Chapter 14

🚩Ch -14

Arc-1.14 မင်းသမီးအစားထိုးထိမ်းမြားလက်ထပ်ခြင်း

စုဝမ်က ဗိုလ်ချုပ်အိမ်တော်သို့ ပြန်ရောက်ပြီးနောက် သမားတော်စီးက အိမ်တော်ကို မကြာခဏလာရောက်သောဧည့်သည်ဖြစ်လာ၏ ။ ထိုညက ညစာစားပွဲအပြီး အိမ်တော်ရှိလူများက သူ့အပေါ်တွင် ပိုပြီးဖော်ရွေပျူငှာလာကြသည် ။စုဝမ် ခြံဝင်းမှ တိတ်တဆိတ်အနားယူနိုင်မည့်နေရာကို ရုတ်တရက် ပြောင်းရွှေ့သွားတာနှင့် ပက်သက်၍ သမားတော်စီးက ထူးထူးခြားခြားမခံစားမိပေ ။ သူက အိပ်ယာပေါ်တွင် လှဲနေသော ပိန်ပါးပြီး ဖြူဖျော့နေသည့် စုဝမ်ကို ကြည့်ရင်းသာ စိတ်ပူနေ၏ ။

" ရှောင်ဝမ် ၊ မနေ့ညက ကောင်းကောင်းအိပ်ရရဲ့လား။ "

သူတို့နှစ်ယောက်ကြားရှိ ဆက်ဆံရေးက တဖြည်းဖြည်းပြောင်းလဲလာသည် ။ သူမကို သမားတော်စီးခေါ်ပုံက အစပိုင်းတွင် အနည်းငယ်ကိုးရိုးကားယားနိုင်ပြီး စိမ်းသက်နေသော်လည်း ယခုတွင်တော့ အလွန်ကြင်နာနေ၏ ။

" အဲ့ဒါက သိပ်မဆိုးပါဘူး ။ "

စုဝမ်က သမားတော်စီးကို ပြုံးပြလိုက်သည် ။

" ကျွန်မအခုတကယ်အဆင်ပြေနေပါပြီ ။ ရှင် ကျွန်မနဲ့ တစ်ချိန်လုံးနေပေးဖို့ မလိုပါဘူး ။ "

" မင်းရဲ့ ကျန်းမာရေးကကောင်းနေပြီဆိုတာ ကိုယ်သိပါတယ် ။ ဒါပေမဲ့ မင်းရဲ့ စိတ်..."

ဤအထိပြောပြီးနောက် သမားတော်စီး၏ အမူအရာက အနည်းငယ်ဝင့်ကြွားသွား၏။

" အဲ့ဒီညက လုပ်ကြံရေးသမားကို အခုထိ မဖမ်းမိသေးဘူးလား ။ "

စုရွေ့က အပြင်းအထန်ဒဏ်ရာရထားပြီး မေ့မြောနေ၏ ။ ဒဏ်ရာက လုပ်ကြံရေးသမားများ၏ သတ်ဖြတ်ရန် ကြိုးပမ်းမှုကြောင့်ဟု စုအိမ်တော်က သတင်းလွှင့်ထားသည် ။ ထို့အပြင် စုဝမ်ကလည်း ဤရက်ပိုင်းအတွင် သိပ်နေလို့ကောင်းပုံမရပေ ။ သမားတော်စီးကို ထိုနေ့က လုပ်ကြံရေးသမားကြောင့် သူမထိတ်လန့်သွားရသည်ဟုသာ စုယွီဖုန်းက ပြောထားသည် ။

ဤကဲ့သို့သော ဆင်ခြေမျိုးက စုအိမ်တော်အပြင်ဘက်ရှိ လူများကို သံသယမဖြစ်စေပေ ။ ထိုအစား " လုပ်ကြံရေးသမားက ဘယ်သူဖြစ်မလဲ " ဟူသည့် ခေါင်းစဥ်ကသာ မြို့တော်တွင် အပြောများလာ၏ ။

