Chapter 9

🚩Ch -9

Arc 1.9 မင်းသမီးအစားထိုး ထိမ်းမြားလက်ထပ်ခြင်း

ရွှမ်းယွမ်ရွေ့နှင့် အရှင်ဧကရာဇ်တို့ စုဝမ်ကိစ္စနှင့်ပတ်သက်ပြီး တစ်ယောက်နှင့်တစ်ယောက် သဘောထားကွဲလွဲပြီးနောက် မည်သူ့ဆီကမှန်းမသိ စုဝမ် နှင့် ရွှမ်းယွမ်ရွေ့တို့၏ ကောလဟာလများက စတင်ပျံ့နှံ့နေ၏ ။ သတင်း၌ ရွှမ်းယွမ်ရွေ့က သူ့အချစ်ဦး အရင်ဝမ်ဖေးကို စွန့်ပစ်ရသည့် အကြောင်းမှာ ယဲ့ကျီးဟွာထံတွင် မြူဆွယ်ခံလိုက်ရပြီး စိတ်ရှုပ်ထွေးသွားခြင်းဟူ၍ ပြောနေကြသည် ။

ထို့အပြင် ယဲ့ကျီးဟွာက အမြင့်နေရာကို ရယူနိုင်သွားခြင်းမှာ သူမက လှည့်ကွက်များစွာကို သုံးလိုက်ခြင်းကြောင့်ဟုလည်း ဆိုကြသည် ။ ထိုလှည့်ကွက်များထဲတွင် အံ့အားသင့်စရာအကောင်းဆုံးတစ်ခုမှာ လင်မယားလိုပေါင်းသင်းနေခြင်း ဖြစ်သည် ။၊ကောလဟာလများက အလွန်ပျံ့နှံ့နေပြီး ရွှမ်းယွမ်ရွေ့က တဖြည်းဖြည်း ကာမလိုက်စားသောမင်းသား ၊ မျက်နှာများသူ ဖြစ်လာပြီး ယဲ့ကျီးဟွာကလည်း အားလုံးသဘောကျရသော ပညာတတ်အမျိုးသမီးအဖြစ်မှ အားလုံးထံမှ အထင်သေးခံရသူအဖြစ် ပြောင်းလဲသွား၏ ။

ကောလဟာလများက စုဝမ်ငှားရမ်းထားသော လူများထံမှ တိတ်တဆိတ်သတင်းထွက်သွားခြင်းဖြစ်သည် ။ ရွှမ်းယွမ်ရွေ့ ဒေါသထွက်လာသောအခါ ဦးတည်ဘက်က ပြောင်းသွား၏ ။ စုဝမ်၏ နေရာကို ယဲ့ကျီးဟွာ ရနိုင်သွားသည့် တစ်ခုတည်းသောအကြောင်းပြချက်က စုဝမ်၏နာမကျန်းသော ခန္ဓာကိုယ်ကြောင့်သာဖြစ်သည်ဟု " ဝမ်အိမ်တော်၏အတွင်းလူ" ထံမှ သတင်းထွက်လာသည် ။ ၎င်းက ဤလေးနှစ်အတွင်း စုဝမ်၏ ကျန်းမာရေးကြောင့် ဝမ်ယဲနှင့် ဘယ်တုန်းကမှ လင်မယားအရာမမြောက်ခြင်း ဖြစ်သွား၏ ။

ဤသတင်းထွက်ထွက်ချင်း ကျောက်ခဲတစ်လုံးက ဂယက်ပေါင်း တစ်ထောင်လောက် ထသွားစေသည့်အတိုင်းပင် ။

ပုံမှန်အားဖြင့် စုဝမ်က ပြန်လည်အားပြည့်ဖို့ အိမ်တွင်သာ အနားယူနေတတ်သည် ။ မကြာသေးခင်က ကောလဟာလများအကြီးကျယ်ထွက်လာတာနှင့် ပက်သက်ပြီး သေချာပေါက် လူအများကြီးကတော့ နာမကျန်းနေသောသူဆီကို လာရောက်ခြင်းမပြုကြပေ ။ သို့သော် သတင်းထွက်ထွက်ချင်း ပြဿနာရှာဖို့အသင့်ဖြစ်နေသော အခြားမင်းသားများက ချက်ချင်းဝတ်စားဆင်ယင်ကာ ဗိုလ်ချုပ်ကြီးအိမ်တော်တံခါးဝသို့ လာရောက်ကြတော့သည်။

ရွှမ်းယွမ်ရွေ့ထံမှ စွန့်ပစ်ခံလိုက်ရသောစုဝမ်မှာ ရွေးချယ်စရာမရှိတော့ဘဲ သူတို့နှင့် စခန်းတူသည့် မဟာမိတ်ဖြစ်လာ၏ ။

ဒါပေမဲ့ ရွှမ်းယွမ်ရွေ့ဆီက တစ်ခါလေးတောင် အထိမခံရသေးတဲ့ စုဝမ်က သူတို့ရဲ့ ဝမ်ဖေးလည်း ဖြစ်လာနိုင်တာပဲ ။

တော်ဝင်မိသားစုရှိ လူများက အမြဲတမ်းတစ်ကိုယ်ကောင်းဆန်ကြသည် ။ တော်ဝင်အာဏာနှင့် အကျိုးအမြတ်အတွက်ဆိုလျှင် သူတို့ဘာမဆိုလုပ်လိမ့်မည် ။ အရင်တုန်းက ဗိုလ်ချုပ်စုအိမ်တော်မှာ အားလုံး၏ လေးစားမှုကိုခံရပြီး မင်းသားများက စုဝမ်ပေါ် လိုလားမှုကို ပြကြသည် ။ သို့သော် စုဝမ်က အမြဲတမ်း ရွှမ်းယွမ်ရွေ့ကိုသာ သဘောကျ၏ ။ ထိုအချိန်တုန်းက ရွှမ်းယွမ်ရွေ့မှာလည်း ဧကရာဇ်ထံမှ အလွန်မျက်နှာသာပေးခံရသည် ။ ထို့ကြောင့် စုဝမ်က ဝမ်အိမ်တော်နှင့် လက်ထပ်သွားတာကိုသာ သူတို့ကူကယ်ရာမဲ့စွာ ကြည့်နေနိုင်သည် ။ လေးနှစ်ကြာပြီးနောက်တွင် အားလုံးက တစ်ပတ်ပြန်လည်လာပြီး မျှော်လင့်ချက်ရောင်ခြည်သန်းလာလိမ့်မည်ဟု မည်သူကမှ မမျှော်လင့်ထားပေ ။

သမားတော်စီး၏ သက်တောင့်သက်သာနှင့် အသေးစိတ် ဂရုစိုက်ပေးပြီးသည့်နောက်တွင် စုဝမ်၏ အသားအရေနှင့် ကျန်းမာရေးတို့က အများကြီးပိုကောင်းလာသည် ။ မင်းသား(၄) နှင့် မင်းသား(၆)ထံမှ သဝဏ်လွှာရချိန်တွင် စုဝမ်က ပန်းဥယျာဥ်ထဲ၌ ဒန်းစီးနေ၏ ။ ရွှေချထားသော သဝဏ်လွှာ၌ အမျိုးသား၏ အားကောင်းသော လက်ရေးလက်သားရှိနေသည် ။

" ပြောင်ကော(၄)က မြို့တော်ကိုတောင် ပြန်ရောက်နေပြီလား ။ "

စုဝမ် သူမကိုယ်သူမ ရေရွတ်လိုက်သည် ။ တစ်ဖက်က ဒန်းကိုလွှဲပေးနေသော လွိကျူး၏ လက်တို့က ရပ်တန့်သွား၏ ။

မင်းသား (၄) ၊ ရွမ်းယွမ်ယယ် ။

လွိကျူး၏ မှတ်ဉာဏ်ထဲ၌ မင်းသား(၄)က အတော်လေးအေးတိအေးစက်နိုင်သူဖြစ်ပြီး သူ့မျက်နှာက အမြဲတမ်း မှုန်မိုင်းနေ၏ ။ သူက မြို့တော်ရှိ သြဇာရှိသောမိသားစုများနှင့်လည်း ဆက်ဆံဖို့ တွန့်ဆုတ်နေတတ်သည် ။ သူ အသက်ပြည့်သောအခါ သူ့ကိုယ်သူ မြို့တော်မှဝေးသော ယွိကျိုး၌ နေရာချပေးဖို့ အကြံပြုပေးခဲ့သည် ။ သူက မြို့တော်ကို တိတ်တဆိတ်ပြန်လာလိမ့်မည်ဟု မထင်ထားမိပေ။

