KATTA MAQSADLAR OSTONASIDA

KATTA MAQSADLAR OSTONASIDA

ToshDavTU matbuot xizmati

Yangi universitetning yangi avlodi ilk dars kunlaridanoq ilmiy meros va zamonaviy tibbiyot muhiti bilan yuzlashmoqda

Yangi o‘quv yilining ilk kunlari. Toshkent davlat tibbiyot universitetining uchta binosida bir paytda talabalar gavjum bo‘ldi. Auditoriyalarda — Mustaqillik sabog‘i, yo‘laklarda — yangi muhitni o‘rganayotgan yoshlar, klinik modellashtirish maydonlarida esa hali kechagina abituriyent bo‘lgan yigit-qizlarning hayratli nigohlari...

Bugun ular uchun odatiy dars kuni emas.

Universitet rektori uchala binoda ham talabalar bilan uchrashdi. Ayniqsa, birinchi bosqich yoshlari bilan bo‘lgan muloqot yangi o‘quv yilining ma’naviy mazmunini belgilab berdi. Mustaqillik yillarida tibbiy ta’lim va ilm-fan uchun yaratilgan imkoniyatlar, zamonaviy shifokorning bilimi va mas’uliyati, talabaning bugundan boshlab o‘z oldiga katta maqsadlar qo‘yishi zarurligi suhbatlarning asosiy mavzusiga aylandi.

Bu muloqotning o‘ziga xos ramziy ma’nosi ham bor.

Chunki auditoriyada o‘tirgan birinchi kurs talabasi O‘zbekiston tibbiy ta’limi tarixidagi yangi bosqichning ilk avlodlaridan biridir.

Prezidentning 2025-yil 22-apreldagi PQ–149-son qaroriga muvofiq uchta tibbiyot oliygohi negizida tashkil etilgan Toshkent davlat tibbiyot universiteti bugun katta ilmiy va ta’lim salohiyatini yagona makonda birlashtirmoqda. 13 fakultet, 111 kafedra, 32 mingdan ziyod talaba va 2,4 mingdan ortiq professor-o‘qituvchi — bular shunchaki statistika emas. Ularning ortida mamlakat tibbiyotining ertangi kuni uchun javob beradigan ulkan akademik muhit turibdi.

Bugun shu muhitga yangi avlod kirib keldi.

Bosh binoda OAV vakillari bilan suhbatlashgan 1-davolash fakulteti talabasi Sunnat Suleymanov va 2-davolash fakulteti talabasi Xilola Xusanboyevaning hayajonini kuzatarkanmiz, bir haqiqatni his qilasiz: oliygohga kirish haqidagi uzoq yillik orzu nihoyat universitet ostonasida aniq maqsadga aylanmoqda.

Ota-onalar bilan suhbatlarda ham ayni tuyg‘u seziladi. Farzandining oq xalat kiyishini orzu qilib kelgan oila uchun bu kun oddiy o‘quv yilining boshlanishi emas. Kechagi abituriyent bugun tibbiyot universiteti talabasi. Endi esa uning oldida ancha uzun va mas’uliyatli yo‘l bor.

Kecha bilan ertaning uchrashuvi

Universitetdagi ilk kunlarning yana bir jihati e’tiborimizni tortdi.

Bir tomonda — zamonaviy tibbiy ta’lim. Ikkinchi tomonda — uni shu darajaga olib kelgan katta ilmiy maktablar xotirasi.

Ayni kunlarda universitetda “Ilmiy meros haftaligi” qizg‘in davom etmoqda. Loyihaning ilk qahramoni — O‘zbekiston farmakologiya fanida o‘z maktabini yaratgan professor Is’hoq Kamilov.

Birinchi kurs talabasi universitetga qadam qo‘yishi bilanoq ana shunday nomlar bilan uchrashayotgani bejiz emas.

Chunki tibbiyotda kelajakni faqat eng yangi texnologiyalar bilan qurib bo‘lmaydi. Yosh avlod o‘zi kirib kelgan ilmiy maktabning ildizlarini, bu dargohda kimlar izlanish olib borganini, qanday g‘oyalar va kashfiyotlar bugungi taraqqiyot uchun zamin yaratganini ham bilishi kerak.

Klinik modellashtirish kafedrasi katta o‘qituvchisi, PhD Fazilat Ismoilova bilan suhbatimiz ham aynan ilmiy meros targ‘ibotining yoshlar tarbiyasidagi ahamiyati haqida bo‘ldi.

Darhaqiqat, ustoz olimlarning hayoti muzey javonidagi tarix bo‘lib qolmasligi kerak. Agar talaba ularning ilmiy savolini tushunsa, izlanish yo‘lini bilsa, shogirdlik an’analarini his qilsa, tarix zamonaviy ta’limning faol qismiga aylanadi.

