НЕФТЬ-ГАЗ ГЕОЛОГИЯСИНИ РИВОЖЛАНТИРИШ МАСАЛАЛАРИ МУҲОКАМА ЭТИЛДИ

 Бугун, 10 октябрь куни Тошкент шаҳрида «Нефть-газ геологиясининг долзарб муаммолари ва углеводород қазилмаларини ўзлаштиришда инновацион усул ва технологиялар» мавзуида халқаро илмий-амалий конференция бўлиб ўтди.

 Тадбир Ўзбекистон Республикаси Энергетика вазирлиги, «Ўзбекнефтгаз» АЖ ва Геология ва нефть-газ конларини қидириш институти ҳамкорлигида ташкил этилди.

 Конференция ишида Канада, АҚШ, Буюк Британия, Франция, Германия, Россия, Озарбайжон, Қозоғистон, Қирғизистон, Тожикистон каби давлатларнинг вакиллари, олимлар, шунингдек, «Ўзбекнефтгаз» АЖнинг турли ташкилотлари мутахассислари, Геология ва нефть-газ конларини қидириш институти, Ўзбекистон Республикаси Фанлар академияси, Минерал ресурслар ва геология давлат қўмитаси, соҳага оид олий ўқув юртлари, мамлакатимизда фаолият юритаётган хорижий нефть-газ компаниялари мутахассислари иштирок этди.

Таъкидланганидек, Ўзбекистон Республикасининг нефть-газ соҳасида туб ислоҳотларни амалга оширишда мамлакатнинг истиқболли инвестицион блокларида геология-қидирув ишларини амалга ошириш, суюқ углеводородларни қазиб олиш жараёнига замонавий технологияларни жорий этиш, янги нефть ва газ конларини ўзлаштиришдек кенг кўламли вазифалар қўйилган.

Ўзбекистон нефть-газ қазиб олиш соҳасида бугунги кунда энг замонавий инновацион услуб ва технологиялар фаол қўлланилмоқда. Соҳада фаолият кўрсатувчи халқаро компанияларнинг эътироф этилган тажрибалари татбиқ этилмоқда. 

Шу муносабат билан ўтказилган мазкур халқаро илмий-амалий конференция мамлакат нефть-газ соҳасига турли давлатларда муваффақиятли қўлланилган истиқболли технологияларни жорий этиш, ўзбекистонлик ва хорижлик мутахассислар ўртасида ўзаро тажриба алмашиш масалаларини муҳокама этишда муҳим аҳамият касб этади.

Ўзбекистон Республикаси Энергетика вазирлиги матбуот хизмати