လုပ်ကြံရေးသမားက ညစာစားပွဲပြီးနောက် စုရွေ့ကို လုပ်ကြံဖို့ ကြိုးစားလာတာဖြစ်သည့်အတွက် ဖြစ်နိုင်ချေရှိသောသူများထဲတွင် ရွှမ်းယွမ်ရွေ့လည်း ပါနေလိမ့်မည်ဟု အားလုံးက ခန့်မှန်းထားကြသည် ။

ဒီတစ်ကြိမ် စုရွေ့ဒဏ်ရာအပြင်းအထန်ရသွားခြင်းက ဧကရာဇ်ကို အမျက်ထအောင် လှုံ့ဆော်ပေးလိုက်မိသည် ။ ဤလွန်ခဲ့သောရက်အနည်းငယ်အတွင်း မြို့တော်၏ လုံခြုံရေးကို တင်းကျပ်ထား၏ ။ မျိုးစုံသော စစ်ဆေးရေး ၊ ရှာဖွေရေးများက လုံးဝရပ်တန့်မသွားပေ ။ဤကိစ္စက အကြီးအကျယ်ပွက်လောရိုက်စေသောကြောင့် ဧည့်ခံပွဲတွင် ဖြစ်သွားသည့် ကိစ္စကလည်း အလားတူသတင်းပျံ့သွားသည် ။ ထို့နောက်မှသာ ကျွင်းကျူ၏ နှလုံးသားထဲတွင် လူတစ်ယောက်ရှိနေနှင့်ပြီး ထိုလူက သူမ၏ နှလုံးခုန်သံကို ဖြစ်ပေါ်စေသည့် တော်ဝင်သမားတော်စီးဖြစ်နေမှန်း ပြည်သူများက သဘောပေါက်သွားရသည် ။

စီးအိမ်တော်က ဆေးပညာမြင့်မားသောသမားတော်များကြောင့် နာမည်ကြီးသည့် မိသားစုဖြစ်သည် ။ သူတို့က လူထုထံမှ ချီးမွမ်းခံရပြီး တော်ဝင်မိသားစုနှင့် ပြည်သူများအကြား နာမည်ကြီးသည် ။စုအိမ်တော်က စီးအိမ်တော်ကို လက်ထပ်ဖို့ကိစ္စနှင့် စပ်လျဥ်း၍ ကမ်းလှမ်းသည့်သတင်းက လုပ်ကြံရေးသမားသတင်းကို မှေးမှိန်သွားစေပြီး အားလုံးက အာရုံစိုက်နေကြသော ပျော်ရွှယ်ဖွယ်ကိစ္စတစ်ခုဖြစ်လာ၏ ။

စုဝမ်က နေ့တိုင်းအပြင်မထွက်သော်လည်း လူများက စုအိမ်တော်မှ သတင်းကို သယ်ပို့ဖို့ သိနေကြဆဲဖြစ်သည် ။

ရွှမ်းယွမ်ရွေ့က ယဲ့ကျီးဟွာ၏ မျက်နှာကို စုတ်ပြတ်သတ်သွားအောင်လုပ်လိုက်သည့်အကြောင်း ယဲ့ကျီးကျင်ဆီမှ စုဝမ်တစ်ဆင့်ပြန်ကြားလိုက်ရသည် ။ လတ်တလောအတွင်း ဝမ်အိမ်တော်၌ ယဲ့ကျီးဟွာက ဝေဒနာများအပြည့်ဖြင့် နေထိုင်နေရ၏ ။

ရွှမ်းယွမ်ရွေ့က အနည်းငယ်သာအဖော်ပြုပေးပြီး ယဲ့ကျီးဟွာက တစ်ယောက်တည်း အထီးကျန်စွာ ခံစားနေရရင်း ၎င်းက တကယ်ကို မမျှတဘူးဟု ဆိုသည် ။

သတိမထားမိလိုက်သည့်အချိန်အတွင်း နှစ်သစ်အကူးအကြိုရက်ကရောက်လာပြီး ၎င်းက သူမဤကမ္ဘာတွင်ဖြတ်သန်းရမည့် ပထမဆုံး နှင့် နောက်ဆုံး နှစ်သစ်ကူးအကြိုပဲဆိုတာကို သိလိုက်သည် ။

