Фарғоналик “фолбин” ўз келажагини олдиндан кўра олганида эди...

Фарғонада ўзининг фолбинлигига бошқаларни ишонтириб, 67 миллион сўмликдан ортиқ мулкини қўлга киритган шахс фирибгарлик жиноятини содир этишда айбланмоқда.

Бу ҳақда вилоят ички ишлар бошқармаси матбуот хизмати хабар бермоқда.

Қўқон шаҳрида яшовчи фуқаро Т.М хавфли рецидивист бўлгани ҳолда 2018 йил 15 август куни ўзганинг мулкини алдаш ва ишончни суиистеъмол қилиш йўли билан қўлга киритиш мақсадида Данғара туманида яшовчи фуқаро Х.Онинг яшаш хонадонида келиб, унинг фарзанди Х.Б “эскича” дан касал бўлиб қолганлигини айтган.

Унга гўёки ўзини “эскича” дан тузатадиган инсон, фолбин эканлигини, ўғлини дуолар ўқиб соғайтириб юборишига ишонтириб, шу йўл билан уни алдаб, Х. Одан 5 минг 500 доллар ҳамда 18 миллион 780 минг сўм пул маблағларини, шунингдек, нархи 2 миллион 200 минг сўмлик 1 жуфт сирға ва узук, нархи 600 минг сўмлик бир жуфт аёллар сирғаси, 2 дона нархи 700 минг сўмлик комплект узук, 1 дона нархи 500 минг сўмлик эркаклар никоҳ узуги каби тилло тақинчоқлари жами 67 миллион 805 минг сўмдан ортиқ қийматдаги мулкини қўлга киритиб, ўзининг шахсий эҳтиёжлари учун сарфлаб, талон-тарож қилган.

Бундан ташқари, Т.М жиноий ҳаракатларини давом эттириб Х.Они ўғли Х.Б жиноят содир этиб, ҳуқуқни муҳофаза қилувчи орган ходимлари томонидан ушланганлигидан хабар топиб, 2018 йил октябрь ойининг ўрталарида Х.Одан фирибгарлик йўли билан қўлга киритган пул ва тилло тақинчоқларни қайтариб бермаслик режасини тузган. Х. Бнинг содир қилган жинояти натижасида Данғара тумани ИИБ ходимлари яшаш уйида тинтув ўтказдириб, Х.Ога ундан олган пул ва тилло тақинчоқларни яшаш уйидан Данғара тумани ИИБ ходимлари ашёвий далил тариқасида олиб, пул ва тилло тақинчоқлар Данғара тумани ИИБда сақланаётганлигини, ушбу пул ва тилло тақинчоқларни олишга ИИБда ишловчи қариндоши орқали ёрдам беришлигини айтиб, ёлғон гапларига ишонтириб, Х.Они қонунга хилоф эканлигини била туриб, мансабдор шахсга пора беришга далолат қилиб, ундан 300 долларни қўлга киритиб, фирибгарлик йўли билан эгаллаб олган пулларини ўзининг шахсий эҳтиёжлари учун сарфлаб, талон-тарож қилган.

Мазкур жиноят иши бўйича Т. Мга нисбатан Ўзбекистон Республикаси Жиноят Кодексининг 168-моддаси 3-қисми “ а,б” бандлари ва 28, 211-моддаси 1-қисми билан жиноий иш қўзғатилиб, судга юборилди.

Манба: ЎзА

"Ҳуқуқ олами" каналига уланиш учун линкни босинг👇👇 https://t.me/joinchat/AAAAAE_2IK9N02cf7bK96g