Навоий вилоят халқ таълими бошқармаси бошлиғи Шамуратов Марат Халмуратовичнинг мурожаати
ТАВАККАЛЧИЛИК ҚИЛИБ, ҲАЁТИНГИЗНИ ДЎЗАХГА АЙЛАНТИРМАНГ!!!
Ассалому алайкум, ҳурматли ўқитувчилар!
Азиз ота-оналар!
Одамзод табиатида ибтидоий қизиқувчанлик мавжуд, у таъқиқланган нарса, воқеа, жараёнларга ўч бўлади. Ана шу қизиқувчанлик, унинг ортидан келиши мумкин азоб, изтироб, боши берк кўчани олдиндан кўра билишимиз шарт. Чунки, ақл, идрок, тафаккур инсонга фикрлаш, хулоса чиқариш учун ато этилган. Кейинги йилларда Ўзбекистонда ҳам қимор ва таваккалчиликка асосланган ўйинлар орқали вақтинчалик даромад топаётган, аммо, охири “вой” бўлган чоҳга ўзини улоқтираётган юртдошларимиз борлиги ачинарли. Энг ёмони, бу кўчага ёшларимизнинг ҳам кириб қолаётганидир.
Букмекерлик компанияларининг турли хил тотализатор, қимор ўйинларига қўшилиб қолиб, мўмай даромад ортидан қуваётган, ютқизиб қўйгач қарзга ботиб, ўғрилик, қотиллик ёхуд ўз жонига қасд қилишгача қўл ураётган юртдошларимиз сони ортаётгани миллатнинг оғриқли нуқталаридан бирига айланмоқда. Энг ачинарлиси, мамлакат келажагининг эгалари, камолот кўчасининг бошида турган ўқувчи ёшларимиз баъзан қаровсизлик, эътиборсизлик натижасида пул тикиб ўйналадиган ана шундай таваккалчиликка қўшилиб қолмоқда.
Яқиндагина Фарғона давлат университети ўқитувчиси бировдан олган 57 миллион сўмни тотализаторда ютқазиб қўйгани учун қабристонда ўз жонига қасд қилган ва воқеа жойида вафот этган.
Олиб борилган тезкор суриштирув ҳаракатлари давомида Р.Б. Фарғона давлат университетида ўқитувчи лавозимида ишлаши, букмекерлик компанияси орқали таваккалчиликка асосланган қимор ўйинлари ўйнаб келгани аниқланган.
16 ноябрь куни Фарғона шаҳрида яшовчи шахсдан мазкур қимор ўйинларини ўйнаш учун 57 миллион сўм қарзга олган ва тотализаторда мазкур пулларни ютқазиб қўйган.
Пулларни 18 ноябрь куни қайтариб беришни ваъда қилган. Шу куни оила аъзоларига ўз телефони орқали уни қабристондан топишлари ҳақида SMS хабарнома юборган. Соат 17:30 лар атрофида оила аъзолари уни ўзи истиқомат қилиб келган МФЙдаги қабристон айвонига ўзини осган ҳолатда топган.
Ота-оналар! Ватан келажаги бўлган ёшлар!
Ҳурматли ҳамкасблар!
Учинчи Ренессансни бунёд этиш борасида мамлакатимизда кенг кўламли ижтимоий-иқтисодий, илмий-амалий, маънавий-маърифий ислоҳотлар олиб борилмоқда. Дунё тараққиётига бўйлашишимиз ўз-ўзидан кечмайди, бунинг учун фан чўққиларини эгаллашимиз, илмни азиз тутишимиз лозим. Турли хил ножўя хатти-ҳаракатлар, шарқона қадриятларимизга мувофиқ бўлмаган ўйинлар билан умримизни елга совурмайлик. Буюк неъмат бўлган умримизни эзгулик, илм-фан ва миллий тараққиёт учун бахшида этайлик!
Шу ўринда эслатиб ўтамиз, Ўзбекистонда букмекерлик фаолияти ноқонуний ҳисобланади. Маъмурий жавобгарлик тўғрисидаги кодекснинг 191-моддаси (қимор ва таваккалчиликка асосланган бошқа ўйинлар), шунингдек, Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш)га биноан бу турдаги фаолият ҳали ҳам ноқонуний ҳисобланади.
Ноқонуний иш – келтирар ташвиш! Ҳаётингизни хатар ва қайғу ботқоғига отманг. Ёруғ келажак ва фаровон жамият қуриш йўлида бор куч ва имконият, билим ва тажрибаларни ишга солайлик! Миллат Сизу бизга ишонади, ишончни оқлайлик!