ရွှမ်းယွမ်ယယ်.. ။

သူမက သဝဏ်လွှာကို ကြည့်လိုက်သည် ။ ကြည့်နေရင်း ၊ ကြည့်နေရင်းဖြင့် သူမ၏ နှုတ်ခမ်းထောင့်ကအနည်းငယ်မြင့်တက်သွားပြီး ဆွဲဆောင်မှုရှိသော အကွေးနေရာလေးဖြစ်လာ၏ ။

" အရမ်းပျော်နေတာလား ။ "

မပျော်မရွှင်ဖြစ်နေသောအသံက စုဝမ်ခေါင်းပေါ်မှ ထွက်ပေါ်လာပြီး သူမလက်ထဲရှိ သဝဏ်လွှာကလည်း ဆွဲလုခံလိုက်ရသည် ။

စုရွေ့က စာရွက်ပေါ်ရှိ အကြောင်းအရာတို့ကို သေချာဖတ်လိုက်ပြီး အစိတ်စိတ်အမွှာမွှာဆွဲဖြဲကာ မြေပြင်ပေါ်သို့ ပစ်ချလိုက်၏ ။ နောက်ဆုံး၌ ဆုတ်ဖြဲထားသော အပိုင်းအစတို့ကို သူ၏ အနက်ရောင်အရာရှိဘွတ်ဖိနပ်ဖြင့် တက်နင်းလိုက်သည် ။ ထိုအပိုင်းအစများက မြေကြီးထဲနစ်ဝင်ပြီး မြေမှုန့်များဖြစ်သွားတာ သေချာမှ လုပ်လက်စကို ရပ်လိုက်သည် ။

ကလေးဆန်လိုက်တာ ။

စုဝမ်က မျက်လုံးပင့်ကာ စုရွေ့၏ နက်ရှိုင်းသော မျက်လုံးများကို ကြည့်လိုက်သည် ။

ဤလူနှစ်ယောက်က တစ်ယောက်ကိုတစ်ယောက် ဒီအတိုင်းပဲ ကြည့်နေကြသည် ။ မည်သူကမှ အလျှော့မပေးသလို ၊ မည်သူကမှလည်း စကားစမပြောပေ။

အချိန်မည်မျှကြာသွားသလဲမသိသော်လည်း လွိကျူးက ဦးခေါင်းကိုပင်မရွေ့ဘဲ သူမ၏ တည်ရှိမှုကို တတ်နိုင်သမျှလျှော့ချနေပြီး တစ်ခုခုကို ရုတ်တရက်တွေးမိသွားသည် ။ တစ်လှမ်းပြီးတစ်လှမ်း ရှေ့တိုးပြီးနောက် သူမက တုန်ရီနေသောအသံဖြင့် ပြောလိုက်သည်။

" သခင်လေး ၊ အခု ကျွင်းကျူက ဆေးသောက်ရမယ့်အချိန်ရောက်နေပါပြီ ။ "

စုဝမ်၏ ကျန်းမာရေးက အံ့သြစရာကောင်းလောက်အောင် တိုးတက်လာသော်လည်း သူမက တစ်နေ့ကို သုံးကြိမ်တော့ ဆေးသောက်ဖို့လိုသေးသည် ။

စုရွေ့၏ အကြည့်တို့က တောက်ပသွားပြီး နောက်တစ်ခဏတွင် သူက ခြေလှမ်းကျယ်ကျယ်ဖြင့် စုဝမ်ကို ဒန်းပေါ်မှ ဒေါင်လိုက် မ,ချီလိုက်သည် ။ သူ၏ လက်ထဲတွင် အသယ်ခံထားရသောစုဝမ်က သက်သောင့်သက်သာမရှိသလို အနည်းငယ်ရုန်းကန်လိုက်သည်။ သူမ ရုန်းလေလေ စုရွေ့က သူမကို အားသုံးပြီး ပွေ့ထားလေလေဖြစ်သည် ။

သူမခေါင်းမော့လိုက်လျှင် စုရွေ့၏ အေးစက်သောအသက်ရှူသံကို ခံစားနေရ၏ ။ စုဝမ်က ဒီအတိုင်းပဲ သူမခေါင်းကိုငုံ့ထားပြီး ထပ်မလှုပ်တော့ပေ ။ သူမ အခန်းကို ပြန်ရောက်သောအခါ အစေခံများက ဆေးဖက်ဝင်ဆေးရည်ကို ကျိုချက်ထားနှင့်ပြီး ဖြစ်၏ ။ အငွေ့တထောင်းထောင်းနှင့် ဆေးရည်ပူပူက အနည်းငယ်ခါးသက်မည့် အနံ့မျိုးရနေသည်။

စိတ်မပါစွာဖြင့် စုဝမ်ကို အိပ်ယာပေါ်တင်ပေးလိုက်ပြီးနောက်တွင် စုရွေ့က ဆေးရည်ကိုယူပြီး စုဝမ်ကို တိုက်ကျွေးသည် ။ အစမှ အဆုံးအထိ သူက မည့်သည့်စကားတစ်ခွန်းကိုမှ မပြောပေ ။ သူ့လှုပ်ရှားမှုတို့က တောင့်တင်းသေသပ်ပြီး နည်းနည်းမှ ညင်သာမခြင်းမရှိ ။

စုဝမ် စတင်ပြီး သမားတော်စီး၏ အသေးစိုက်ဂရုစိုက်ပေးမှုတို့ကို အနည်းငယ်သတိရမိ၏ ။

ဒီရူးနေတဲ့ နတ်ဆိုးကို ဒီအစ်မကောင်းလေးက ထိန်းချုပ်နိုင်လိမ့်မယ်လို့ ပြောတယ်မလား ။ ရှင်ကျွန်မကို နည်းနည်းချိုသာပေးရင် သေသွားမှာမို့လို့လား ။

ဒီဆေးခါးခါးတွေ တိုက်ပြီး ရှင်က ကျွန်မကို အသေသတ်နေတာလား ။

စုဝမ်က သုန်မှုန်နေသော်လည်း ဆေးရည်တစ်ခွက်လုံးကို သူမ ကုန်စင်အောင်သောက်လိုက်သည်။

ဆေးသောက်ပြီးနောက်တွင် လွိကျူးက သူမနှုတ်ခမ်းကို သုတ်ပေးပြီး ပြန်ဆုတ်သွား၏ ။ သူမဘေးတွင် စုရွေ့ ထိုင်နေသေးတာကို တွေ့ရသောအခါ စုဝမ်က သူ့ကိုတစ်ချက်ကြည့်လိုက်ပြီးနောက် တစ်ဖက်သို့ပြန်လှည့်ကာ အိပ်ယာပေါ်တွင်လှဲချပြီး သူ့ကို ကျောပေးထားလိုက်သည် ။

ကျွန်မ ရှင့်ကို လုံးဝမကြည့်ချင်ဘူး ။

စုရွေ့က လှုပ်လည်းမလှုပ်သလို ဒေါသလည်း မထွက်ပေ ။ သူက သူ့ကိုယ်နေဟန်ထားအတိုင်းနေနေပြီး စုဝမ်၏ နောက်ကျောကိုသာ ဝေဝါးစွာဖြင့် စိုက်ကြည့်နေ၏ ။

စုဝမ်အိပ်ပျော်သွားပြီးဆိုတာ သေချာမှသာ စုရွေ့က ဖြည်းဖြည်းချင်းထရပ်လိုက်သည် ။ သူက အသံတိုးတိုးဖြင့် လွိကျုးကို စကားအနည်းငယ်ပြောကာ ထွက်သွား၏ ။

ထိုနေ့ ၊ နေ့လည်ခင်း၌ စုရွေ့က မင်းသား(၄) နှင့် မင်းသား(၆)ထံသို့ မတူညီသောစာကို ရေးပေးလိုက်ပြီး သူ၏ လျှို့ဝှက်အစောင့်များကို ပေးခိုင်းလိုက်သည် ။

မကြာသေးခင်က မြို့တော်မှာ ပို၍ အသက်ဝင်လာပြီး မင်းသားအချို့ကလည်း ပြဿနာရှာဖို့ အသင့်ဖြစ်နေကြသည် ။ ထို့အပြင် ရွှမ်းယွမ်ရွေ့ကလည်း ယခုအချိန်၌ အကျပ်အတည်းတွေ့နေ၏ ။ ဤအရာများဖြစ်နေချိန်တွင် ခေါင်းဖြတ်ခံရသင့်သော မင်းသား(၅)က တိတ်တဆိတ်ထွက်ခွာသွားတာကို မည်သူမှ သတိမပြုမိလိုက်ပေ ။ သူက မြို့တော်မှ အဝေးကို ရောက်သွားတာနှင့် တစ်ပြိုင်နက် ဟွိုင်ကျိုးရှိ သူ့ဂိုဏ်းအဖွဲ့အားလုံးကို ဆက်သွယ်လိုက်သည်။

