Расмий муносабат. «Nuz.uz» интернет нашрида эълон қилинган хабар юзасидан. Журналистга нисбатан ҳеч қандай тазйиқ ўтказилмаган

Мазкур ҳолат юзасидан терговга қадар текширув ҳаракатлари олиб борилмоқда.

Кеча, 7 октябрь куни соат тахминан 11:00ларда Қибрай тумани «Алишер Навоий» МФЙ А.Навоий кўчаси 31-уйда жойлашган “Т.А.Ф” якка тартибдаги тадбиркорга қарашли (етказиб бериш хизмати орқали фаолият юритган, аммо шу куни ишламаган) “Балиқ ошхонаси” олдидаги 2 туп ёнғоқ дарахтини ҳеч қандай меъёрий ҳужжатлар (рухсатнома)сиз кесаётган вақтида фуқаро (журналист) Абу-Али Ниязматов келиб ўзининг уяли алоқа воситаси ёрдамида facebook ижтимоий тармоғига тўғридан тўғри (жонли эфир тарзида) видео тасвирга олган.

Шунда, хонадон эгаси Зулхумор А. ундан ким эканлиги ва ўзини таништиришни, нима сабабдан тасвирга олаётганини сўраган. Уларнинг ўзаро суҳбати давомида оғзаки жанжал келиб чиққан ва фуқаро Абу Али Зулхуморни ҳақоратлаган.

Шундан сўнг, фуқаро Зулхумор А. мазкур МФЙ профилактика инспектори катта лейтенант Азиз Амировга телефон орқали мурожаат қилиб, воқеани баён қилган ва ушбу фуқаро (А.Ниязметов)га нисбатан тегиш чора кўришни сўраган. Мазкур мурожаат туман ИИБ томонидан рўйхатдан ўтказилган ва терговга қадар текширув ҳаракатлари бошланган.

Шунингдек, ҳолат юзасидан воқеа жойига етиб келган Ўзбекистон Республикаси Экология ва атроф муҳитни муҳофаза қилиш давлат қўмитаси ходимлари томонидан, содир этилган маъмурий ҳуқуқбузарлиги учун хонадон эгасига нисбатан МЖтКнинг 79-моддаси 1-қисми билан маъмурий чора кўрилган. Унга кўра 1 миллион 115 минг сўм миқдорда жарима ҳамда ўсимлик дунёсига зарар етказганлиги учун 26 миллион 760 минг сўм устама тўлов белгиланган.

Ҳозирда юқоридаги ҳолат юзасидан Қибрай туман ИИБ томонидан тўпланган ҳужжатлар асосида терговга қадар текширув ҳаракатлари олиб борилмоқда. Батафсил ахборот берилади.

Изоҳ: Ҳудудий профилактика инспектори катта лейтенант Азиз Амировга кўра, дастлабки суруштирувлар давомида ушбу ҳолатда хабарда келтирилгани каби фуқаролар Ниязматовни хонадонда ушлаб турмаган ёки унга нисбатан ҳеч қандай тазйиқ ёки жароҳат етказилмаган. Аксинча, унинг ўзи аёлни ҳақорат қилгани ва ички ишлар ва экология ходимлари келгунига қадар шу ерда бўлиши айтиб, уйдан чиқмаганлиги аниқланган. Шунингдек, воқеада иштирок этган гувоҳлар ҳам ўз тушунтириш хатларида ушбу жараён юқорида қайд этилгани каби бўлганини ёзма равишда баён қилган.

Ҳолатга тўлиқ ойдинлик киритиш юзасидан маъмурий бинога таклиф қилинган воқеа иштирокчилари, хусусан, фуқаро (журналист) А.Ниязметовга нисбатан ҳеч қандай куч ишлатиш ёки бошқа ҳолат бўлмаган. У менинг (профилактика инспектори) таклифимга асосан ҳудудий бўлимга борган. Буни бир нечта гувоҳлар тасдиқлайди.

ИИББ Ахборот хизмати