ရွှမ်းယွမ်ချင်း၏ တပ်ဖွဲ့များက ရက်အနည်းငယ်အတွင်း မြို့တော်အပြင်ဘက်ကိုရောက်လာပြီး မုန်တိုင်းက မြို့တော်တစ်ခုလုံးကို တိုက်ခတ်သွားမှာ သူစိုးရိမ်နေမိသည် ။

" သမားတော်စီး "

ပြဇာတ်က အဆုံးသတ်တော့မည်ဆိုတာကို စုဝမ်သိသည် ။ စိုးရိမ်မှုအချို့က သူမမျက်ဝန်းထဲတွင် ထင်ဟပ်နေပြီး သူမက သမားတော်စီးကို ကြည့်လိုက်သည် ။

" လုပ်ကြံရေးသမားနဲ့ ပတ်သက်ပြီး ဘာသတင်းမှ မရပါဘူး ။ သမားတော်စီး သူတို့က တကယ်ကြောက်စရာကောင်းတာပဲ ။ ကျွန်မ တကယ်ထိတ်လန့်မိတယ် ။ "

" မကြောက်ပါနဲ့ ။ ကိုယ်မင်းကို ကာကွယ်ပါ့မယ်။"

သမားတော်စီးက ပေါ့ပါးစွာဖြင့် စုဝမ်ကို သူ့ရင်ခွင်ထဲသို့ ဆွဲလိုက်ပြီး သူအသံက တကယ်ကို လေးနက်နေ၏။

" အင်း "

စုဝမ် ခေါင်းညိတ်လိုက်သည် ။ ထို့နောက် သူမက တစ်ခုခုကို တွေးမိသွားပုံရပြီး သမားတော်စီးကို တောက်ပသောမျက်လုံးများဖြင့် ကြည့်လိုက်သည် ။

" သမားတော်စီး ၊ ရှင်က ဆေးအညွှန်းပေးတဲ့နေရာမှာ တကယ်တော်တာပဲ ။ ရှင်ကျွန်မကို သင်ပေးလို့ရမလား ။ ဒါဆို ကျွန်မဘာသာလည်း ကာကွယ်နိုင်တာပေါ့ ။ "

" မင်းသင်ချင်လို့လား ။ "

သမားတော်စီးက အံ့အားသင့်မှုအချို့နှင့် စုဝမ်ကို ကြည့်လိုက်သည် ။

သမားတော်များက လူတွေကို ကယ်တင်ပေးနိုင်သလို သတ်လည်းသတ်ပစ်နိုင်သည် ။

ဆေးက အသက်ကယ်နိုင်သလို လူကိုလည်းသေစေနိုင်၏ ။

သမားတော်များက လူသတ်လျှင်လည်း ပုံမှန်အားဖြင့် သွေးကိုပင် မမြင်ရချေ ။ စီးအိမ်တော်က အဆိပ်အနည်းငယ်ကိုလည်း ထုတ်လုပ်ထားသည် ။ စုဝမ် သိရသလောက်ဆိုလျှင် စီးအိမ်တော်၏ လက်ရှိမျိုးဆက် သမားတော်စီးက အဆိပ်များကို ထုတ်လုပ်ချဲ့ထွင်ပြီး ၎င်းက သူအကျွမ်းကျင်ဆုံး နယ်ပယ်ဖြစ်သည် ။

" ကျွန်မ သင်လို့မရဘူးလား ။ "

သမားတော်စီး၏ မေးခွန်းကို ကြားသောအခါ စုဝမ်က မျက်လွှာချလိုက်သည် ။

" အဲ့ဒါလည်း မှန်ပါတယ် ။ ကျွန်မက အခုထိ စီးအိမ်တော်ရဲ့ လူမှမဟုတ်သေးတာ ။ ပြီးတော့..ကျွန်မက အရမ်းလည်းတုံးသေးတယ် ။ ကျွန်မ သေချာပေါက် သင်ယူနိုင်လောက်မှာ မဟုတ်ဘူး။"

" ဘယ်သူပြောလဲ "

စုဝမ်၏ ဝမ်းနည်းနေသောအကြည့်တို့ကို သမားတော်စီးက မခံစားနိုင်သောကြောင့် ချက်ချင်းပဲ သူ့ရင်ဘက်ကိုပုတ်ပြီး သူမကို သူသေချာသင်ပေးမည်ဖြစ်ကြောင်း အာမခံလိုက်သည် ။သူမ၏ ပင်ကိုယ်အရည်အချင်းနှင့်သာဆိုလျှင် သူမက သေချာပေါက်အချိန်တိုအတွင်းမှာ ဆရာကျသွားလိမ့်မည် ။

နှစ်ယောက်က ခဏလောက် စကားပြောနေကြသည် ။ သမားတော်စီးက စုဝမ်ကို များများအနားယူဖို့ပြောပြီး သတိမေ့နေဆဲဖြစ်သော စုရွေ့ကို ကြည့်ဖို့ တစ်ခြားခြံဝင်းကို သွားလိုက်သည် ။

တကယ်တမ်းတွင် ရက်အနည်းငယ်လောက် အနားယူပြီးနောက် စုရွေ့ကိုယ်ပေါ်ရှိ ဒဏ်ရာများက အများကြီးသက်သာလာသည် ။ အနည်းဆုံးတော့ ထိုဒဏ်ရာများက အစတုန်းကလောက် ရုပ်ပျက်ဆင်းပျက်ဖြစ်မနေတော့သော်လည်း သူက သတိမေ့နေဆဲဖြစ်သည် ။ သမားတော်စီးက မည်သည့်နည်းလမ်းမျိုးကိုပဲ သုံးပါစေ ၊ စုရွေ့က ပြင်ပကမ္ဘာကို သတိမထားမိသေးပေ ။

သူက အိပ်မက်မှ မနိုးထချင်သောသူတစ်ယောက်လိုအလား ပြင်ပကမ္ဘာရှိ အရာအားလုံးကို သူက အလိုအလျောက်ငြင်းဆန်နေပုံရ၏ ။

ပုံမှန်နေ့ရက်များက တစ်ရက်ပြီးတစ်ရက် ကုန်ဆုံးသွားပြီး နောက်ဆုံးတွင် နှစ်သစ်ကူးအကြိုညသို့ ရောက်လာသည် ။ နှစ်စဥ် နှစ်သစ်ကူးအကြိုနေ့တွင် ဧကရာဇ်က အရာရှိတိုင်းကို စားသောက်ပွဲကျင်းပဖို့ ဖိတ်ကြားလေ့ရှိသည် ။ လက်အောက်ခံပြည်နယ်ရှိ အုပ်ချုပ်သူများကလည်း မြို့တော်သို့ပြန်လာပြီး စားသောက်ပွဲတွင် ပါဝင်ဆင်နွှဲကြသည် ။

၎င်းက တော်ဝင်မိသားစုအတွက် နှစ်စဥ်စားသောက်ပွဲဖြစ်သော်လည်း ဤကိစ္စက စုဝမ်အတွက်တော့ လူသတ်ပွဲအတွက် တည်ခင်းခြင်းမျိုးဖြစ်၏ ။

နှစ်သစ်ကူးအကြိုတွင် မင်းမြို့တော်က မီးရောင်များဖြင့် ထိန်လင်းနေသည် ။ စုဝမ်က ဗိုလ်ချုပ်အိမ်တော်၏ မြင်းလှည်းထဲတွင် ထိုင်နေပြီး အရှေ့ဂိတ်တံခါးမှ နန်းတော်ထဲသို့ ဝင်လာ၏ ။ မြင်းလှည်း၏ လိုက်ကာမှတစ်ဆင့် ခမ်းနားတင့်တယ်သော နန်းတော်ကို မြင်လိုက်ရပြီး မကြာခင်တွင် ဒီနေရာက ပြိုလဲပျက်စီးတော့မည်ဆိုတာကို တွေးနေမိသည် ။ စုဝမ်တွင် နောင်တရနေသော အတွေးရှိနေ၏ ။

ငါ့ဆီမှာ အခုဖုန်းရှိနေရင် ကောင်းမယ် ။ ဖုန်းသာရှိနေရင် မင်းမြို့တော်ရဲ့ သွေးလွှမ်းတဲ့စစ်ပွဲကို မှတ်တမ်းတင်ထားလို့ ရလောက်တယ် ။

ဤစားသောက်ပွဲကို တက်ရောက်ကျသည့် အရာရှိအများအပြားရှိသည် ။ အားလုံးက သူတို့၏ ဇနီး နှင့် ကလေးများကိုပါ ခေါ်လာ၏ ။ ဤအချိန်က နှစ်စဥ်တိုင်းတွင် ဧကရာဇ်နှင့် များစွာသောမင်းသား၊ မင်းသမီးများရှေ့၌ သူတို့၏တောက်ပနိုင်မည့် တစ်ခုတည်းသော အခွင့်အရေးဖြစ်သည် ။ ပုံမှန်အားဖြင့် အရာရှိ၏ သားသမီးများက ဝတ်စားဆင်ယင်ဖို့ တက်ကြွနေကြသည် ။

စုဝမ်က ပုံမှန်အတိုင်း အနီရောင်ဝတ်စုံကိုသာ ဝတ်ပြီး ၎င်းက သူမ၏ ကိုယ်စားပြုအရောင်မျိုး ဖြစ်ပုံရသည် ။ သူမက အနီရောင်ကြိုက်တယ်ဆိုတာ သိကြသောကြောင့် သာမန်အမျိုးသမီးများက အနီရောင်အဝတ်အစားကို မဝတ်ကြပေ ။

ဤသည်ကို ကြည့်ခြင်းအားဖြင့် စုအိမ်တော်က ရုံးတော်တွင် ဘယ်လောက် မျက်နှာသာပေးခံရသလဲဆိုတာ သိနိုင်သည် ။

နှစ်တိုင်း တော်ဝင်မြို့တော်၏ ညစာစားပွဲ အစီစဥ်တို့က ပုံမှန်အားဖြင့် အတူတူသာဖြစ်သည် ။ မင်းမြို့တော်၏ ကချေသည်များက သူတို့၏ တေးဂီတ နှင့် အကကို ဖျော်ဖြေပြီးလျှင် အရာရှိ၏ ကလေးများက စင်ပေါ်တွင် ဖျော်ဖြေကြလိမ့်မည် ။ နောက်ဆုံးတွင် အရွယ်မရောက်သေးသော မင်းသား ၊ မင်းသမီးလေးများက စင်ပေါ်တွင် ဖျော်ဖြေကြသည် ။

စုဝမ်က အရှေ့တန်းနှင့် နီးကပ်သောနေရာတွင် ထိုင်နေ၏ ။ သူမက စိတ်ထဲဘာမှမရှိဘဲ နောက်ခုံကို မှီနေပြီး အရှေ့မှ စားသောက်ဖွယ်ရာများကိုတော့ တစ်စက်မှ မထိထားပေ ။ဤအခြေအနေကိုတွေ့သော သူများက သူမ မသက်မသာဖြစ်နေသည်ဟုသာ ရိုးရိုးတွေးလိုက်၏ ။ တကယ်တမ်းတွင် သူမက စိတ်ထဲ၌ အချိန်ရေတွက်နေတာ ဖြစ်သည် ။

ခန်းမတစ်ခုလုံးရှိ လူအုပ်စုကြီးက သောက်စားပျော်ပါးနေကြချိန်တွင် ကောင်းကင်တစ်ခုလုံးပင် တုန်လှုပ်နိုင်လောက်သော မြို့တော်အပြင်ဘက်ရှိ စစ်ပွဲခေါ်သံက ခန်းမထဲသို့ ပျံ့လွင့်လာ၏ ။ ထိုအသံက တဖြည်းဖြည်းချင်း နီးကပ်လာပြီး မီးများနှင့်အတူတောက်လောက်နေလျက်ရှိသည် ။

ကျယ်ပြန့်သော တော်ဝင်သတ်ဖြတ်ရေးကွင်းက မီးတောက်မီးလျှံများ လွှမ်းမိုးခံထားရပြီး ထိုသတ္တိနည်းသော ကိုယ်လုပ်တော်များ နှင့် နန်းတော်အစေခံများက ကြောက်လန့်တကြားအော်ဟစ်ငိုယိုပြီးပုန်းခိုချင်နေကြသည် ။ ဤကဲ့သို့ ဝရုန်းသုန်းကားလှုပ်ရှားမှုများကြောင့် စားသောက်ပွဲအတွက် ခန်းမထဲတွင်စုနေသော လူများက နောက်ဆုံးတွင် တစ်ခုခုမှားယွင်းနေတာကို သတိထားမိလိုက်သည် ။

" ဘာဖြစ်နေတာလဲ ။ တစ်ယောက်ယောက်လာကြစမ်း ။ "

ရာဇပလ္လင်ပေါ်ရှိ ဧကရာဇ်က တစ်ခုခုမှားနေတာကို သတိပြုမိသွားသည် ။ သူက ချက်ချင်းပဲ နန်းတော်အပေါက်ဝရှိ အစောင့်များကို ဆင့်ခေါ်လိုက်၏ ။ ထို့နောက်တွင် မြောက်များစွာသော အစောင့်များက ခန်းမထဲသို့ အလျင်အမြန်ရောက်ရှိလာကြသည် ။ အစောင့်တပ်ဖွဲ့များကို ဦးဆောင်လာသည့် သူကို တွေ့လိုက်ရသောအခါ စားသောက်ပွဲခန်းမရှိ လူများအားလုံးက မျက်လုံးပြူးသွား၏ ။

" ဖခမည်းတော် ၊ မတွေ့ရတာကြာသွားပြီ ။ "

ရွှမ်းယွမ်ချင်းက အနက်ရောင်သံချပ်ကာကို ဝတ်ထားပြီး နန်းတော်ထဲသို့ တစ်လှမ်းချင်း ဝင်ရောက်လာသည် ။ သူ၏ လေးနက်ပြီးတင်းမာသော မျက်နှာထားက အနည်းငယ်ပြုံးရောင်သန်းနေ၏ ။

ရွှမ်းယွမ်ချင်း ပေါ်လာတာနှင့် တစ်ပြိုင်နက် ရွှမ်းယွမ်ရွေ့၏ အမူအရာက ပျာယာခတ်သွားသည် ။

သူက ဘာလို့အသက်ရှင်နေသေးတာလဲ ။

ရွှမ်းယွမ်ရွေ့၏ အကြည့်ကိုခံစားမိသောကြောင့် ရွှမ်းယွမ်ချင်းက ဖြည်းဖြည်းချင်းခေါင်းလှည့်လာပြီး သူ့ကို အနည်းငယ်ပြုံးပြလိုက်သည် ။

" အစ်ကိုတော် ၃ ၊ ကျွန်တော်တို့ နောက်ဆုံးအကြိမ်တွေ့ကတည်းက ခင်ဗျားကို အတော်လေးယုံကြည်ထားတာ ။ ဒီညလို အရေးကြီးတဲ့ပွဲမျိုးမှာ ဘာလို့ အစ်ကိုတော် ၃ရဲ့ ဇနီးကို မတွေ့မိရတာလဲ ။ "

ရွှမ်းယွမ်ချင်းက ကဲ့ရဲ့နေသော အမူအရာအဖြင့် ရွှမ်းရွမ်ရွေ့ကို ယဲ့ကျီးဟွာအကြောင်းပြောလိုက်သည် ။

" မရီးတော် ၃ အကြောင်းပြောရရင် သူမက တကယ်ကို ကျွန်တော့်ဘဝမှာ အဖိုးတန်တဲ့လူပဲ ။ "

ကံကြမ္မာက ကြိုတင်စီစဥ်ထားတဲ့ လက္ခဏာရှစ်ချက်နဲ့ လက်ထပ်တာအပြင် တစ်ခြားကိစ္စတွေရော...

ရွှမ်းယွမ်ရွေ့၏ ဝေဝါးနေသော အမူအရာက ရွှမ်းယွမ်ချင်းစကားကြောင့် ပိုပြီး ကြည့်ရဆိုးလာ၏ ။

" မင်း..ဒီသစ္စာဖောက် ။ မင်းက အရှင်မင်းကြီးကို လုပ်ကြံပြီး ပုန်ကန်တော့မလို့လား ။ "

" အစ်ကိုတော် ၃ ၊ ကျွန်တော်က သစ္စာဖောက်လို့ ခင်ဗျားပြောတယ် ။ ကျွန်တော်ဘာလုပ်မယ်လို့ ခင်ဗျားထင်နေတာလဲ ။ "

ရွှမ်းယွမ်ချင်းက ရယ်မောကာ နောက်ဆုံးတွင် ပလ္လင်ပေါ်ရှိ ဧကရာဇ်ဘက်သို့လှည့်သည် ။

" ဖခမည်းတော် ၊ ကျွန်တော်က အဲ့ဒီပလ္လင်ပေါ်မှာ ထိုင်ဖို့ အရည်အချင်းမရှိဘူးလို့ ပြောခဲ့တယ်မလား ။"

အရမ်း စိတ်ကြီးဝင်ကြွားဝါပြီး သေဖို့ ဖိတ်ခေါ်နေတာပဲ ။

ခန်းမထဲတွင် အချို့သော တပ်မှူးများက တိတ်တဆိတ်စတင်လှုပ်ရှားနေကြသည် ။ ထို့ကြောင့် အရှင်မင်းကြီးက အမိန့်ပေးလိုက်တာနှင့် တစ်ပြိုင်နက် သူတို့ချက်ချင်း ပြေးဝင်ပြီး ဤပုန်ကန်သူကို ဖမ်းဆီးလိမ့်မည် ။

သို့သော် ပလ္လင်ပေါ်ရှိ အရှင်မင်းကြီးက တိတ်ဆိတ်နေတုန်းပင် ။

ခန်းမထဲရှိ အခြေအနေက စတင်၍ ပိုပြီး စိမ်းသက်လာပြီး ဒုတိတန်းညာဘက်တွင် ထိုင်နေသော သမားတော်စီး၏ အမူအရာက ရုတ်တရက်ပြောင်းလဲသွား၏ ။

ဒီည တည်ခင်းတဲ့ အစားအသောက်တွေမှာ...

အဆိပ်ပါနေတယ် ။

ဤကမ္ဘာပေါ်ရှိ အဆိပ်မျိုးစုံကို သမားတော်စီးက သိသည် ။ သို့သော် ယခုညတွင် သူက မထင်မှတ်ထားစွာဖြင့် အဆိပ်မိသွားသည် ။ ဤအရာကို ကြည့်ခြင်းဖြင့် အဆိပ်က ဘယ်လောက်အားပြင်းသလဲဆိုတာကို သိနိုင်သည် ။

" ဖူး "

ဤအချိန်တွင် တိတ်တဆိတ်လှုပ်ရှားနေသော ဗိုလ်ချုပ်များက သူတို့ပါးစပ်မှ သွေးအန်ထွက်လာပြီး သူတို့၏ အမူအရာက ကြည့်ရဆိုးလာ၏ ။

" အဆိပ်ရှိတယ် ။ "

" အား "

လူအုပ်ကြားထဲမှ တစ်စုံတစ်ယောက်က အော်ဟစ်လိုက်ပြီး ၎င်းက တွန်းချခံလိုက်ရသော ဒိုမီနိုအတွဲလိုက်များလိုပင် ။ တစ်ယောက်ပြီး တစ်ယောက် ၊ ခန်းမထဲရှိ လူများက အဆိပ်မိသည့် သင်္ကေတများပြလာ၏ ။ ဤကဲ့သို့သော အဆိပ်မျိုးက လူတွေကို မသေစေနိုင်ပေ ။ ၎င်းက သူတို့သာ တိတ်တဆိတ်မလှုပ်ရှားသ၍ ထိုအဆိပ်က သည်းမခံနိုင်လောက် အောင်ဗိုက်နာပြီး ခန္ဓာကိုယ်ကို အားအင်ယုတ်လျော့စေတာပဲရှိသည် ။

အဆိပ်၏ အကျိုးဆက်က သိပ်ကြီးကြီးမားမားမဟုတ်ပေ ။ သို့သော် ရွှမ်းယွမ်ရွေ့ခေါ်လာသည့် သေချာဖွဲ့စည်းထားသော တပ်ဖွဲ့များနှင့် ယှဥ်လျှင် ခန်းမထဲရှိလူများက ချက်ချင်း စဥ်းတီတုံးပေါ်က အသားကဲ့သို့ ဖြစ်သွား၏ ။

🚩

Chapter 14

Report Page