Энг муҳими – омад!

Йирик сиёсатчи ва давлат арбоби Уинстон Черчилл кимгадир тилак билдираётганда: «Мен саломатлик ёки давлат тилаш ўрнига фақатгина омад тилашни маъқул кўраман» дерди. Агар чуқур мулоҳаза юритадиган бўлсак, бу бир жиҳатдан тўғри. Ахир «Титаник» кемасида бўлганларнинг аксарияти соғлом ва бадавлат бўлишган. Улардан жуда камчилигига омад кулиб боқиб, фалокатдан омон қолишган. Балки эшитгандирсиз, йирик компаниялардан бирининг раҳбари ўғлини биринчи марта болалар боғчасига ўзи олиб боришга қарор қилгани учун 11 сентябрь куни Нью-Йоркда содир этилган ҳужумдан қутулиб қолган. Яна бир йигит таом олиб келиш навбати унга етгани сабабли тирик қолган. Бир аёл эса соат қўнғироғи жирингламагани учун ишга кечиккан. Кимдир Нью-Жерси автострадасидаги тирбандликда қолиб кетган. Бошқа бири эса автобусга ета олмаган.

Шундай экан, ҳаёт йўлида содир бўлаётган баъзи кичик, нохуш ва кўнгилсиз ҳолатлардан дарров умидсизликка тушманг, аччиқланманг ва кайфиятни туширманг. Ўйлаб кўринг, балки тақдир бу билан қайсидир ҳолатнинг олдини олгандир. Сизни ҳимоя қилишга урингандир. Ҳаётингизда содир бўлаётган ҳар бир ҳодисани яхшиликка йўйишга одатланинг, ният ва ўй-ҳаёлларингиз фақат ижобий тарафга йўналишига аҳамият қаратинг. Ҳар бир ҳолат ва фурсатни янги имконият сифатида қабул қилинг. Ҳаётда ҳеч бир воқеа-ҳодиса бежиздан юз бермайди...

Гулчеҳра АЗИМОВА тайёрлади.