МУСОФИРЛАРИМ

* Мусофирларим!

Ўрис сизларга туҳмат қилди!

Россияда икки миллион ўзбек юрибди, биз Ўзбекистонга қарши уруш бошласак, булар ҳаммаси биз томон бўлади, бизга қўшилиб, урушга боради, деди.

Сизларга айтадиган бир-икки сўзларим бор, қулоқ солинг!

Мусофирларим! Кечагина сизни "баран", деган, "таракан", деган, "чёрнажопий" деган ўрис бугун сизни ўзиники санаб қолибди! Сизни Она-Ватанингизга қарши урушга сафарбар қилмоқчи.

Тўғри, Ватан сизларнинг бошингизни жуда силаб юбормади, меҳрини ҳам кўп бермади, сизларга иш ўрни қилиб беролмади, уй беролмади, бой қилиб қўя олмади. Аммо сизлар барибир ўзбексизлар, ўзбекка қарши қурол ушламайсизлар, бунга ишонаман. Юртдаги айрим каттаконларга аччиқ қилганингиз билан юртдан аразламайсизлар, ёвга қўшилиб, юртга бостириб келмайсизлар, бунга ҳам ишонаман.

Яхшими, ёмонми, шу Ўзбекистонни сиз билан бизга Ватан қилиб берган Аллоҳ, бизни шу юртда яратди, алҳамдулиллаҳ, ўзбек қилиб яратди, мусулмон қилиб яратди. Инша Аллоҳ, кофирнинг аврашига учиб, Аллоҳнинг лаънатига учрамайсиз, мусулмонга ўқ узмайсиз, бунга ҳам ишонаман.

Мусофирларим! Биз, ўзбеклар, қаерда бўлсак, киндик қонимиз томган ерга талпиниб яшаймиз. Биз, ўзбеклар учун ота-боболаримизнинг мозоридан муқаддасроқ тупроқ йўқ. Америкадаги ўзбек ҳам "Ўлсам, қишлоққа, отамнинг ёнига кўминглар", дейди. Сизлар ўрисга қўшилиб келиб, ота-боболаримиз мозорини портлатмайсиз, бунга ҳам ишонаман.

Кўриб турибсиз, ўрис қаерга бостириб борса, қиз борми, аёл борми, номусини булғайди, гўдакчаларни ҳам аямай отади, чопади. Ўрис билан қўшилиб келиб, гулдек қизларимизни, келинларимизни зўрламайсизлар, гўдак невараларимизни чопмайсизлар, бўғизламайсизлар, бунга сизнинг қўлингиз бормайди, бунга ҳам ишонаман.

Мусофирларим! Болалигингиз ўтган тупроқ кўчалар, пахса деворли уйлар, қўй боққан қир-адирларингиз тушингизга киради, сиз сувига нон оқизиб еган ариқлар тушингизга киради, димоғингизга ўша ариқлар четидаги пудиналарнинг ҳидлари келади. Сиз ўша кўчаларни, ўша уйларни ўрис танклари мажақлаб ташлашини истамайсиз, ўша ариқларда миллатдошингиз қони оқишини истамайсиз, пудиналар ўрнига димоғингизга порох ҳиди уннаб қолишини истамайсиз, бунга ҳам ишонаман.

Мусфирларим, жигарларим, укаларим, ўғилларим! Ўриснинг алдовига учиб қолишингиздан қўрқаман! Унинг сохта ваъдаларига ишониб қолишингиздан қўрқаман! У Украинадаги урушга юборган ўзбекларга ҳам катта-катта пуллар ваъда қилган эди. Қани ўша катта-катта пуллар? Катта-катта самолётлар ўша урушга кетган ўзбек йигитларининг тобутлари билан тўлиб келаяпти-ку?! Ота-онасига ўрис давлати бир тийин берган йўқ, ақалли, ҳамдардлик билдириб қўйгани йўқ-ку?!

Мен яна бир нарсага ишонаман: ўрислар Ўзбекистонга қарши уруш бошласа, Россиянинг ўзида икки миллионта душмани бош кўтаради! Икки миллион мусфирнинг ярми юртга содиқ қолиб, биттадан ўриснинг кекирдагини ғажиб ташласа ҳам бир миллион ўрис даф бўлади! Ваҳоланки, ўрисларнинг Украинага ташлаган армиясида ҳам бунча аскар йўқ. Россиянинг жами аскари ҳам бир миллион эмас!

Мусофирларим! Тўғри, Россияда ишлаб, бола-чақа боқаяпсиз, айримларингизга менинг гапларим ёқмаслиги мумкин. Аммо бола-чақам деб юрган барча мусфоирларим яхши билсинки, ўрис ана шу бола-чақангизни ўлдиргани келмоқчи! Яна бола-чақангизни қул қилмоқчи! Худди отангизни, онангизни қул қилгани каби! Етар ўрисга 130 йил қуллик қилганимиз! Етар қарич ёшимиздан дориларга булғаниб пахта териб, ўрисларга жўнатганимиз. Етар ўрис миллатимиз ойдинларини териб-териб отгани! Етар шунча йил камситилганимиз, ерга урилганимиз!

Мусофирларим! Майли, менинг гапларим ёқмасин, майли, мени ёмон кўринг, аммо юртни ёмон кўрманг, миллатни ёмон кўрманг! Ватанни қўлдан берманг! Зеро, сиз билан бизда бошқа Ватан йўқ! Орни, номусни, шарафни сақланг!

Ўзбек деган миллат ер юзидан йўқ бўлиб кетмасин!

Унутманг, ўрис босиб олган ерларда ўнлаб миллат миллат сифатида, халқ сифатида йўқ бўлиб кетди! Уларнинг тили ҳам ўрисча, исми ҳам ўрисча, дини ҳам ўрисники!

Авлодларингиз ўрис бўлиб кетишига йўл қўйманг!

Анави алкаш ўриснинг қутқусига учиб, ўз юртингизга қурол кўтариб келсангиз Аллоҳнинг лаънатига, авлодлар қарғишига қоласиз!

Мусофирларим! Сизларга ишонаман! Сиз ўзбек бўлиб қоласиз! Ўзбекнинг орини, шарафини ҳимоя қиласиз!

Юртда қолган барча оталар номидан Каримберди Тўрамурод, ёзувчи.