Карантин чекловлари қатъий назоратда. 3 500 яқин карантин қоидаларини бузиш ҳолатлари аниқланиб, чора кўрилди

Ҳозирги кунда Тошкент вилояти ИИББнинг 1 минг 500 зиёд ходимлари карантин тадбирларига жалб қилинган бўлиб, туну кун хизмат олиб бормоқда.

Бугун, 31 май кун ўтказилган тадбирлар давомида фуқаролар томонидан карантин қоидаларини бузиш билан боғлиқ 1 722 та ҳолат қайд этилган бўлса, кеча 30 май куни 1 476 та ҳолат қайд этилган.

Шунингдек, икки кун давомида 3 113 нафар фуқаролар карантин қоидаларини бузмаслик юзасидан расмий огоҳлантирилган.

Бугунги аниқланган ҳолатларнинг 400 га яқини Зангиота ва Қибрай туманлари ҳамда Ангрен шаҳрига тўғри келса, кечаги кунга ҳам Зангиота ва Қибрай туманлари ҳамда Чирчиқ шаҳри билан бирга 380 дан ортиқ ҳолатлар тўғри келади.

Яна шуни алоҳида қайд этиш керакки жорий қилинган карантин тадбирлари биринчи навбатда ҳайдовчиларнинг ўзлари, қолаверса ҳар бир фуқаро саломатлиги учун бўлса, афсус буни ҳали ҳануз тушунмаётганлар кўпчиликни ташкил этмоқда.

ИИББ ЙҲХБ инспекторлари томонидан биргина бугунинг ўзида 141 нафар ҳайдовчи томонидан карантин қоидаларини бузиш аниқланган бўлса, кеча 108 та бўлган. Транспорт воситасини ҳужжатсиз бошқариш бўйича бугун 463 та, кеча 265 та ҳолат аниқланган. Шунингдек, транспорт воситасини маст ҳолда бошқариш билан боғлиқ бугун 7 та кеча 15 та ҳолат аниқланган. Шу ва бошқа турдаги қоидабузарликлар билан карантин тадбирлари бошидан ҳозирги кунга қадар 15 560 та автотранспорт воситалари жарима майдонига жойлаштирилган.

Барча аниқланган қоидабузарликлар юзасидан қонунда белгиланган тартибда чора кўрилган.

Шунингдек, эрта 1 июнь кунидан бошлаб, Тошкент вилояти ИИББ ва ҳамкорликдаги ташкилотлар вакилларидан тузилган махсус гуруҳ томонидан карантин қоидаларига амал қилиш юзасидан, «қизил» тоифага киритилган ҳудудларда кучайтирилган рейд тадбирлари ўтказилади.

Ҳурматли фуқаролар! Ўрнатилган чекловлар ва қоидаларга амал қилишингиз ўзингиз ва яқинларингиз, қолаверса ҳар бир фуқаро соғлигининг гаровидир. Карантин қоидаларига қатъий амал қилинг.

ИИББ Ахборот хизмати