Молитва священномученику Илариону (Троицкому), архиепископу Верейскому

О, пресла́вный уго́дниче Бо́жий священному́чениче Иларио́не, о́тче наш, ты во дни маловре́меннаго жития́ земна́го посреде́ гоне́ний и скорбе́й мно́гих ве́ру сохрани́в, ду́ха не угаси́л еси́ и ве́рныя научи́л еси́, ка́ко подоба́ет жи́ти в Дому́ Бо́жии, и́же есть Це́рковь Бо́га Жи́ва, столп и утвержде́ние и́стины. Сего́ ра́ди к тебе́ припа́дающе мо́лимся: помози́ нам твои́ми моли́твами догма́ты и кано́ны церко́вныя тве́рдо храни́ти, зре́ние согреше́ний свои́х ду́хом смире́нным стяжа́ти, вся́каго челове́ка я́ко нетле́нный о́браз Христо́в по глаго́лу Ева́нгельскому возлюби́ти, ни еди́наго же презира́юще или́ отрева́юще, но всем по си́ле служа́ще, и та́ко Го́сподеви рабо́тающе, да сподо́бимся с тобо́ю и со все́ми новому́ченики Це́ркве Ру́сския воспева́ти Святу́ю Тро́ицу во ве́ки веко́в. Аминь.