Муфтий Шайх Нуриддин Холиқназар: “Жамиятда қандай мартабада бўлишимиздан қатъий назар, қонун-қоидага амал қилишимиз шарт”
Muslim.Uz2024 йил 1 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари раислигида диний соҳа ходимларининг видеоселектор йиғилиши бўлиб ўтди. Унда 2023 йилда амалган оширилган ишлар, эришилган ютуқлар ва йўл қўйилган камчиликлар муҳокама қилинди.
Муфтий ҳазратлари йиғилиш аввалида юртимизда диний соҳада кенг кўламли ислоҳотлар қилингани, яхши натижаларга эришилгани ва эътирофга лойиқ ишлар кўп бўлганини таъкидладилар. Хусусан, ўтган йилда 13 та масжид давлат рўйхатидан ўтказилгани, шу билан сўнгги йилларда янги очилган масжидлар сони 90 тани ташкил этаётгани, 75 та жоме биноси қайта бунёд этилгани, Қуръон курслари сони 28 тага етгани, Мир Араб олий мадрасаси, “Ҳадичаи Кубро” мадрасаси замонавий бинога кўчиб ўтгани, таълим-тарбия жараёнлари бугунги талаблар даражасида такомиллашгани, Азҳари шарифдан 7 нафар устоз жалб қилингани кабилар ҳақида маълумот бердилар.
Шунингдек, йиғилишда танқидий-таҳлилий масалаларни ҳам кўриб чиқиш асносида Шайх Нуриддин Холиқназар ҳазратлари барча диний соҳа ходимларини амалдаги қонунларга қаттиқ риоя этишга чақириб: “Биз қонун устувор бўлган давлатда яшаймиз. Шундай экан жамиятда қандай мартаба ёки мақомда бўлишимиздан қатъий назар, миллий давлатчилик талаблари ва қонун-қоидаларга амал қилишимиз шарт”, деб алоҳида таъкидладилар.
Йиғилишда диний соҳани рақамлаштириш, халқаро сертификатларга эга бўлиш, олий диний таълим муассасалари шифри классификаторга киритилгани ва илмий фаолиятни ривожлантириш борасида қилинган ишларга алоҳида урғу қаратилди. Шунингдек, ташаббускор, фаол ва жонкуяр соҳа ходимлари рағбатлантирилди.
Шайх Нуриддин Холиқназар ҳазратлари томонидан 2024 йилда диний соҳа ходимлари олдида турган муҳим вазифалар, хусусан, имом-хатиблар ўз вазифасига сидқидилдан ёндашиши, мўмин-мусулмонлар эҳтиёжини қондириши, халқимиз, айниқса, ёшларни тўғри йўлга бошлаши, ёш кадрларни қўллаб-қувватлаш, отинойиларни ижтимоий муаммоларни ҳал этишга йўналтириш ҳамда яқинлашаётган Рамазон ойига тайёргарлик кўриш сингари вазифалар белгилаб берилди.
Видеоселекторда соҳа ходимлари фаолиятини такомиллаштириш, билим савияларини доимий ошириш, меҳнат мажбуриятларини бажариш, ижро интизомига амал қилиш ҳамда пешволик мақомига муносиб бўлиш юзасидан тавсия ва топшириқлар етказилди.
Йиғилишда Диний идора раиси ўринбосарлари, Қорақалпоғистон мусулмонлари қозиёти, Тошкент шаҳри ва вилоятлар бош имом-хатиблари муҳокама қилинган масалалар юзасидан ўз фикр-мулоҳазаларини билдирди.
Ўзбекистон мусулмонлари идораси Матбуот хизмати