Myanmar Hard Talk

❝မော်လမြိုင်ပညာရေးဒီဂရီ ကောလိပ်ကို ဆရာအတတ်ပညာ တက္ကသိုလ်အဖြစ်သို့ အဆင့်တိုးမြှင့် ဖွင့်လှစ်နိုင်ရေးအတွက် စီမံဆောင်ရွက်နေ❞

≋ငယ်ရွယ်သူ ဆရာ ဆရာမများ လူမှုကွန်ရက်တွင် ကျောင်းဝတ်စုံများဖြင့် ထုတ်လွှင့်မှုမျိုးစုံ ပြုလုပ်လာကြသည်ကို တွေ့မြင်နေရဟုဆို≋

𝙈𝙃𝙏𝙉𝙀𝙒𝙎《𝙈𝘼𝙍～𝟐𝟏》

မော်လမြိုင်ပညာရေးဒီဂရီ ကောလိပ်ကို ဆရာအတတ်ပညာ တက္ကသိုလ်အဖြစ်သို့ အဆင့်တိုးမြှင့် ဖွင့်လှစ်နိုင်ရေးအတွက် သင်ရိုးညွှန်းတမ်း ရေးဆွဲရေး၊ ဆရာတိုးချဲ့ခန့်ထားရေး၊ ဆရာ အရည်အသွေးမြှင့်တင်ရေး၊ တက္ကသိုလ်အင်္ဂါရပ်များ ပြည့်စုံရေး စီမံဆောင်ရွက်လျက်ရှိကြောင်း ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၏ ပြောကြားမှုအရ သိရသည်။

မော်လမြိုင်တက္ကသိုလ်မှ ဒုတိယ ပါမောက္ခချုပ်များနှင့်အတူ မတ်လ ၁၉ ရက်၊ မွန်းလွဲပိုင်းက မော်လမြိုင်ပညာရေးဒီဂရီကောလိပ် ကျောင်းအုပ်ကြီး၊ ဆရာ ဆရာမများနှင့် တွေ့ဆုံစဥ် ယခုလို ပြောကြားခဲ့ခြင်းဖြစ်သည်။

ဆက်လက်၍လည်း ဒုဝန်ကြီးက ဝိဇ္ဇာ/သိပ္ပံ (ပညာရေး) ဘွဲ့စာမေးပွဲများကို ထူးချွန်စွာအောင်မြင်သူများသည် မဟာဝိဇ္ဇာ/မဟာသိပ္ပံ(ပညာရေး) ဘွဲ့သင်တန်းများသို့ ဆက်လက်တက်ရောက်ကာ အထက်တန်းပြ ဆရာ ဆရာမများဖြစ်လာနိုင်သည့် လမ်းကြောင်းကို ကျောင်းသား ကျောင်းသူများအား အသိပေးပြီး ကြိုးစားသင်ယူ လေ့လာထားကြရန် တိုက်တွန်းအားပေးကြစေလိုကြောင်း ပြောကြားသည်။

အလားတူ ယနေ့ခေတ်ကာလတွင် ငယ်ရွယ်သူ ဆရာ ဆရာမများမှာ လူမှုကွန်ရက်တွင် ကျောင်းဝတ်စုံများဖြင့် ထုတ်လွှင့်မှုမျိုးစုံ ပြုလုပ်လာကြသည်ကို တွေ့မြင်နေကြရကြောင်းနှင့် ပညာရေးတက္ကသိုလ်များ၊ ပညာရေးဒီဂရီကောလိပ်များသည် အခြေခံပညာ ဆရာဆရာမလောင်းများကို စနစ်တကျလေ့ကျင့်ပျိုးထောင်ပေးရာ ဌာနကြီးများဖြစ်သည့် အားလျော်စွာ မိမိတပည့်များကို ဆရာ ဆရာမ ကျင့်ဝတ်၊ ဂုဏ်သိက္ခာနှင့်အညီ ပြုမူ၊ ပြောဆို၊ နေထိုင်၊ လုပ်ကိုင်တတ်စေရေးအတွက် ပညာရေးသဘောတရား ဘာသာရပ်တွင် သာမက ကျန်ဘာသာရပ်များကို သင်ကြားချိန်တွင်လည်း အလျဉ်းသင့်သလို ထည့်သွင်းပြောဆို သွန်သင်ဆုံးမပေးကြစေလိုကြောင်း မှာကကားသည်။

ထို့ပြင် ကျောင်းရှေ့စုဝေးကွင်းတွင် နေ့စဉ်နိုင်ငံတော်အလံအလေးပြုခြင်း၊ နိုင်ငံတော်သီချင်းသီဆိုခြင်း အလေ့အကျင့်ကောင်းများကို မပျက်မကွက် လေ့ကျင့်ပေးကြစေလိုကြောင်းနှင့် နိုင်ငံတော်အကြီးအကဲက ပညာရေးဒီဂရီကောလိပ်တိုင်းတွင် အားကစားကွင်းရှိစေရေး စီမံဖြည့်ဆည်းပေးလျက်ရှိရာ ကျောင်းသား ကျောင်းသူများ အားကစားနှင့်ကာယ၊ ပြေးခုန်ပစ်ကစားနည်း မျိုးစုံ ကစားနိုင်စေရေး ကျောင်းအုပ်ကြီးများက စီမံခန့်ခွဲပေးကြစေလိုကြောင်းဖြင့် တိုက်တွန်းမှာကြားခဲ့သည်ဟု သိရသည်။