Муносабат

Интернет ижтимоий тармоғида “Профилактика инспекторида бундай ваколат борми? Ким ҳақ, ким ноҳақ?” сарлавҳали видеотасвир юзасидан муносабат

Видеолавҳада кўрсатилган ҳолат жорий йилнинг 6 июлда Қашқадарё вилояти Ғузор тумани Мўминобод МФЙда содир бўлганлигини маълум қиламиз.  Қашқадарё вилоятининг Ғузор тумани “Қизил” ҳудудга киритилганлиги сабабли Ғузор туман ҳокимининг жорий йил 3 июлдаги йиғилиш баёнига асосан Ғузор туман ҳудудида жорий йилнинг 3 июлидан бошлаб автотранспорт воситаларининг ҳаракатланиши қатъиян тўхтатилган эди. Шу сабабдан, вилоятнинг Ғузор ва Қамаши туманлари чегара ҳудудида, Мўминобод МФЙда карантин блок пости ташкил этилиб, тақсимотга асосан профилактика инспекторлари капитан Ю.А. ҳамда катта лейтенант С.Х.лар хизматга жалб этилган. 

2020 йилнинг 6 июль куни соат чамаси 06:30ларда Деҳконобод туманида яшовчи, 1994 йилда туғилган фуқаро Б.О. ўзига тегишли “НЕКСИЯ-3” русумли автомашинасида карантин қоидаларига амал қилмай, ҳимоя ниқобини тақмасдан ҳаракатланиб келаётганда блок постда хизмат ўтаётган туман ИИБ ҲПБ профилактика инспекторлари капитан Ю.А. ва катта лейтенант С.Х.лар томонидан тўхтатилган.

Фуқаро О.Б.га автомашинада ҳаракатланиш чекланганлиги, Ғузор туман ҳудуди “Қизил” ҳудудга киритилганлиги сабабли автомашиналар кириб-чиқиши чекланганлиги, автомашинани йўлнинг қатнов қисмидан четга олиши, шунингдек карантин қоидаларини бузиб ҳимоя ниқоби тақмасдан келаётгани тушунтирилганда, фуқаро О.Б. профилактика инспекторларининг қонуний талабларига бўйсунмаган. Бу ҳолатни видеотасвирда ҳам кузатиш мумкин.

Натижада, ҳолат юзасидан фуқаро О.Б.га нисбатан Ўзбекистон Республикаси МЖтКнинг 183-, 194-, 195- моддалари ҳамда 54-модда 2-қисмига асосан маъмурий баённомалар расмийлаштирилиб, тўпланган ҳужжатлар чора кўришлик учун 2020 йил 16 июлда  Маъмурий ишлар бўйича Ғузор туман судига юборилган. Суднинг қарорига асосан фуқаро О.Б.га нисбатан тегишли чора кўрилган.

Қашқадарё вилоят ИИБ Ахборот хизмати