ЭНЕРГЕТИКА ВАЗИРЛИГИ ХИТОЙНИНГ ИПАК ЙЎЛИ ФОНДИ БИЛАН ҲАМКОРЛИКНИ РИВОЖЛАНТИРМОҚДА

Жорий йилнинг 22 октябрь куни Ўзбекистон Республикаси Энергетика вазирлигида жаноб Ван Яньчжи бошчилигидаги Ипак йўли жамғармаси (Хитой) делегацияси билан бўлиб ўтган учрашувда ўзаро ҳамкорликнинг бугунги ва истиқболда ривожлантириш масалалари муҳокама қилинди.

Ҳамкорликда нефть ва газ соҳасидаги лойиҳаларни амалга ошириш учун "Ўзбекнефтгаз" АЖ ва Хитой томони, биринчи навбатда, Ипак йўли жамғармаси вакили тимсолида  жорий йилнинг июль ойида эквивалент миқдори 585 миллион долларга тенг бўлган кредит шартномаси имзоланган эди. 

Октябрь ойи ўрталарида ҳамкорлик фаолияти доирасида биринчи молиявий транш амалга оширилди ва ушбу учрашув давомида эришилган келишувларни келгусида амалга ошириш масалалари муҳокама этилди.

Шунингдек, учрашувда инвестиция лойиҳаларини молиялаштиришни ташкил этиш бўйича таклифларни биргаликда тайёрлаш билан биргаликда энергетика саноатининг барча соҳаларида ҳамкорликни кенгайтириш масаласи кўриб чиқилди.

Таъкидлаш жоиз, Ипак йўли жамғармаси инфратузилма лойиҳаларини қўллаб-қувватловчи, савдо ҳамкорлигини ривожлантиришга ёрдам берадиган ва "Бир камар, 21-асрнинг бир йўли" ташаббуси доирасида молиялаштириладиган Хитой инвестиция фондидир.

  Ушбу махсус жамғармани ташкил этиш таклифи 2014 йил 8 ноябрда ХХР раиси Си Цзинпин томонидан АТЭС раҳбарлари саммити арафасида бўлиб ўтган «Ўзаро ҳамкорлик алоқаларини мустаҳкамлаш» форумида билдирилган эди.

Жамғарманинг умумий капитали тахминан 40 миллиард долларни ташкил этади.

Ўзбекистон Республикаси Энергетика вазирлиги

матбуот хизмати