Канон преподобномученику Елевферию Печенникову, глас 6

Песнь 1 

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Припев: Преподобномучениче Елевферие, моли Бога о нас

Христе́ Многоми́лостиве,/ даждь ми ра́зум просла́вити уго́дника Твоего́ преподобному́ченика Елевфе́рия,/ по́двиги по́стническия подъе́мшаго и да́же до кро́ве Тебе́ ра́ди пострада́вшаго.

По́двизи и страда́ния твои́, преподобному́чениче Елевфе́рие, украси́ша Це́рковь Ру́сскую,/ сего́ ра́ди вку́пе с новому́ченики тя велича́ем.

Освяти́ся земля́ Ру́сская по́ты по́стническими и кровьми́ твои́ми, преподо́бне,/ те́мже во оби́тели Небе́сныя всели́лся еси́,/ на си́лу кре́стную упова́ние возлага́я.

Не хотя́ Госпо́дь поги́бели наро́да Росси́йскаго,/ но е́же обрати́тися и жи́ву бы́ти ему́,/ яви́ избра́ннаго преподобному́ченика Елевфе́рия Своего́/ безбо́жныя облича́ти и отпа́дшия от Це́ркве вразумля́ти.

Богоро́дичен: Смире́нно приношу́ Ти моле́ние, благоутро́бная Ма́ти,/ и к Твоему́ прибега́ю милосе́рдию:/ не отврати́ мя, неразу́мнаго, от лица́ Твоего́.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

На си́лу Бо́жию упова́ние возлага́я, преподобному́чениче Елевфе́рие,/ по́двиги по́стническими и кровьми́ му́ченическими освяти́л еси́ зе́млю Ру́сскую,/ сего́ ра́ди во оби́тели Небе́сныя всели́лся еси́.

На ка́мени благоче́стия утверди́вся,/ му́жественне гоне́ния терпе́л еси́/ и ве́чнующаго утеше́ния сподо́бился еси́,/ его́же прича́стники сотвори́ пою́щия тя, Елевфе́рие велему́дренне.

Честна́я и непоро́чная же́ртва был еси́/ во умилостивле́ние наро́да Ру́сскаго, преподобному́чениче Елевфе́рие,/ ны́не и нас в Правосла́вней ве́ре утверди́.

Богоро́дичен: Пода́ждь отпуще́ние грехо́в нам, Богоро́дице,/ зако́на Влады́ку ро́ждшая,/ стра́сти нас ра́ди претерпе́вшаго и спасе́ние нам дарова́вшаго.

Седа́лен, глас 8

А́ще и уби́ша врази́ тело твое́, преподобному́чениче Елевфе́рие,/ оба́че души́ твоея́ не косну́шася./ Те́мже яви́лся еси́ столп одушевле́нный Це́ркве Росси́йския/ и хода́тай ве́рен о нас, прославля́ющих тя в ли́це новому́чеников.

Сла́ва, и ны́не, Богоро́дичен:

О Всепе́тая Богоро́дице Влады́чице,/ преподо́бных похвало́, му́чеников сла́во,/ А́нгелы восхваля́емая и челове́ки воспева́емая,/ и всего́ ми́ра кре́пкая Помо́щнице,/ изба́ви Це́рковь Ру́сскую вся́каго зла́го обстоя́ния, Еди́на Благослове́нная.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи// от смы́сла чи́ста, о Го́споде пра́зднующи.

Сло́во Бо́жие даде́ тебе́ си́лу непреобори́мую,/ те́мже у́зы тя́жкия Христа́ ра́ди претерпе́л еси́, свя́те Елевфе́рие, / и соу́з соверше́нства дости́гл еси́.

Ча́сти шу́ия изба́ви и десны́я страны́ о́бщники сотвори́ сро́дники твоя́, преподобному́чениче,/ я́ко му́жественне за Христа́ пострада́л еси́/ и благода́ть за ны моли́тися прия́л еси́.

Си́лою Бо́жиею, в ти де́йствующею, свя́те,/ препобеди́л еси́ наве́ты вражду́ющих проти́ву Це́ркве Ру́сския,/ тща́щихся ю разори́ти и тя сме́рти преда́ти.

Богоро́дичен: Плода́ вкуше́ние ме́ртва мя соде́ла,/ Жи́зни же Дре́во, из Тебе́ я́вльшееся, Пречи́стая, воскреси́/ и ра́йския сла́дости насле́дника сотвори́ мя.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

О́тче преподо́бне Елевфе́рие,/ по́двиги твои́ми пе́рвее ду́шу твою́ очи́стил еси́,/ последи́ же крове́й светозаре́ньми тьму безбо́жия разгна́л еси́,/ к све́ту И́стины ве́рныя лю́ди наставля́я.

Страда́нием во́льным грехи́ твоя́, преподобному́чениче, я́ко пле́велы, исто́ргл еси́,/ в юг же се́я слеза́ми боже́ственными,/ ра́достию ны́не пожина́еши ве́чныя жи́зни кла́сы.

Ра́нами помрачи́ся добро́та телесе́ твоего́,/ оба́че све́тлость душе́вная презе́льне возсия́ благода́тию Свята́го Ду́ха, преподо́бне страда́льче./ Моли́ приле́жно о хва́лящих тя.

Богоро́дичен: И́же из Тебе́, Влады́чице, ми́ру Рожде́йся,/ кре́пость, пе́ние и спасе́ние бысть погиба́ющим,/ от а́довых врат избавля́я ве́рою Тя блажа́щия.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.

Десни́цею Бо́жиею окормля́емь,/ на воде́ поко́йне воздержа́нием воспита́лся еси́, преподобному́чениче Елевфе́рие,/ и бу́рю безбо́жия во Оте́честве на́шем си́лою моли́тв твои́х утиши́л еси́.

Во́лны нече́стия сокруши́шася о ка́мень ве́ры твоея́, свя́те,/ те́мже моли́ся Христу́ Бо́гу/ сыново́м Росси́йским во благоче́стии пребыва́ти.

Егда́ разлучи́ша безбо́жнии ду́шу твою́ от телесе́,/ па́че Бо́гу соедини́лся еси́, досточу́дне, и Христа́ приобре́л еси́./ Те́мже моли́ся о чту́щих тя.

Богоро́дичен: Ему́же предстоя́т с тре́петом Небе́снии чи́ни,/ Того́ родила́ еси́, Чи́стая, во́лею соедини́вшагося челове́ком за бла́гость./ Моли́ приле́жно, во еже уще́дрити рабы́ Твоя́.

Конда́к, глас 3

Мирска́го мяте́жа удали́вся,/ до́бре Бо́гу послужи́л еси́,/ во дни же гоне́ний на Це́рковь Ру́сскую/ кровь твою́ за Христа́ пролия́л еси́/ и страда́ньми твои́ми зе́млю на́шу обагри́л еси́./ Те́мже моли́ся, преподобному́чениче Елевфе́рие,/ сохрани́тися ей в Правосла́вии и благоче́стии// до сконча́ния ве́ка.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Водо́ю и Ду́хом в Це́рковь Бо́жию вшед,/ слеза́ми и по́ты любо́вь Христо́ву стяжа́л еси́,/ Его́же ра́ди и смерть претерпе́л еси́, преподобному́чениче./ Моли́ о душа́х на́ших.

Преподо́бнии Твои́, Го́споди, да благословя́т Тя, псало́мски рече́м, ве́рнии./ С си́ми гла́сы приими́ похвалы́ раба́ Твоего́, страстоте́рпца Елевфе́рия,/ его́же израсти́ земля́ Ру́сская.

Сы́нове Це́ркве Ру́сския, ви́дяще, я́ко уте́ши тя Госпо́дь, преподобному́чениче Елевфе́рие,/ и возведе́ от бе́здны страда́ний к Ца́рствию Небе́сному,/ подвиза́ются пе́ти Бо́га оте́ц на́ших.

Даде́ ти Бог, свя́те, достоя́ние спасе́ния,/ я́ко стра́хом Госпо́дним от зла уклони́лся еси́./ Гони́телие же сыно́в Бо́жиих огнь ве́чный себе́ сокро́вищствуют.

Богоро́дичен: Еди́ней Богоблаже́нней, во объя́тиих нося́щей Сы́на Своего́,/ ли́цы новому́чеников Росси́йских вопию́т:/ благослове́на Ты в жена́х и благослове́н Плод чре́ва Твоего́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Боже́ственным жела́нием распала́емь,/ дре́вним му́чеником уподо́бился еси́, преподо́бне Елевфе́рие,/ и лю́тая страда́ния претерпе́л еси́./ Те́мже моли́, да Це́рковь Ру́сская во век не подви́жится.

Милосе́рдный Госпо́дь, ви́дя твоя́ страда́ния и боле́зни,/ десно́ю Свое́ю руко́ю покры́ тя, Елевфе́рие,/ и по́мощь ти подаде́ во огни́ лю́тых испыта́ний.

На Го́спода возлага́яй наде́жду не устраши́тся,/ егда́ огне́м вся суди́тися и́мут./ Ты же, свя́те, сквозе́ огнь муче́ний проше́д,/ в день о́ный нас помяни́.

Богоро́дичен: Егда́ прии́деши во сла́ве суди́ти вся́ческая,/ десны́м овца́м сопричти́ мя, Влады́ко, гре́шнаго, Ма́тере Твоея́ мольба́ми,/ да Тя сла́влю во ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Е́же по о́бразу и по подо́бию Бо́жию соблю́д невреди́мо/ и страда́ний Христо́вых о́бщник быв, Елевфе́рие досточу́дне,/ сугу́бым богоплете́нным венце́м украси́лся еси́./ Ны́не же мо́лишися сыново́м Росси́йским спасти́ся.

Сосу́д благово́нен Сло́ву яви́лся еси́,/ а́ще и нището́ю во́льною и му́ками уничиже́н быв,/ те́мже Его́ моли́ земли́ Росси́йския сокруше́ние исцели́ти, преподобному́чениче Елевфе́рие блаже́нне.

Ми́ра су́етнаго кроме́ пребыва́я,/ горе́ зре́ти навы́кл еси́, свя́те,/ отню́дуже ти по́мощь в день лют подаде́ Христо́с/ и очи́сти тя, пре́жде да́же не взят отсю́ду,/ Его́же ны́не при́сно прославля́еши.

Богоро́дичен: Вои́стину превы́шши всея́ тва́ри яви́лася еси́, Влады́чице,/ Бо́га бо всех пло́тию родила́ еси́./ Те́мже Тя Предста́тельницу и́мамы, и сте́ну тве́рду, и наде́жду изве́стну.

Свети́лен

Со́лнцу ста́вшу, одоле́ враги́ Иису́с Нави́н,/ ты же, пред очи́ма твои́ма вы́ну име́я Со́лнце пра́вды, Христа́ Бо́га на́шего,/ враги́ ви́димыя и неви́димыя посрами́л еси́,/ воздержа́нием и во́льною сме́ртию плоть ду́ху повину́я,/ и Це́ркве на́шея свети́льник был еси́,/ преподобному́чениче Елевфе́рие всехва́льне.

Сла́ва, и ны́не, Богоро́дичен: Красе́н добро́тами па́че сыно́в челове́ческих Сын Твой, Де́во Чи́стая, яви́ся,/ Его́же умоли́ разреше́ние грехо́в нам да́ти,/ помраче́ние вся́кое в земли́ Росси́йстей потребля́ющи.