn kual vek thin a, WiFi connect tu tam tak kan awm phei chuan a thawn kual chhung a lo rei tawh thin avangin kan game khelh a tibuai thei hle a ni. Chu mai niloin connect tu tamtak awmlo mah ila signal chhe tak taka connect ve te pawh an data mamawh ang an dawn hma chuan thawn nawn te a tum thin a, hei hian kan online game khelh lai a packet rawn thleng tur a delay phah thin bawk a ni. Ping sang zeuh zeuh, ping su nasa te kan tih phah thin.

Chuvangin online game khelh nan chuan WiFi router nen room khatah, mahni chauha connect tluk a awm lo.

WiFi Frequency

Kan phone theuha WiFi settings ah lut in kan bulhnai a WiFi awm zawng zawng han en ila a tam duh khawp mai. Thenawm te, kawmchhak, kawmthlang, inhnuai leh inchung te WiFi zawng zawng a lo lang vek a.

Heng WiFi te hi a tam zawk chu 2.4GHz frequency niin, channel hrang hranga then hran leh a ni a, a then chu channel in ang te pawh a awm nawk bawk ang. Kan WiFi channel ang chiah emaw a bulhnai ami dang a awm phei chuan hei hian kan WiFi performance chu a rawn ti chhe thei bawk a ni.

WiFi Channel Width

WiFi Channel width (channel zauh zawng) hi 40MHz leh 20MHz a ni tlangpui a, 40MHz hi a zau in data keng hnem thei zawk mahse midang WiFi in a rawn tibuai awlsam zawk bawk a, 20MHz hi a zim zawkin game khelh nan chuan a stable zawk a ni.

WiFi Analyze

Kan bulhnai a WiFi hrang hrangte channel len zawng leh eng channel nge an hman hriat nan kan phone ah app install in awlsam takin a hmuh theih a. Chung zinga app pakhat chu WiFiman Playstore ah download tur a awm.

Kan WiFi Channel leh Width hi a tirah chuan Auto a awm ve ve a ni tlangpui a, kan bulhnai WiFi awm a zirin kan WiFi pawh settings thlak danglam zel mai tur a ni.

2.4GHz VS 5GHz WiFi

Tunlai phone game khelh nan a kan hman tam zawk chuan 5GHz WiFi a support tawh a. 2.4GHz WiFi tam zia leh channel in ang a intihbuai theih zia kan hre tawh a. Hemi lak atanga kan buai ve loh nan WiFi Router 5GHz pe chhuak tel thei hman tum hram ila. 5GHz WiFi Router ah chuan A emaw AC tih a awm tel thin ang.

Connect tu tam vang leh signal chhia a connect ve ten kan WiFi an tih chhiat theih zia kan hre tawh a, kan WiFi in 2.4GHz leh 5GHz frequency a pek chhuah theih chuan 2.4GHz hi kan chhungte leh midang connect tir in 5GHz zawk hi kan game khelh nan bik dah ila.

Kan thiam leh thiamloh chu engpawh ni se online game nuam takin kan khelh theuh theih ka beisei.