ЭНЕРГЕТИКА СОҲАСИДА ЯНГИ ҚОНУН, БОЗОР МОДЕЛИ ВА ЭЛЕКТР ТАРМОҚЛАРИ ТЎҒРИСИДАГИ КОДЕКС ИШЛАБ ЧИҚИЛМОҚДА

ЭНЕРГЕТИКА СОҲАСИДА ЯНГИ ҚОНУН, БОЗОР МОДЕЛИ ВА ЭЛЕКТР ТАРМОҚЛАРИ ТЎҒРИСИДАГИ КОДЕКС ИШЛАБ ЧИҚИЛМОҚДА

https://t.me/minenergy_uz

Ўзбекистонда «Электр энергетикаси тўғрисида»ги қонуннинг янги таҳрири устида иш олиб борилмоқда. Бу эса, мамлакатда Энергетика вазирлиги томонидан халқаро тажрибанинг энг яхши жиҳатларини жалб этган ҳолда амалга оширилаётган ислоҳотларидан биридир.

Хусусан, янги қонун лойиҳасини ишлаб чиқиш борасидаги ишлар Энергетика вазирлиги ҳамда Европа тикланиш ва тараққиёт банки билан ҳамкорликда амалга оширилмоқда. Бу ишга Буюк Британия, Грузия, Австрия, Болгария ва Италия мамлакатларидан экспертлар, шунингдек қонун ижодкорлиги борасида катта тажрибага эга бўлган юқори малакали мутахассислар жалб этилган.

Янги қонун 2020 йил май ойининг охирида Ўзбекистон Республикаси Вазирлар Маҳкамасига кўриб чиқиш учун тақдим этилиши кутилмоқда.

Шунингдек, Энергетика вазирлиги Осиё Тараққиёт банки ва Жаҳон банки билан биргаликда 2023 йилда жорий этилиши кутилаётган рақобатдош электр энергияси бозори моделини ишлаб чиқиш бўйича иш олиб боряпти. Осиё Тараққиёт банки ва Жаҳон банки таркибида электр энергетикаси соҳасини ислоҳ қилиш бўйича кўп йиллик назарий ва амалий тажрибага эга бўлган халқаро экспертлар - Грузия, АҚШ ва Туркия давлатларининг маслаҳатчилари иштирок этади.

Энергетика вазирлиги ҳузуридаги Лойиҳа гуруҳи мутахассислари, шунингдек халқаро экспертлар ва маслаҳатчилар бозорнинг истиқболли моделлари ва бозор муносабатларига ўтиш усулларини ўрганмоқдалар. Электр энергияси бозори модели ва бозор муносабатларига ўтиш Концепцияси жорий йилнинг март ойининг охирига қадар Вазирлар Маҳкамасига тақдим этилиши кутилмоқда.

Шунингдек, Энергетика вазирлиги томонидан Жаҳон банки билан биргаликда ишлаб чиқилган Электр тармоқлари кодексини (Grid Code) ислоҳотларнинг яна бир босқичи, дейиш мумкин. Бу ишга Сербия ва Буюк Британия мамлакатларининг халқаро маслаҳатчилари ҳам жалб этилган. Электр тармоқлари кодексининг амалга оширилиши бизга энергия компаниялари ва электр энергияси истеъмолчиларининг функциялари, ҳуқуқлари ва мажбуриятларини тизимлаштириш ва аниқлаштириш имконини беради. Режага кўра, Grid Code лойиҳаси ҳукуматга жорий йилнинг май ойи охирида тақдим этилади.


Ўзбекистон Республикаси Энергетика вазирлиги Матбуот хизмати