Дори воситаларининг клиник тадқиқотларини ривожлантириш маркази ташкил этилади

Бу ҳақда АОКАда ўтказилган брифингда Фармацевтика тармоғини ривожлантириш агентлиги ахборот хизмати раҳбари Қизлархон Бегматова маълум қилди.

Ўзбекистон Республикаси Президентининг “2022-2026 йилларга мўлжалланган Янги Ўзбекистоннинг тараққиёт стратегияси тўғрисида” 2022 йил 28 январдаги ПФ-60-сон Фармони билан тасдиқланган “2022-2026 йилларга мўлжалланган Янги Ўзбекистоннинг тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастури” доирасида Фармацевтика тармоғини ривожлантириш агентлиги томонидан ўтган давр оралиғида қуйидаги ишлар амалга оширилди.

Ҳусусан 85.5-бандида белгиланган “Республика ҳудудида клиник тадқиқотларни ривожлантириш ҳамда клиник базаларни жаҳон стандартлари асосида модернизация қилиш” вазифаси ижроси бўйича Ўзбекистон Республикаси Вазирлар Маҳкамасининг 2022 йил 14 апрелдаги “Дори воситаларининг клиник тадқиқотларини ривожлантириш ҳамда уларнинг халқаро стандартлар талабларига мувофиқ ўтказилишини ташкил этиш чора-тадбирлари тўғрисида”ги 181-сон қарори қабул қилинди.

Мазкур қарорга мувофиқ, «Tashkent Pharma Park» инновацион илмий-ишлаб чиқариш фармацевтика кластери ҳудудида давлат муассасаси шаклидаги Дори воситаларининг клиник тадқиқотларини ривожлантириш марказини ташкил этиш белгиланди.

Марказга тиббий, клиник ва лаборатория жиҳозлари билан таъминлаш учун Корея Эксимбанки жамғармаси кредитлари йўналтирилади. Лойиҳанинг қиймати 125 млн. долл. (EDCF фонди – 105 млн. долл, Ўзбекистон томонидан – 20 млн. долл.) миқдорни ташкил этади. Марказни ишга туширилиши натижасида 250 та янги иш ўринлари яратилади.

     Марказ қуйидаги вазифаларни амалга оширишга хизмат қилади:

·        дори воситаларининг клиник тадқиқотларини халқаро этик ва илмий стандартлар талабларига мувофиқ ташкил этишни жорий этиш;

·        республика ҳудудида клиник тадқиқотларни ривожлантириш ҳамда клиник базаларни жаҳон стандартлари асосида модернизация қилишни мувофиқлаштириш;

·        «Зарур клиника амалиёти (GCP)» талабларига мувофиқ дори воситаларининг клиник тадқиқотларини ўтказишни ташкил этиш;

·        женерик дори воситаларининг оригинал дори воситаларига фармакологик биоэквивалентлигини аниқлаш;

·        клиник тадқиқот субъектида дори воситаларининг фармакокинетик тадқиқотларини ўтказиш;

·        тиббиёт ходимларининг клиник тадқиқотлар ўтказиш соҳасида малакасини ошириш;

·      «Зарур клиника амалиёти (GCP)» йўналишида халқаро ҳамкорликни амалга ошириш.

Таъкидлаб ўтамиз, Ўзбекистон Республикаси Президентининг “2022 — 2026 йилларда республиканинг фармацевтика тармоғини жадал ривожлантиришга оид қўшимча чора-тадбирлар тўғрисида” 2022 йил 21 январдаги ПФ-55-сон Фармони билан дори воситаларининг клиник тадқиқотларини соғлом кўнгиллиларда ўтказишга чеклов бекор қилинган.

«Tashkent Pharma Park» инновацион илмий-ишлаб чиқариш фармацевтика кластери ҳудудида ташкил этилаётган Дори воситаларининг клиник тадқиқотларини ривожлантириш марказида кўнгилли беморларда янги турда яратилган янги авлод дори воситаларининг клиник тадқиқотлари амалга оширилади.  

Республикамизда бугунги кунда 89 та клиник тадқиқот базалари фаолият юритиб келмоқда. Қарорга биноан мазкур клиник тадқиқот базалари 2026 йилга қадар босқичма-босқич халқаро аккредитациядан ўтказилади.

Шу ўринда, соҳада фаолият юритаётган тадбиркорлар учун муҳим янгиликни ётказмоқчимиз.

Ўзбекистон Республикаси Президенти Шавкат Мирзиёев раҳбарлигида 2022 йил 12 апрел куни ўтказилган йиғилишда, дори воситаларини маҳаллий ишлаб чикарувчилари 2022 йил 31 декабрга қадар ўз корхоналарида биринчи маротаба “Зарур ишлаб чиқариш амалиёти – GМР” давлат стандарти талаблари жорий қилиб, “Зарур амалиётлар маркази” ДУК томонидан GMP сертификатини қўлга киритган тақдирда, мазкур стандарт талабларини жорий қилиш билан боғлиқ харажатлар “Фармацевтика тармоғини қўллаб-қувватлаш ва ривожлантириш жамғармаси” маблағлари ҳисобидан қоплаб берилиши белгиланган эди.

Мазкур топшириқ ижросини таъминлаш мақсадида Фармацевтика тармоғини ривожлантириш агентлиги директорининг 2022 йил 15 апрелда  51-сон буйруғи қабул қилинган бўлиб, унга мувофиқ, эндиликда дори воситаларини маҳаллий ишлаб чиқарувчи корхоналар 2022 йил 12 апрелдан 31 декабрга қадар ўз корхоналарда биринчи маротаба “Зарур ишлаб чиқариш амалиёти – GМР” давлат стандарти талабларини жорий қилса, мазкур талабларни жорий қилишда кетган харажатлар Фармацевтика тармоғини ривожлантириш агентлиги томонидан қоплаб берилади.

Бунда маҳаллий ишлаб чиқариш корхоналари Зарур ишлаб чиқариш амалиётининг (GMP) миллий талабларига мувофиқлик сертификатини биринчи маротаба олиш билан боғлиқ (2022 йил 12 апрелдан бошлаб расмийлаштирилган шартномалар асосида) корхоналар томонидан ҳақиқатда амалга оширилган (Зарур ишлаб чиқариш амалиётининг (GMP) миллий талабларига мувофиқ корхоналарни модернизация қилиш харажатлари бундан мустасно) харажатлари бўйича Фармацевтика тармоғини ривожлантириш агентлигига мурожаат қилишлари сўралади.