മഴയുടെ പുഴ
Deon
തെക്കൂന്നൊരു ഇരമ്പം കേൾക്കുന്നില്ലേ?
മഴയുടെ വരവാണത്!
അവൾക്കു പുൽകാൻ പാകത്തിന് വെള്ളിവെളിച്ചത്തിന്റെ നേർത്ത ചൂടുള്ള പുതപ്പെടുത്തുമാറ്റി സൂര്യൻ ഇന്നല്പം നേരത്തേ പിൻവാങ്ങിയിരിക്കുന്നു.
മണ്ണിനും മഴയാണിഷ്ടം, ആ ആകാശസമ്മാനത്തിന്റെ ആദ്യസ്പർശം വേമ്പനാട്ടുകായലിന് അവകാശപ്പെട്ടതാണ്.
വടക്കുപടിഞ്ഞാറ് നടുത്തുരുത്തിനെയും നനയിച്ച് മൂവാറ്റുപുഴയാറിൽ തുള്ളിക്കളിച്ച് ഒരു പ്രണയ പാരവശ്യത്തിലെന്നപോലെ പൂക്കൈത തുരുത്തിലേക്ക് അടുക്കുന്ന ആ പ്രണയിനിയുടെ യാത്ര അതിമനോഹരമായ കാഴ്ചയാണ്.
മുറിഞ്ഞപുഴയാണ് മഴയ്‌ക്കേറ്റം പ്രിയമെന്നു തോന്നും..
ദിക്കുതിരിച്ചു സ്നേഹിക്കുമ്പോളൊക്കെയും അവളിവിടം ഒഴിവാക്കാറില്ല.
പലപ്പോളും അക്കരെ നിൽക്കുന്ന വാകമരങ്ങൾ കൊതിയോടെ എത്തിനോക്കുന്നതു കാണാം മുറിഞ്ഞപുഴയെ, പുഴയിലെ മഴയെ!
-DeOn-