“Ilmiy meros haftaligi”ning asl mohiyati ham shunda: tarixga aylangan ilmni yangi avlod tafakkuriga olib kirish.

Talabani hayratlantirgan makon

Birinchi kurs talabalarining klinik modellashtirish va simulyatsion ta’lim imkoniyatlari bilan tanishuvini kuzatish esa reportajimizning eng jonli lavhalaridan biri bo‘ldi.

Bu yerda darslikdagi tibbiyot birdan “jonlanadi”.

Klinik holatni modellashtirish, amaliy ko‘nikmani mashq qilish, muayyan vaziyatda shifokor qanday qaror qabul qilishi kerakligini o‘rganish imkoniyatlari yoshlarning katta qiziqishiga sabab bo‘ldi.

Ularning nigohidagi hayratni ko‘rib, universitetning 29 laboratoriyasi, mingdan ortiq auditoriyasi yoki minglab kompyuterlari haqidagi raqamlarning asl mazmunini yaxshiroq tushunasiz: infratuzilmaning qiymati uning talabaga nima bera olayotgani bilan o‘lchanadi.

Bo‘lajak shifokor uchun esa eng muhim natija — bilimni amaliyotga aylantirish.

Bugungi tibbiyot ta’limining talabi ham shu.

Universitetning ilmiy salohiyati 63 foizni tashkil etishi, yuzlab fan doktorlari, professorlar, PhD va dotsentlarning faoliyat yuritishi ham ayni maqsadga xizmat qilishi kerak: talaba kuchli ilmiy muhit ichida ulg‘ayishi lozim.

Buning natijasi auditoriyadayoq ko‘rina boshlaydi. Universitet talabalari xalqaro fan olimpiadalari va musobaqalarda yuzlab sovrinli o‘rinlarni qo‘lga kiritayotgani yoshlarni faqat tayyor bilimni o‘zlashtiruvchi emas, ilmga kirib kelayotgan yangi kuch sifatida ko‘rishga asos beradi.

Mustaqillik bergan imkoniyatning qadri

Shu nuqtada bugungi Mustaqillik sabog‘ining mazmuni ham boshqacha ochiladi.

Mustaqillik haqida yosh avlodga faqat tarixiy sana sifatida gapirish kamlik qiladi. Uning natijasini yosh o‘z hayotida ko‘rishi kerak.

Orzusidagi universitetga kirish imkoniyati, zamonaviy laboratoriyada ishlash, simulyatsion texnologiyalar yordamida kasbiy ko‘nikma egallash, xorijiy tengdoshlari bilan ilmiy maydonda bellashish, kuchli professorlardan ta’lim olish — mustaqillikning bugungi talaba hayotidagi amaliy ifodasidir.

Toshkent davlat tibbiyot universitetida o‘zbek, rus va ingliz tillarida ta’lim olayotgan 32 mingdan ziyod yosh orasida 3,5 mingdan ortiq xorijiy talabaning borligi esa universitet auditoriyasining geografiyasi allaqachon mamlakat chegaralaridan kengayganini ko‘rsatadi.

Ammo katta universitetning kuchi faqat ko‘lamida emas.

Uning kuchi — maktabida.

Bir tomonda Is’hoq Kamilov kabi ustozlar qoldirgan ilmiy meros. Ikkinchi tomonda — zamonaviy klinik modellashtirish, yangi laboratoriyalar, xalqaro ilmiy maydonga intilayotgan yoshlar.

O‘rtada esa bugun universitet ostonasidan ilk bor talaba sifatida kirib kelgan avlod turibdi.

Ular hali o‘zlarining tibbiyotdagi manzilini tanlab ulgurmagan. Balki bugun simulyatsiya markaziga hayrat bilan qaragan birinchi kurs talabalaridan biri ertaga kuchli jarroh bo‘lar. Boshqasi fundamental tibbiyotga kirib borar. Yana biri ustozlari boshlab bergan ilmiy maktabning navbatdagi davomchisiga aylanar.

Buni bugun hech kim aniq ayta olmaydi.

Ammo bir narsa aniq:

katta maqsadlar hamisha birinchi qadamdan boshlanadi.

Bugun Toshkent davlat tibbiyot universiteti ostonasidan kirgan yoshlar uchun ana shu qadam qo‘yildi.

Oldinda esa bilim, klinika, ilm, izlanish va inson salomatligi oldidagi ulkan mas’uliyat turibdi.

Bu — ularning orzusidagi oliygoh.

Uni katta maqsadlar makoniga aylantirish esa ularning o‘z qo‘llarida.

Gulchehra Mirzayeva,

jurnalist.

Report Page