Дунёнинг йирик нефт ва газ компаниялари.
PTT Public Company (บริษัท ปตท. จำกัด)
Таиланднинг энг йирик компанияларидан бири бўлиб, дунёдаги энг йирик йигирма нефт ва газ компанияларидан бири ҳисобланади. Ушбу компания нефт ва табиий газни қидириш, қазиб олиш, ташиш ва қайта ишлаш, кўмир қазиб олиш ва импорт қилиш, транспорт қувурларни ётқизиш ва техник хизмат кўрсатиш (Таиланд кўрфази туби бўйлаб ётқизилган, сув ости газ қувурларини ҳам ўз ичига олади) билан шуғулланади. Ёқилғи, мойлаш материаллари ва электр энергияси ишлаб чиқариш билан бирга, ёқилғи қуйиш шохобчалари тармоғига ҳам эгалик қилади.
Компания 1978 йилда ташкил этилган. PTT компанияси акцияларининг назорат пакети Таиланд ҳукуматига тегишли бўлиб, Таиланд фонд биржасида рўйхатга олинган. Бош қароргоҳи Бангкок шахрида жойлашган. PTT компаниясининг қўшма корхоналари Канада, АҚШ, Жазоир, Миср, Австралия, Янги Зеландия, Бразилия, Гонконг, Сингапур, Индонезия, Ветнам, Лаос, Бруней, Уммон, Голландия, Франция, Мозамбик ва Филиппинда жойлашган. 1978 йилда компания Таиланд нефт идораси (Petroleum Authority of Thailand) сифатида ташкил этилган. 1980 йилда PTT компанияси 1961 йилда ташкил этилган "Thai Oil" йирик нефт компаниясининг 49 фоизини сотиб олди.
1985 йилда нефт ва газни (шу жумладан чет элда) қазиб олиш ва қайта ишлаш билан шуғулланадиган PTT Exploration and Production компанияси, 2011 йилда эса PTT Global Chemical нефт-кимё компанияси ташкил этилди. Сўнгги йилларда РТТ компанияси қайта тикланадиган ва тоза энергия манбаларига, шу жумладан қуёш электр станциялари ва шакарқамишдан этанол олишда, биологик пластика соҳасини ривожлантиришда сармоя киритмоқда. PTT компанияси Таиландда бешта нефтни қайта ишлаш заводига, бир нечта нефт-кимё заводларига, газ терминалларига ва мамлакатдаги энг йирик ёқилғи қуйиш шохобчалари тармоғига эгалик қилади.
Нефтни қайта ишлаш соҳаси Thai Oil, PTT Global Chemical, Star Petroleum Refining Company вa Bangchak Petroleum, нефт ва газ қазиб олиш соҳасида - PTT Еxploration and Production, нефткимё соҳасида- PTT Global Chemical, IRPC, HMC Polymers Company, PTT Polymer Logistics Company, PTT Fenol Company va PTT Asahi Chemical Company каби таркибий бўлинмаларга бўлинади.
РТТ компаниясининг Индонезияда кўмир қазиб олиш ва палма ёғи ишлаб чиқариш, Лаосда эса гидроэлектроэнергетика ихтисослашган бўлинмалари ҳам мавжуд.
PTT компаниясининг асосий таркибий бўлинмаларидан ташқари қуйидаги шўъба корхоналари ҳам мавжуд.
Sakari Resources
Andaman Transportation
JV Marine
Asia Pacific Marine Services
JV Shore Base
Shore Air
Orange Energy
Cove Energy
Myriant Corporation
Thai Tank Terminal
Vencorex Holding
2009 йилда Тимор денгизидаги РТТ бурғулаш платформасида нефт тўкилиши натижада, атрофдаги сувлар сезиларли даражада ифлосланди. 2013 йилда Таиланд кўрфазидаги РТТ нефт тўкилиши натижасида бир неча пляжларни ифлосланади. Ҳозирги кунда компаниянинг ишчи-ходимларининг сони 60000 дан ошиқ бўлиб, компания нефт ва газни қазиб олиш ва қайта ишлаш бўйича Эрон, Қатар, Россия, Япония, Италия, Германия каби давлатлар билан ҳамкорликда лойиҳаларни амалга ошириб келмоқда.
Мақола интернетдан олинган маълумотлар асосида тайёрланди.
Шўртан газ кимё мажмуаси. @sgcc_uzb