Ихадоу атемақәа
Аԥсны атуристтә-информациатә центрқәа аԥҵахоит. Актәи ахәҭаҿы хԥа ҟалоит ҳәа иҳәеит атуризм аминистр Асҭамыр Логәуа. Аҟәатәи авокзал аԥышәатә ҭыԥны иҟалоит, егьырҭ ацентрқәа аартхоит аҳаирбаӷәазеи аушьҭра-агәаҭаратә ҭыԥ Ԥсоуи рҿы. Логәуа иазгәеиҭеит, аусбарҭа ас еиԥш ацентрқәа аус ахьыруа, насгьы аҭахра ахьрымоу Урыстәылатәи арегионқәа рԥышәа шрымнадаз. Апроект нагӡахоит аԥхын. Аԥсшьацәа атәыла ишаалалаз инаркны иаразнак официалтә дыррақәа роур рылшоит аҭыԥԥшӡарақәеи, амҩатә хырхарҭақәеи, аус зуа ахыбрақәа русура аамҭеи ирызкны.
Ашколқәранӡатәи ахәыҷқәа рзы аԥсышәала алакәқәеи ажәабжьқәеи реизга аҭыжьра иаздырхиоит лҳәеит Sputnik аинтервиу азҭаз Аҵара аминистрра ашколқәранӡатәи аҵарадырра аспециалист хада Аида Минаиаԥҳа. Арҵагатә цхыраагӡа шьақәгылоуп ахәыҷбаҳчақәа ирыҵаркуа ақәрақәа зегьы рзы адаптациа зызуу атекстқәа рыла. Уи адагьы хара имгакәа иҭыжьхоит аԥсуа мультфильмқәа реизга ҳәа адырра ҟалҵеит Минаиаԥҳа. "Аизга иагәылоуп аԥсшәахь еиҭагоуи Аԥсны иаԥырҵахьоу амультфильмқәеи зегьы. Аматериалқәа зегьы аелектронтә ныҟәгагақәа рҿы еизгахоит, уи ааӡаҩцәа зегьы рхы иадырхәо иҟалоит", — ҳәа инаҵшьны иазгәалҭеит лара.
Аетникатә хаҿра адырра Аԥсны аҿар рзы акрызҵазкуа факторуп ҳәа азгәалҭеит арадио Sputnik аефир аҟны асоциолог Мариа Филь. Изазҵааз 527-ҩык астудентцәа рҟынтәи 61,8% аидентификациатә ҷыдара даара аҵак ду шамоу азхарҵоит. 30% рҟынӡа уи реиҳа ихадоу ҳәа ирыԥхьаӡоит. Иара убри аҟара иазгәарҭеит егьырҭ асоциалтә рольқәа инарываргыланы аетникатә хаҿра аҵак ду шамоу. "Егьырҭ асоциалтә рольқәагьы акыр рыҵаркуеит, аха аетникатә хаҿра ахатәиндентификациа афактор хадақәа ргәыцә иахәҭакуп", – ҳәа лажәа хлыркәшеит Филь.
Петербург амаҵура ду змаз урыстәылатәи аруаҩ иганахь ала атеракт аԥырҟәҟәаауп. Киев агентцәа ҩыџьа аруаҩ имашьына арҭҟәацга аҵарҵеит ҳәа рҳәеит Урыстәыла АШәМ аҿы. Ацәгьа зуз аанкылоуп, дара рҿы рықәшаҳаҭхеит рхала украинатәи амаҵзура ҷыдақәеи дареи рышәҟәеимдараан атеракт амҩаԥгара ишазыхиоу атәы шрарҳәаз. Иаанкылоу аруаҩ иҭыӡҭыԥ еилыркааит, аҵәахырҭа ҭыԥ аҟынтәи арҭҟәацга имашьына аҵа иаҵарҵеит. Арҭҟәацга АШәМ аусзуҩцәа еиҵырхит.
Ахыҵхырҭа: https://sputnik-abkhazia.info