Молия вазирлигининг Сурхондарё вилояти Давлат солиқ бошқармасига йўллаган хати нусхаси тўғрисида маълумот
MoliyaPressЎзбекистон Республикаси Вазирлар Маҳкамасининг 1999 йил 2 апрелдаги “Бюджетдан маблағ билан таъминланадиган ташкилотларда хизмат енгил автотранспортидан фойдаланишни тартибга солиш тўғрисида”ги 154-сонли қарорига асосан белгиланган лимит доирасида хизматда фойдаланиш учун транспорт воситаларини сотиб олиш Ўзбекистон Республикаси бюджетидан маблағ олувчи ташкилотлар томонидан - фақат Молия вазирлиги билан келишган ҳолда амалга оширилиши белгиланган.
Шу муносабат билан, Сурхондарё вилоят Давлат солиқ бошқармаси (кейинги ўринларда - Бошқарма) томонидан, бошқарма балансидаги мавжуд 2013 йилда ишлаб чиқарилган “Нексия-2” русумли автотранспорт воситаси бугунги кунда эскириб яроқсиз ҳолга келиб қолганлиги сабабли унинг ўрнига белгиланган лимит доирасида бир дона хизмат автомашинаси харид қилишга рухсат сўраб, 2020 йил 2 октябрдаги 23-31631-сонли хат билан Ўзбекистон Республикаси Молия вазирлигига мурожаат қилинган.
Мазкур мурожаатга Молия вазирлигининг 2020 йил 9-октябрдаги ЕС 8724-сонли жавоб хати билан юқоридаги автотранспорт воситасини ўрнатилган тартибда сотиш ҳамда унинг ўрнига белгиланган лимит доирасида Солиқ органларини ривожлантириш жамғармаси маблағлари ҳисобидан бир дона Ўзбекистон Республикасида ишлаб чиқарилган “Нексия-3” русумли хизмат автомашинаси харид қилишга эътирози йўқлиги маълум қилинган.
Бироқ, Бошқарма томонидан Ўзавто дилери “Авто-центр-Қашқадарё” билан Бошқарма ўртасида 2020 йил 30-сентябрда тузилган 3-250-2020-1563UA-сонли шартномага асосан Equinox русумли автотранспорт воситаси харид қилинган.
Молия вазирлиги томонидан ўтказилган хизмат суриштирувига асосан, ижтимоий тармоқларда жойлаштирилган хат, хусусан, Сурхондарё вилоят Ғазначилигига тақдим этилган Молия вазирлигининг юқорида қайд этилган 2020 йил 9-октябрдаги ЕС 8724-сонли хати ўзгартирилганлиги, яъни ““Нексия-3” русумли” сўзлари чиқариб қалбакилаштирилганлиги аниқланди.
(Маълумот учун: ушбу хатда электрон тартибда жойлаштирилган QR коди сканер қилинганда хатнинг асл нусхасини кўриш мумкин.)
Юқоридагиларни инобатга олиб, ушбу ҳолат юзасидан Ўзбекистон Республикаси Бош прокуратурасига ваколати доирасида Молия вазирлигининг жавоб хатига ўзгартириш киритган мансабдор шахсларга нисбатан қонунчиликда белгиланган тартибда чоралар кўрилиши юзасидан ўрнатилган тартибда Молия вазирлигининг мурожаати йўлланди.
Таъкидлаб ўтиш жоизки, содир бўлган холатнинг ойдинлашуви, жамоатчилик, ОАВ вакилларининг фаоллиги, мамлакатимизда амалга оширилаётган очиқлик ҳамда шаффофлик сиёсатининг яққол ифодаси ҳисобланади
Молия вазирлиги
Ахборот хизмати