Chapter 13

🚩Ch -13

Arc-1.13 မင်းသမီးအစားထိုးထိမ်းမြားလက်ထပ်ခြင်း

စုဝမ်၏ မှတ်ဉာဏ်ထဲတွင် စုရွေ့က အမြဲသုန်မှုန်နေပြီး အကြင်နာမဲ့ကာ သူ့ကိုယ်သူသာကြည့်တတ်သောသူဖြစ်သည် ။ သူ့စိတ်အခြေအနေဆိုးလာတာနှင့် ကျိုးကြောင်းမဆီလျော်တော့သလို ညှာတာမှုကင်းမဲ့ပြီး ရည်ရွယ်ချက်ရှိရှိ ရန်စတတ်သည် ။ သို့သော် ဤကဲ့သို့ သူ၏ထိတ်လန့်တုန်လှုပ်သွားသော အမူအရာကို တွေ့ရခြင်းက ပထမဆုံးဖြစ်သည် ။

" ကျွန်မပြောတာက..ကျွန်မ လက်ထပ်မယ့်လူက ရှင်ဖြစ်နေရင်ရောလို့ "

သူမ စကားဆုံးသွားသည့်နောက်တွင် စုဝမ်က စုရွေ့၏ တုံ့ပြန်မှုကို စောင့်နေလိုက်သည် ။

အဲ့ဒါက ယုံကြည်မှုလွန်ကဲနေတဲ့ ပိုင်ရှင်လို တုံ့ပြန်မှာလား ။ ဒါမှမဟုတ် စိတဇ္ဇလို ကြောက်ဖို့ကောင်းတဲ့ အပြုံးမျိုးနဲ့ တုံ့ပြန်မှာလား ။ ဒါမှမဟုတ် ရင်းနှီးနေတဲ့ ချစ်ခင်မှုပြတဲ့ပုံစံမျိုးလည်း ဖြစ်နိုင်တာပဲ ။

စုဝမ်၏ မျက်နှာက အမူအရာကင်းမဲ့နေသော်လည်း တကယ်တမ်းတွင် သူမ၏ စိတ်ထဲ၌ အရမ်းကိုမျှော်လင့်ထားနေမိသည် ။ စုရွေ့က ခြောက်လှန့်ခံရပြီး ရုတ်တရက် အစွယ်များကိုပြန်ရုတ်သိမ်းကာ ရပ်တန့်ခြင်းမရှိ လှည့်ပြေးသွားသော သားရဲပေါက်လေးနှင့် တူနေ၏ ။

ဒါက ဘာကြီးလဲ ။

စုဝမ်က အံ့အားသင့်နေရပြီး သူမက သခင်လေးစုကို ကမ္ဘာအသစ်အတွက် သူမကိုယ်တိုင် တံခါးဖွင့်ပေးလိုက်မိတာကို သတိမပြုမိပေ ။

ငါက ကျယ်ကျဲကို ကာကွယ်ပေးနိုင်ရုံတင်မကဘူး ၊ သူမကိုပါ လက်ထပ်နိုင်တော့မှာလား ။

သခင်လေးစုက ဆက်တိုက်တွေးနေမိသည် ။

ဒီလောက်နှစ်တွေအကြာကြီးကိုတောင် ဒါကို ဘာလို့ဘယ်သူကမှ ငါ့ကို မပြောပြကြတာလဲ ။

ယနေ့ညတွင် စုရွေ့က တစ်ညလုံးမအိပ်တော့သလို သူ့စိတ်ထဲ၌ စုဝမ်ပြောခဲ့သောစကားများနှင့်သာ ပြည့်နေ၏ ။ ထပ်ခါ ထပ်ခါ သူလူးလှိမ့်နေမိသည် ။ စုရွေ့ခံစားနေရသော ညှင်းပန်းမှုဒဏ်က ရူးသွပ်သွားတော့မလိုပင် ။

" ဝှစ်ရှ် "

တစ်ညလုံးရေမချိုးရသေးဘဲ စုရွေ့တစ်ကိုယ်လုံးက ထိုသွေးများပေကျံနေသော အဝတ်များဖြင့် ရုတ်တရက်အခန်းထဲမှ ပြေးထွက်သွားသည် ။

စုအိမ်တော်မှာရှိတဲ့လူတွေကို သူတို့ နေ့တိုင်းကြောက်နေရတဲ့အရာက ဘာလဲဆိုတာ မေးသင့်တယ် ။သူတို့က မတုံ့ဆိုင်းနေဘဲ ချက်ချင်းကိုပြောမှာ ။

နေ့တိုင်း ငါတို့အစေခံတွေက မျက်စိပွင့်လာတိုင်း သခင်လေးစုနဲ့ မတိုးပါစေနဲ့လို့ပဲ ဆုတောင်းနေရတယ် ။သခင်လေးစုနားရောက်တာနဲ့ ဖိအားတင်မကဘူး၊ အနက်ရောင်အငွေ့အသက်တွေ့ကိုပါ ခံစားနေရတာပဲ ။

