Хайрлашолмай кетган "Саша"

@sabitov_uz

Ўтган асримизнинг 80-86-йилларида футболимиз учун яхши авлод вакиллари дунёга келган. Игнатий Нестеров, Илҳом Суюнов, Ислом Иномов, Александр Гейнрих, Жасур Ҳасанов, Марат Бикмаев, Иляс Зейтуллаев, Камолиддин Тожиев, Илдар Магдеев ва ҳ.к. Айнан ушбу авлод вакиллари Ўзбекистон терма жамоаларини илк бор мундиал сари етаклаган эди. 2003 йилги БААда ўтказилган мундиал Ўзбекистон футболи учун биринчиси бўлди ва у ерда ўзбек футболининг янги юлдузи порлашни бошлаганди. Антиқа ва ҳимоячиларнинг тушларига ҳам кирмайдиган ҳаракатлар соҳиби бўлган, йиллар давомида ностандарт қарорлар эгаси бўлиб келган, Александр Гейнрих - футболимиз учун жонидан бошқа барча нарсасини берди.

2000-йилларнинг бошларида Москванинг ЦСКА клуби бизнинг "Саша"га қизиқиб қолганди. Сабаби, у ўз голлари билан Ўзбекистон ёшларини ЖЧ сари етаклади, бош жамоага ҳам жалб этила бошланди. ЖЧнинг биринчи турида Мали терма жамоаси дарвозасига гол урган Гейнрих - иккинчи турда жарима зарбасидан Аргентина дарвозасига урган супер-космик голи ФИФАнинг 21 ёшгача бўлган ЖЧларидаги энг чиройли голлари кетма-кетлигида турибди.

2002-йилги мавсумда Пахтакор сафида 23 ўйинда 9 бор рақиб дарвозасини ишғол этди ва жамоаси билан Ўзбекистон чемпиони бўлди. Шу тариқа, 18 ёшли ҳужумчини руслар "ўз армия-клуби"га олиб кетишди. Шартнома 3 йилга тузилган бўлса-да, руслар "Саша"нинг имкониятларига паст баҳо беришди. 2003 йилги мавсумда атиги 2 бор майдонни кўрган ҳужумчи, фақатгина вице-чемпион "Зенит" дарвозасини аниқ мўлжалга олганди. Омадсиз "сафар"дан сўнг, "Саша" яна "Пахтакор"да кўриниш бера бошлади. 2005-йилги мавсум унинг учун ўртамиёна даражада ўтди: 12 ўйин 5 гол.

Осиё ўйинлари-2006. Гейнрих ўзининг иккинчи ёшлигини ўтказган учрашувларни ҳали ҳам хотирлаймиз. Ўзининг чиройли голлари билан у ҳамон сифатли голеадор эканлигини Қатар майдонларида барчага исботлаб бераётганди.

Гуруҳ ўйинларини БААга қарши ўйин билан бошлаган вакилларимиз 2-1 ҳисобида ғалаба билан якунлашади. Иккала голни ҳам Александр урганди. Иккинчи турда мусобақа мезбонлари ҳисобланган қатарликларни ҳам қаҳрамонимизнинг ягона голи эвазига енггандик. Расмиятчилик учун кечган учинчи турда ҳам Саша гол киритиб, барчанинг ёқимтойига айланиб олганди. Чорак финал босқичида ўша даврларда ўзининг олтин авлодини шакллантираётган Ироқ терма жамоаси бизга рақиблик қилди. Мураккаб кечган баҳсда Гейнрихнинг биргина голи терма жамоамизнинг кейинги босқичга йўл олишига етмади. 95-дақиқада ироқлик Мансур бизни уйимизга жўнатиб юборгувчи голни киритган эди.

Кейинги мавсумларда "Торпедо" (Москва) сафида 21 ўйинда бирортаям гол ура олмаган футболчини "Пахтакор" яна "қучоқ очиб" кутиб олади. Пахтакордаги 4 йиллик фаолияти давомида Олий Лиганинг 1 та олтин, 3 та кумуш, 1 та бронзасини ўзиники қилган Гейнрих, 2 бор Ўзбекистон кубогида ҳам зафар қучишга эришади.

Яна Гейнрих - яна Қатарда! Абрамовнинг топқирлиги ва футболчиларнинг нафақат жисмоний, балки, психологик имкониятларини чизғичсиз ўлчай олиши - Осиё Кубоги-2011 мусобақасида кўпчилик футболчиларимизни порлатиб юборди. Шу қаторда, Александр Гейнрих 5 йил аввал Қатарда ўтказилган Осиё ўйинларидаги сермаҳсуллик ва шедеврни ўзида қайта уйғота олганди. Гуруҳ ўйинларида тезкор ва чиройли ўйин кўрсатган миллий терма жамоамизнинг ҳужум ва плеймейкерлик зоналарида тиним билмайдиган, гоҳ йиқилиб, гоҳ думалаб, гоҳ бақириб, баъзан кутилмаганда тўпни тепиб қоладиган Гейнрих билан тўлдирилганди. Хитойга киритган супер голини ҳамон кўриб завқ оламиз. Унинг ўзгача гол нишонлашлари жамоа руҳига руҳият қўшарди.

3-ўрин учун Жанубий Корея билан кечган баҳсда биринчи бор хизмат кийимисиз "жанг қилган аскарни" кўргандим. Гейнрих ўша ўйинда Ўзбекистон 0-6 дан кейин ҳам футбол ўйнай олишини, Осиёда ҳали айтар сўзи борлигини корейсларга чиройли қилиб тушунтириб берганди. Корейс менталитетига доим ана шундай "жангчи" футболчилар ҳуш ёққани сабабли, қитъа биринчилигидан сўнг, Сашамизни ўз Сувонларига олиб кетишганди.

Яқин ўтмиш. Яқин-яқингача терма жамоамиз ўйинларида энг муҳим фигура бўлиб келган, Яман-у Сурияларга голлар уриб, мухлисларга қувонч улашган Сашани барча яхши кўради. Ўйин қовушмай, ҳаракатлар бесамар кўринаётган паллада, бутун стадион бўлиб, "Саша", "Саша", Саша", деб бақириб, мураббийдан уни сўраганларимизни эслайлик. У ўзбек футболига керагидан кўпини берди. У ўзбеклар учун ўйнади, футболимиз учун, Ватанимиз учун жонидан бошқа барчасини берди. У майдонда томошалар кўрсатишга уста эди. Лекин, унинг хайрлашиши учун шоу қилиб бера олмадик: сиз-у биз билан хайрлашолмай кетган "Саша".

Гейнрих иштирокидаги Сиз кўрмаган фотоларни тақдим этишга қарор қилдик: