JavaScript-тегі шартты операторлар

Шартты операторлар барлық программалау тілдерінің негізінде жатыр. Оларсыз тіл жоқ шығар, сірә.

Бұл әрі өте маңызды тақырып, әрі, қуанышымызға орай, жеңіл тақырып.

Кеттік ал...

Өмірде жиі бір іс-әрекеттерді нақты бір шарттарға сай жасауға тура келеді. Мысал ретінде дәрігердің диагноз қоюын талқыласақ болады.

Сіздің бір жеріңіз ауырса дәрігерге барасыз, ал ауырмаса бармайсыз, өз шаруаңызбен айналысып жүре бересіз.

Барғаннан кейін де шарттар тола. Қай жеріңіз ауырғанына қарай әртүрлі маманға көрінесіз.

Құлақ, мұран тамақ ауырса, демек, ЛОРға барасыз.

Бас ауырса - терапевтке/невропатологқа.

Теріге жара шықса - дерматологқа.

Омыртқа мазаласа - остеопатқа. Т.с.с.

Бас ауырды делік, терапевтке келдіңіз. Ол одан сайын шартты сұрақтарды көбейте түседі. Ауырғаны бүгін ғана ма, біраз болды ма? Еңкейсеңіз қаттырақ ауырады ма? Дәрі іштіңіз бе? Соққы алған жоқ па едіңіз байқаусызда?

Осылайша дәрігер сұрақ қою арқылы, өзінің келесі қадамын анықтап отырады. Әртүрлі шарттардың орындалуы немесе орындалмауына қарай ең ақырында диагноз қояды.

Дәрігердің біліктілігі жоғары болған сайын көп нәрсе сұрауы мүмкін, немесе, түк білмесе екі if-тен кейін қолға аспирин ұстатып, үйге қайтара салуы мүмкін)

if (тақырыпты түсінсеңіз){
  әрі қарай кете беріңіз
} else {
  тағы бір қайталаңыз
}