“КРЕДИТ КЕРАКМИ, ЁРДАМ БЕРАМАН”
Ўзбекистон Республикаси Ички ишлар вазирлиги бирлашган таҳририяти
“Агробанк” АТБ Қамаши филиалида ишловчи М.Ш. нафсини жиловлай олмайдиган шахслар тоифасидан бўлиб чиқди. У 2019 йил май ойидан 2020 йил 30 сентябрь кунига қадар банкнинг бош юристконсульти вазифасида ишлаб келиб, фирибгарлик йўли билан ўзганинг мулкини ёки ўзганинг мулкига бўлган ҳуқуқини қўлга киритиш жиноятини содир қилди.
М.Ш. 2020 йил апрель ойида фермер хўжалиги раиси О.Б.нинг уйига бориб, кредит қарзини тўлиқ тўлагандан сўнг унга бошқа кредит “чиқариб” беришни ваъда қилиб, ишончини қозонади. О.Б.дан кредит қарзини ёпиш учун 2 миллион 500 минг сўм пулни олиб, банкка тўламасдан, ўз эҳтиёжлари учун ишлатиб юборади. Кейинчалик эса фуқаро Ш.Қ.га ажратилган 20 миллион сўм кредит маблағини нақд пул шаклида олиб беришни ваъда қилади. Кредит маблағини 13 фоизга, яъни 17 миллион 400 минг сўмга нақдлаштириб олгандан сўнг, 7 август куни мижозга тикув машинаси олиб беришини айтиб, унинг 10 миллион сўм пулини қўлга киритади. Лекин ваъдасига вафо қилмайди ва пулларни қайтаришни “унутади”.
Шунингдек, яна бир фермер хўжалигига “Беларус 80-Х” русумли трактор сотиб олиш учун банк филиали томонидан ажратилган кредит қарзини қоплатиш учун фермер хўжалиги раиси У.О.нинг яшаш уйига бориб, кредит қарзини тўлашини айтиб, унинг пластик картасидан 12 миллион сўм, ишчилари Н.М. ва С.Х.нинг пластик карталаридан эса 3 миллион сўмдан ўзининг пластик картасига ўтказиб олади. Ушбу 18 миллион сўм маблағнинг 13 миллион 500 минг сўмини ўз эҳтиёжлари учун сарфлаб юборади.
Алқисса, М.Ш. ўзгаларнинг пулини қўлга киритиб, ўз эҳтиёжларига ишлатиб юборгани учун жиноят иши қўзғатилди. Ҳозир дастлабки тергов ҳаракатлари олиб бориляпти.
Содиқ РАҲИМОВ,
“Postda” мухбири.
Қашқадарё вилояти.