သူ့ကို ဖြတ်သွားရတဲ့လူတိုင်းက တစ်နေ့လုံး ကံကောင်းမှာ မဟုတ်တော့ဘူး ။

ရလဒ်အနေဖြင့် စောစောနိုးလာသော လွိကျူးက ခြံထဲတွင် အိပ်ချင်မူးတူးဖြင့် ရေဆွဲနေပြီး မကောင်းသောသွေးအနံ့များအပြည့်နှင့် စုရွေ့က ပြေးဝင်လာတာကို တွေ့လိုက်ရသည် ။

လွိကျူးက အကြိမ်အနည်းငယ်လောက်မျက်တောင်ခတ်လိုက်ပြီးနောက် တစ်ဖန်ထပ်ပြီး အကြိမ်အနည်းငယ်လောက် မျက်တောင်ခတ်ကြည့်လိုက်ပြန်သည် ။

" ငါအခုထိ မနိုးသေးဘူးထင်တယ် ။ ပုံရိပ်ယောင်တွေကိုပါ မြင်နေရပြီ ။ အင်း ၊ အဲ့ဒါက..."

" ဘန်း "

စုဝမ်အိမ်ခန်းတံခါးက တစ်စုံတစ်ယောက်၏ ကန်ဖွင့်ခြင်းကို ခံလိုက်ရသည် ။

စုအိမ်တော်တွင် စုရွေ့မှလွဲ၍ ဒါမျိုး ဘယ်သူမှမလုပ်ရဲပေ ။ စုဝမ်က သူမမျက်လုံးကို ပွတ်သပ်လိုက်ပြီး အိပ်ယာ၏ လိုက်ကာစကို ဆွဲဖို့လုပ်လိုက်သော်လည်း တစ်စုံတစ်ယောက်က သူမထက် ခြေတစ်လှမ်းမြန်သွားသည် ။ စုရွေ့က ရုတ်တရက် အိပ်ယာ၏ လိုက်ကာစများကို မတင်လိုက်ပြီး သူ့တစ်ကိုယ်လုံးက စုဝမ်ဆီတိုးဝင်ပြီး သူမကို ဖိထား၏ ။

" ရှင်ကဘာ...အင်း "

စုဝမ်မျက်လုံးကျယ်သွားပြီး သူမနှုတ်ခမ်းပေါ်ရှိ အေးစက်စက်တစ်စုံတစ်ရာကို ခံစားလိုက်မိသည် ။သူမ တစ်ကိုယ်လုံး နေရမသက်သာတော့ပေ ။

သူမ တကယ်ကို စုရွေ့ဆီက အတင်းနမ်းခံနေရတာပဲ။

ကောင်စုတ်လေး ။ ဒီလောင်နျန်ကို အခွင့်ကောင်းယူရဲတယ်ပေါ့ ။တကယ် ရူးသွားပြီပဲ ။

(လောင်နျန်- အဘွားကြီး)

စုဝမ် ဒေါသထွက်သွားသည် ။ သူမက ချက်ချင်းပဲ ထဖို့ ရုန်းကန်လာပြီး ဤအချိန်တွင် စုရွေ့၏ အမူအရာက တကယ်ကို ထုံထိုင်းနေ၏ ။

သူအခုလေးတင် ဘာလုပ်လိုက်တာလဲ ။

သူတကယ်ကို ဘာမှမလုပ်ချင်ခဲ့ပါဘူး ။

သူဝင်လာသည့်အချိန်တွင် တစ်ဟုန်ထိုးတိုးဝင်မိသွားပြီး သူ့ကျောဘက်မှ ဒဏ်ရာကလည်း စတင်ကိုက်ခဲလာ၏ ။ သူ၏ ခန္ဓာကိုယ်က ကောင်းကောင်းမရပ်နိုင်တော့ဘဲ စုဝမ်ကိုယ်ပေါ်ကို လဲကျသွားပြီး ...

သူမကို နမ်းလိုက်မိတာလား ။

စုဝမ်၏ နှုတ်ခမ်းတို့က အလွန်နူးညံ့နေသည် ။ သူမက အခုလေးတင်နိုးလာသောကြောင့် သူမ၏ နှုတ်ခမ်းအပူချိန်က မြင့်နေပြီး ထိုတစ်ခဏအတွင်း စုရွေ့၏ ခန္ဓာကိုယ်က လောင်ကျွမ်းသွားသလို ခံစားလိုက်ရသည် ။

ထိုကဲ့သို့ ခံစားချက်ကို သူမဖော်ပြတတ်သော်လည်း အရမ်းကိုရှင်းလင်းပြီး နက်နဲသိမ်မွေ့သည် ။

" မင်း ