Myanmar Hard Talk

မိမိထက် ထူးချွန်ထက်မြက်သည့် တပည့်များဖြစ်အောင် သင်ကြားပေးရန် တပ်မတော်ကွန်ပျူတာနှင့် နည်းပညာသိပ္ပံကျောင်းရှိ နည်းပြများကို ဒုတပ်ချုပ် တိုက်တွန်း

𝙈𝙃𝙏𝙉𝙀𝙒𝙎《𝙈𝘼𝙔～𝟑𝟏》

မိမိထက် ထူးချွန်ထက်မြက်သည့် တပည့်များဖြစ်အောင် သင်ကြားပေးရန်လိုကြောင်း ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဗိုလ်ချုပ်ကြီး ကျော်စွာလင်း က ဟိုပုံးတပ်နယ်၊ တပ်မတော်ကွန်ပျူတာနှင့် နည်းပညာသိပ္ပံကျောင်းရှိ နည်းပြများနှင့် သင်တန်းသားများအား အဆိုပါကျောင်းသင်တန်းခန်းမ၌ သွားရောက်တွေ့ဆုံအမှာစကားပြောကြားစဥ် တိုက်တွန်းပြောကြားခဲ့သည်ဟု သိရသည်။

အလားတူ တပ်မတော်အတွက် လိုအပ်သော လူသားအရင်းအမြစ်များကို မွေးထုတ်ပေးနေသည့် သင်တန်းကျောင်းများစွာရှိသည့်အနက် ယခုသင်တန်းကျောင်းသည် ခေတ်မီတပ်မတော်တည်ဆောက်ရန်အတွက် လိုအပ်သော တပ်မတော်သားနည်းပညာရှင်များအား လေ့ကျင့်မွေးထုတ်ပေးနေသည့် သင်တန်းကျောင်းများထဲတွင်ပါဝင်သည့်အတွက် အလွန်ပင်အရေးကြီးကြောင်းကိုလည်း ထည့်သွင်းပြောကြားသည်။

ထို့ပြင် သင်တန်းနည်းပြများအနေဖြင့်လည်း ယခုကဲ့သို့ အရေးကြီးသည့် သင်တန်းသားများကို သင်ကြားလေ့ကျင့်ပေးနေရသဖြင့် နည်းပြများမှာ အလွန်တာဝန်ကြီးသဖြင့် သင်တန်းနည်းပြများအနေဖြင့် မိမိတို့သင်ကြားပေးရသည့် ပညာရပ်များအား ကျွမ်းကျင်ပိုင်နိုင်စွာ သင်ကြားလေ့ကျင့်ပေးနိုင်ရန်အတွက် သက်ဆိုင်ရာနယ်ပယ်များအလိုက် အမြဲလေ့လာဆည်းပူးနေရန်လိုကြောင်းနှင့် သင်ကြားပေးနေသည့် ပညာရပ်များကိုလည်း လက်တွေ့နယ်ပယ်တွင် ကျွမ်းကျင်ပိုင်နိုင်စွာ အသုံးချနိုင်အောင် စိတ်ရင်းစေတနာမှန်ကန်စွာဖြင့် သင်ကြားပေးရန်လိုကြောင်း၊ ခေတ်မီစက်ပစ္စည်းကိရိယာများ ကိုင်တွယ်အသုံးပြုခြင်းများကို လေ့ကျင့်သင်ကြားပေးရသည့်အတွက် နည်းပြများအနေဖြင့်လည်း ဝမ်းစာပြည့်ဝနေရန်လိုကြောင်း ပြောကြားသည်။

ဆက်လက်၍လည်း ဒုတိယတပ်မတော်ကာကွယ်ရေးဦးစီးချုပ်က နိုင်ငံတော်နှင့် တပ်မတော်အတွက် အရေးကြီးသည့် လူသားအရင်းမြစ်များကို သင်ကြားမွေးထုတ်ပေးရသည်ဖြစ်သည့်အတွက် အလေးထားသင်ကြားပေးရန်လိုကြောင်း၊ သင်ကြားသည့်အခါတွင်လည်း သင်တန်းသားများ နားလည်တတ်မြောက်လွယ်အောင် လေ့ကျင့်သင်ကြားပေးရန်လိုကြောင်း၊ တပ်မတော်အတွက် အမှန်တကယ်အားထားရသည့် နည်းပညာနှင့်ပတ်သက်သည့် တပ်မတော်သားပညာသည်များကို မွေးထုတ်ပေးရခြင်းဖြစ်သည့်အတွက် ဖြစ်ပေါ်ပြောင်းလဲနေသည့် ခေတ်မီနည်းပညာများကို စဉ်ဆက်မပြတ်လေ့လာနေကြရန်လိုကြောင်း။

