Касцюм і машыну ўзяў у бацькі. Што за хлопец «прадае» аўтамабіль у тыктоку

Маладога чалавека, які зняў вірусны ролік пра «як куля рэзкае» аўто з «перадавымі сістэмамі бяспекі» ў выглядзе абразоў, завуць Яраслаў. Яму 15 гадоў, ён з Гомельшчыны. 

Яраслаў з вёскі Церахоўка. Як высветлілася, хлопец не збіраецца прадаваць «Аўдзі» свайго бацькі. Ён ўзяў машыну і касцюм ў яго ў якасці рэквізіту, каб зняць тыкток. 

Яраслаў зрабіў пародыю на вядомага тыктокера Аляксея Іванова. Той здымае ролікі, у якіх незвычайна прадае іншамаркі. Вось і хлопец вырашыў зрабіць падобнае відэа толькі ў беларускіх рэаліях. 

Яраславу падабаюцца машыны, у будучыні ён марыць набыць сабе «Аўдзі» RS6. 

Таксама днямі беларус выпусціў ролікі, у якіх ён прадае самаробны ровар і трактар. Там з’яўляюцца новыя рэквізіты — дзелавы чамадан, які хлопец знайшоў дома на шафе, і сонечныя акуляры, якія былі модныя ў нулявых.

«Тут усталявана сістэма педаліравання магутнасцю адна чалавечая сіла», — нахвальвае ён «спарткар» — самаробны ровар з прыкручанай скотчам калонкай.

Сам крэатыўшчык не чакаў, што яго ролік стане вірусным. Цяпер Яраслаў будзе працягваць здымаць тыктокі.