Ilment

Link: https://www.youtube.com/watch?v=Pl5WHJOKNVc&t=6210s&ab_channel=NewsbookMalta

Lil: Andrew Azzopardi, RTK
Kopja: Awtorità tax-Xandir, Università ta' Malta, Onor. Julia Farrugia Portelli bħala l-Ministru tal-Inklużjoni, Shadow Minister is-Sinjura Graziella Galea, il-President ta' Malta, Kollegi tal-Fakultà tas-Social Wellbeing

Prof. Azzopardi,

Qed nikteb sabiex uffiċjlament nilmenta dwar id-diskriminazzjoni u malizzja li ntenzjonalment u konxjament ħloqt matul il-programm tiegħek fuq RTK, illum is-Sibt 14 ta' Ottubru meta identifikajt lis-Sur Norman Lowell, mexxej tal-Partit Imperium Europa, kif ukoll l-aġenda tal-istess Partit bħala razzist/a, u ferm agħar, meta abbużajt mill-pożizzjoni tiegħek bħala xandar sabiex twassal l-opinjoni personali tiegħek bl-allaċjar ta' theddida ta' ċensura. Dan l-għaliex matul l-istess xandira, quddiem il-Kap Eżekuttiv tal-Awtorità tax-Xandir, inti liberament għidt li m'intix lest tistieden lis-Sur Lowell għal dan il-programm "jgħidu x'jgħidu". Din hija theddida pubblika li taf ukoll isservi ta' eżempju għal xandara oħra li jadottaw l-istess aġir diskriminatorju mħaddan minnek u dan bid-dikjarar qabel ħruġ ta' direttivi mill-Awtorità tax-Xandir.

Din ix-xandira ma tirrifletti ebda proporzjonalità, ma toħloq ebda bilanċ u kienet bla ebda dubbju mmirata sabiex timminaċċja fehma politika, għaldaqstant waħda li tmur kontra l-prinċipju tal-imparzjalità.

Filwaqt li qed nikkopja lill-Awtorità tax-Xandir f'dan l-ilment, bħala l-entità kostituzzjonali nkarigata bil-ħruġ u l-osservazzjoni ta' direttivi matul kampanji elettorali u wkoll bħala ġudikatur tal-ilmenti mressqa, qed tingħata tlett ijiem ċans sabiex inti tirrifletti dwar il-messaġġ tiegħek u tirrettifika d-dannu bl-istess aċċenn u enfasi li bih deliberament ħammiġt lill-Partit Imperium Europa u kasbart id-dritt tas-semmiegħ li jisma' fehmiet politiċi varji, bi ksur tal-proviżjonijiet tax-Xandir.

Qed ukoll nilmenta mal-Università ta' Malta fejn inti sservi bħala Professur tas-Social Wellbeing u allura fejn it-tema tal-inklużjoni hija waħda ċentrali. Ċertament li kummenti bħal dawn minn nies bħalek ma jagħmlu ebda ġid għall-inklużjoni politika u soċjali, id-demokrazija, t-trattament ugwali tal-Partiti Politiċi, kif ukoll meritament joħolqu mistoqsijiet serji fil-prattika edukattiva mħaddna minnek fl-Università ta' Malta, ir-relazzjoni tiegħek ma' dawk l-istudenti li jiżvelaw forom ta' qbil ma' kunċetti promossi mill-Partit Imperium Europa u/jew ma' prinċipji li inti oppost għalihom. Kull ħaddiem fiċ-ċivil għandu l-obbligu li jħares lejn iċ-ċittadin mill-istess lenti. Dan japplika ferm iżjed fuq ir-responsabbiltà tiegħek bħala Dean tal-Università fejn matul il-ħidma tiegħek suppost qed toħloq id-djalogu san, diskussjoni matura u l-promozzjoni tad-drittijiet ugwali. Dawn il-kwalitajiet kienu gravament mankanti fir-riżentiment espress illum, speċifikament intenzjonat sabiex ipoġġi lill-Partit Imperium Europa f'dawl ikrah u jappella għal forom ta'-ċensura kwalifikata u aċċettabbli.

Qed nikkopja wkoll lill-Ministru tal-Inklużjoni, l-Onor. Julia Farrugia Portelli kif ukoll lis-Shadow Minister is-Sinjura Graziella Galea l-għaliex nemmen li filwaqt li din it-tip ta' ċensura taf tibbenifika lill-partiti rispettivi tagħhom matul kampanja politika, madankollu s-sens komun, id-dett tar-raġuni u r-responsabbiltà tal-inkarigu tagħhom ċertament jgħarrfuhom li dawn il-manuvri huma ntollerabbli f'soċjetà demokratika.

Josiah Vella

Segretarju Ġenerali

Imperium Europa