ခေတ်မီတပ်မတော်တည်ဆောက်ရာတွင် နည်းပညာကျွမ်းကျင်သည့် အသိပညာရှင်၊ အတက်ပညာရှင်များ၏ အခန်းကဏ္ဍသည် ပိုမိုကျယ်ပြန့်အရေးပါလာကြောင်း၊ ထို့ကြောင့် သင်တန်းနည်းပြများက သက်ဆိုင်ရာနယ်ပယ်အလိုက် စဉ်ဆက်မပြတ်လေ့လာနေသကဲ့သို့ သင်တန်းသားများအနေဖြင့်လည်း လိုအပ်သည့် နည်းပညာများအား အကျိုးရှိစွာအသုံးပြုနိုင်စေရန် သင်ယူထားသည့်ဘာသာရပ်များကို အမှန်တကယ်ကျွမ်းကျင်တတ်မြောက်အောင် ကြိုးစားလေ့ကျင့်သင်ယူကြရန်လိုကြောင်း။

မိမိတို့ တပ်မတော်အနေဖြင့် ခေတ်နှင့်လျော်ညီသည့် တိုးတက်ပြောင်းလဲလာသော စစ်နည်းဗျူဟာများ၊ စစ်အတတ်ပညာများ၊ စစ်လက်နက်ပစ္စည်းများနှင့် နည်းပညာများအား ပြောင်းလဲကျင့်သုံးရန်လိုအပ်ကြောင်း၊ သို့ဖြစ်၍ သင်တန်းသားများအနေဖြင့် ပြောင်းလဲတိုးတက်လာသော နည်းပညာများအား စဉ်ဆက်မပြတ် လေ့လာ၍ မိမိတို့သင်ကြားလေ့လာထားသည့် ဘာသာရပ်နယ်ပယ်အလိုက် Professional ကျကျ တက်မြောက်သည်အထိ ကြိုးစားလုပ်ဆောင်ကြရန်လိုကြောင်း၊ အားလပ်ချိန်များတွင် ပညာရပ်ဆိုင်ရာစာပေများကို ဖတ်ရှုလေ့လာနေရန်လိုကြောင်း၊ သင်တန်းသားများအားလုံး စစ်အတတ်ပညာနှင့် လုပ်ငန်းအတတ်ပညာများတွင် အရည်အချင်းပြည့်မီသူများဖြစ်ရန်လိုကြောင်း၊ မိမိတက်ကျွမ်းသည့် အတက်ပညာများကို အပြည့်အဝအသုံးချခြင်းဖြင့် စွမ်းအားရှိသည့် တပ်မတော်ကို တည်ဆောက်နိုင်မည်ဖြစ်ကြောင်း။

တပ်မတော်သားများသည် တပ်မတော်အတွင်း ဝင်ရောက်အမှုထမ်းဆောင်ကြရာတွင် မည်သူတစ်ဦးတစ်ယောက်၏ တိုက်တွန်းချက်မျှမပါဘဲ မိမိတို့၏ဆန္ဒအလျောက် နိုင်ငံတော်ကာကွယ်ရေးတာဝန်များကို ထမ်းဆောင်ခဲ့ကြခြင်းဖြစ်ကြောင်း၊ တပ်မတော်က ချမှတ်ထားသည့် စည်းကမ်းများအတိုင်းလိုက်နာကျင့်သုံး၍ မိမိကိုယ်ကိုယ် ထိန်းသိမ်းနေထိုင်ပါက တစ်ဦးချင်းစီ၏ ရည်မှန်းချက်များ တိုးတက်အောင်မြင်လာမည်ဖြစ်ကြောင်း၊ မိမိတို့ဘဝကို ထိခိုက်ပျက်စီးစေနိုင်သည့် မူးယစ်သောက်စားမှုများနှင့် အပျော်အပါးလောင်းကစားမှုများကို ရှောင်ကြဉ်ရန်လိုကြောင်း။

သင်တန်းသားများအနေဖြင့် နိုင်ငံတော်နှင့် တပ်မတော်အတွက် လိုအပ်နေသော နည်းပညာရှင်ကောင်းများ၊ နိုင်ငံသားကောင်းများဖြစ်ရန်နှင့် နိုင်ငံတော်နှင့် တပ်မတော်အပေါ် သစ္စာရှိရန်လိုကြောင်း၊ သင်တန်းဆင်းပြီးနောက် သက်ဆိုင်ရာ တပ်ရင်း၊ တပ်ဖွဲ့များ၌ ရောက်ရှိတာဝန်ထမ်းဆောင်ချိန်တွင်လည်း သင်ကြားပေးလိုက်သည့် ပညာရပ်များအား မှန်မှန်ကန်ကန်အသုံးချပြီး ပေးအပ်သည့် တာဝန်များကို ကျေပွန်အောင် ထမ်းဆောင်ကြရန် လိုကြောင်းနှင့် တာဝန်ထမ်းဆောင်ကြရာတွင်လည်း မိမိ၏ကျောင်းဂုဏ်သိက္ခာ တပ်မတော်၏ ဂုဏ်သက္ခာကို စောင့်ထိန်းရန်နှင့် ဥပဒေမဲ့လုပ်ရပ်များ မလုပ်မိစေရန်လိုကြောင်းဖြင့်ပြောကြားခဲ့သည်ဟု သိရသည်။