Когон: "Oygul grand chevar" хусусий корхонаси чеварлари 20 нафарга етди
Юртимизда хотин-қизларнинг ҳуқуқ ва манфаатларини ҳимоя қилиш, уларнинг бандлигини таъминлаш, тадбиркорлик ташаббусларини қўллаб-қувватлаш, қолаверса, келажагимиз эгалари ҳаёти учун мустаҳкам пойдевор қўйиш борасида амалга оширилаётган ишлар ўз самарасини бермоқда.
Давлатимиз раҳбарининг аёллар тадбиркорлиги ва ишбилармонлигини қўллаб-қувватлашга қаратилган ташаббусларидан илҳомланиб когонлик хотин-қизлар ҳам янгидан янги ташаббусларга қўл уришмоқда. Шундай ташаббускор аёлларимиздан бири туманнинг Ўба-чўли маҳалласида яшовчи Ойгул Чориевадир. Яқин-яқингача якка тартибда тикувчилик билан шуғулланиб келган бу аёл ўзи сингари чеварликка иштиёқи бўлган хотин-қизларни ишга олиб, цех ташкил этишни кўп йил орзу қилган.
Ниҳоят, ўтган йилнинг май ойида Ойгул Чориева орзуси амалга ошиб, дастлаб 4 нафар аёл билан "Oygul grand chevar" хусусий корхонасини ташкил этган шижоатли аёл бор имкониятдан унумли фойдалангани ҳолда фаолиятини кенгайтиришга муваффақ бўлди. Ҳозирда бу цехда маҳалласидаги "Аёллар дафтари"да рўйхатда бўлган 20 нафар хотин-қизни иш билан таъминлаган. Айтиш жоизки, аҳил жамоа томонидан тайёрланаётган маҳсулотлар маҳаллий бозор билан биргаликда Россия Федерациясига ҳам экспорт қилинмоқда.
Вилоят ҳокимлиги матбуот хизмати