ယဲ့ကျီးကျင်က ရွှမ်းယွမ်ချင်းနှင့်အတူ ထွက်မသွားပေ ။ ပထမအချက်အနေဖြင့် သူ၏ လျှို့ဝှက်စစ်တပ်နေရာသို့ အမျိုးသမီးတစ်ယောက်ကို ခေါ်သွားဖို့ မသင့်တော်သလို ၊ ဒုတိယအချက်အနေဖြင့် သူမက ယဲ့ကျီးဟွာနှင့် ကိုယ်တိုင်ကိုယ်ကျရှင်းချင်သောကြောင့် မြို့တော်တွင် နေခဲ့ခြင်းဖြစ်သည် ။

ကောလဟာလများကလည်း ပိုပိုပြီး ဆိုးရွားလာသောကြောင့် ယဲ့ကျီးဟွာ၏ ဂုဏ်သတင်းကလည်း ပိုပြီး အနံ့ဆိုးထွက်လာ၏ ။ဤအရာက သူမကို အလွန်ခံစားရခက်စေပြီး သူမအခြေအနေကလည်း တဖြည်းဖြည်းချင်း ပိုဆိုးရွားလာသည် ။

ယနေ့တွင် ယဲ့ကျီးဟွာက ဆေးသောက်ပြီး အိပ်ပျော်မလို့သာ ရှိသေးသော်လည်း လေကြမ်းများတိုက်ခတ်ပြီး ပြတင်းတံခါးများ ပွင့်သွားသည့် အသံကို ကြားလိုက်ရသည် ။

" ချင်းလျို ၊ ချင်းလျို ။ "

ယဲ့ကျီးဟွာက သူမ၏ ကိုယ်ပိုင်အစေခံကို ခေါ်လိုက်သော်လည်း မည်သူကမှ ပြန်တုံ့ပြန်ခြင်းမရှိပေ ။

သူမ ဝေဝါးစွာဖြင့် မျက်လုံးဖွင့်ကြည့်လိုက်သောအခါ သူမ၏ မကွဲပြားသော အမြင်က အရိပ်တစ်ခုကို တွေ့လိုက်ရသည် ။

" ချင်းလျို "

ယဲ့ကျီးဟွာက တဖြည်းဖြည်းဝင်ရောက်လာသော သူကို ခေါ်ကြည့်လိုက်သည် ။ အသံက အက်ကွဲနေ၏။

" ကျယ်ကျဲ ၊ ကျယ်ကျဲက ကျွန်မကို အရမ်းစိတ်မချမ်းမြေ့စရာကောင်းအောင် ထိခိုက်စေခဲ့တာပဲ ။ ကျွန်မ အရမ်းစိတ်ပျက်ရတယ် ။ "

" အား "

ထိုရင်းနှီးနေသည့် သွေးသံတရဲရဲ နှင့် မျက်နှာကိုတွေ့လိုက်ရသောအခါ ယဲ့ကျီးဟွာ အော်ဟစ်လိုက်၏။ သူမ မျက်လုံးနှစ်ဖက်လုံးက အပေါ်သို့ မျက်ဖြူလန်ကာ သတိလစ်သွားတော့သည် ။

" ဟမ့် "

သူမဆီမှ ခြောက်လှန့်ခံရပြီး သတိလစ်သွားသော ယဲ့ကျီးဟွာကို ယဲ့ကျီးကျင်က ကြည့်နေသည် ။

ဒီလောက် သတ္တိလေးနဲ့ နင်ကငါ့ကို ပြန်တိုက်ခိုက်ရဲတာလား ။

သူမ၏ နှုတ်ခမ်းထောင့်စွန်းတို့က ကျေနပ်သောအပြုံးဖြင့် ကွေးညွတ်သွား၏ ။ သူမက အင်္ကျီရင်ဘက်ထဲတွင် ပါလာသည့် သွေးအိတ်ကို ညှစ်ထုတ်လိုက်သည် ။

" ငါတို့ ပထမဆုံးပြန်ဆုံစည်းတဲ့အနေနဲ့ နင့်ကို လက်ဆောင် ပေးမယ် ။ ယဲ့ကျီးဟွာ ၊ နင့်ကိုယ်နင် အနိုင်ရတဲ့သူဖြစ်လိမ့်မယ်လို့ ထင်နေတာလား ။ အရမ်း နုံတာပဲ ..ရယ်စရာကောင်းလိုက်တာ ။ "

