Экспертизадан ўтказилган қонунчилик ҳужжатларининг 243 тасида 350 та коррупциявий омил аниқлаган

Бу ҳақда АОКАда Адлия вазирлиги бошқарма бошлиғи Фурқат Тожиев, вазирлик департамент бошлиғи ўринбосари Дилафрўз Сўфиева иштирокида ўтказилган матбуот анжуманида маълум қилинди:

✔️ 2022 йил давомида ижтимоий ҳимоя, молия ва банк, тадбиркорлик, ташқи иқтисодий фаолият ҳамда божхона ишига оид 1 860 та қонунчилик ҳужжатлари коррупцияга қарши экспертизадан ўтказилган.

Экспертиза натижаларига кўра, 243 та ҳужжатда (13 фоиз) ёки экспертизадан ўтказилган жами ҳужжатларда 350 та коррупциявий омил аниқлаган.

Давлат органлари ва ташкилотлари томонидан 293 та лойиҳа коррупцияга қарши экспертизадан ўтказилиб уларда коррупциявий омиллар аниқланмагани тўғрисида маълум қилинган бўлса-да, ушбу лойиҳалар Адлия вазирлиги томонидан экспертизадан ўтказилганда уларда 457 та коррупциявий омиллар аниқланган.

Тартибга солиш таъсирини баҳолаш Ўзбекистон қонунчилиги учун янги институт эканлигига тўхталиб мазкур тизим орқали муаммони ҳал қилишнинг муқобил усуллари ўрганилиши, улар қандай харажат ва оқибатларга олиб келиши таҳлил қилиниши шунингдек, амалдаги ҳужжатларнинг самарадорлиги ва натижадорлиги баҳоланиши таъкидланди.

Вазирлик томонидан ўтган йилда 280 та лойиҳалар ҳамда 18 та амалдаги қонунчилик ҳужжатлари тартибга солиш таъсирини баҳолашдан ўтказилган.

Мазкур жараён давомида лойиҳаларнинг 136 таси уни ишлаб чиққан вазирлик ва идоралар томонидан тартибга солиш таъсирини баҳолашдан ўтказилмаганлиги, 144 таси бўйича тўлдирилган ҳисоботлар талаб даражасида эмаслиги аниқланиб тегишли хулосалар берилган.

Шунга кўра тизимни самарали йўлга қўйиш бевосита кадрлар салоҳиятига боғлиқлиги учун Адлия вазирлиги масъул ходимлари билан бир қаторда бошқа вазирлик ва идораларнинг ходимларини ҳам ушбу йўналишдаги малакасини ошириш зарурати борлиги айтиб ўтилди.

Бундан ташқари, амалдаги қонунчилик ҳужжатларини тартибга солиш таъсирини баҳолашдан ўтказиш натижаларига кўра 13 та ҳужжатни такомиллаштиришга қаратилган 46 та таклиф ишлаб чиқилган.

Ўтган давр мобайнида тадбиркорлик фаолиятига оид қонунчилик ҳужжатлари ва лойиҳалари тартибга солиш таъсиини баҳолашдан ўтказилган бўлса эндиликда инсон ҳуқуқлари ва экологияга таъсири мавжуд амалдаги ҳужжатлар ва лойиҳалар ҳам тартибга солиш таъсиини баҳолашдан ўтказилади, шунингдек “коррупциядан холи қонунчилик”ни яратиш мақсадида 2026 йилга қадар амалдаги 21 мингга яқин қонунчилик ҳужжатлари коррупцияга қарши экспертизадан ўтказилиши таъкидланди.