Keń imkaniyatlar jaratılǵan

Ózbekstan Respublikası Prezidentiniń 2023-jıl 25-dekabrdegi PQ-404-sanlı qararına tiykarlanıp 2024-jılǵa mólsherlengen "Sociallıq óndiris infrastrukturasın rawajlandırıw" baǵdarlaması sheńberinde usı jılı Tórtkúl rayonında bir qansha sociallıq obektlerdiń qurılısı ámelge asırıldı.

Usınday obektlerden biri - rayonlıq Mektepke shekemgi hám mektep bilimlendiriwi bólimine qaraslı 63-sanlı ulıwma bilim beriw mektebine 240 orınlıq jańa imarat qurılısı juwmaqlanıp, paydalanıwǵa tapsırıldı. Bul jumıslarǵa 2 milliard 200 million sum qarjı ajıratıldı. Búgin bolıp ótken saltanatlı máresimde rayon hákimi R.Shamuratov qatnasıp, mektep jámááti hám oqıwshı jaslardı usı zamanagóy imarat qurılısı menen qutlıqladı.

Házirgi waqıtta bul bilim orında 550 oqıwshı-jaslar tálim-tárbiya alıp atırǵan bolıp, mekteptiń jańalanǵan imaratı oqıtıwshı hám oqıwshılar ushın keń imkaniyatlar jaratılǵan orın bolatuǵınına gúman joq.