မနက်စောစော နောက်တစ်ရက်တွင် ယဲ့ကျီးဟွာ၏ အခန်းထဲ၌ အော်ဟစ်ဆူညံသံများ ထွက်ပေါ်လာ၏။ ရွှမ်းယွမ်ရွေ့ ကမန်းကတန်းဝင်လာသောအခါ ယဲ့ကျီးဟွာက ဆံပင်စုတ်ဖွားနှင့် သွေးများအပြည့်ပေကျံနေကာ ကုတင်၏ အတွင်းကျဆုံးနေရာ၌ တုန်ရီနေတာကို တွေ့လိုက်ကြရလေသည် ။

****

စုဝမ်သည် တစ်ဖက်က လှံတံ ၊ တစ်ဖက်က ဒိုင်းကာကိုင်ထားသည်ဟု ဆိုရပေမည် ။ ပုံမှန်က ယဲ့ကျီးကျင်နှင့် ရွှမ်းယွမ်ချင်းတို့ကို သူအသက်ရှင်ခွင့်ပေးထားသည် ။ ၎င်းမှာ စုဝမ်က ယဲ့ကျီးကျင် နှင့် ယဲ့ကျီးဟွာတို့ကို အကြီးအကျယ်တိုက်ခိုက်ခိုင်းဖို့ စီစဥ်ထားခြင်းကြောင့်သာဖြစ်၏ ။ အခုတော့ သူတို့၏ တိုက်ခိုက်မှုကို အဝေးမှ ကြည့်နေတာက လုံလောက်သွားပြီ ဖြစ်သည် ။

ယခုတွင် အားလုံးက အဆင်ပြေနေပြီး ၊ ထိုအရာမှလွဲ၍....

ဗိုလ်ချုပ်ကြီးအိမ်တော်၌ စုဝမ်ကအနည်းငယ် ခေါင်းရှုပ်နေ၏ ။ သူမ သဝဏ်လွှာရပြီးသည့်နေ့ကတည်းက မည်သူကမှ လာရောက်ခြင်းမရှိပေ ။

မင်းသား(၄) နှင့် မင်းသား(၆)က သူတို့၏ လှုပ်ရှားမှုအားလုံးကို ရပ်တန့်လိုက်သည် ။

ဤအရာက သူမ မျှော်လင့်ထားတာမျိုးမဟုတ်ပေ။

ရွှမ်းယွမ်ယယ် ။

သူမ မှတ်ဉာဏ်ထဲမှ အမြဲမှုန်မှိုင်းနေသည့် ထိုလူကို ပြန်တွေးကြည့်လိုက်သည် ။ သူက ပညာရှိသောသူဖြစ်ပြီး ဘယ်လို လုံခြုံအောင်အကွက်ရွှေ့ရမလဲဆိုတာကိုလည်း သိသည် ။ ထို့အပြင် သူက သူ၏ သမာဓိကို ထိန်းထားပြီး ခံစားချက်များကို ဖိနှိပ်ထားနိုင်သောသူဖြစ်၏ ။ သူက ဧကရာဇ်ထံမှ အမှတ်ကောင်းရထားသူ ဖြစ်သည် ။

ရွှမ်းယွမ်ယယ်က သူမဆီအရင်လာလည်ဖို့ကို ဆက်ပြီးစောင့်နေလို့မဖြစ်တော့ပေ ။ စုရွေ့က သူမအစီစဥ်ကို ဟန့်တားလိုက်တာဖြစ်မည်ဟု သူမတွေးမိသည် ။ဤနတ်ဘုရားလို တစ်ဖွဲ့တည်းသားက သူမအစီစဥ်ကို ကြန့်ကြာစေသောအခါ သူမတွင်ရွေးချယ်စရာမရှိဘဲ ရွှမ်းယွမ်ယယ်ထံသို့ ကိုယ်တိုင်ကိုယ်ကျ စာရေးလိုက်ရသည် ။ စကားလုံးတို့မှာ ရည်ရွယ်ချက်ရှိရှိဖြင့် သူ့ကိုသတိထားမိစေ၏ ။ အဓိကကိစ္စအတွက် သူတို့ပါ ပါဝင်ပူးပေါင်းနိုင်ပြီး တစ်ဖက်လူ၏ တုံ့ပြန်မှုပေါ်တွင် ကိစ္စက မူတည်နေလိမ့်မည် ။

🚩

Chapter 9

Report Page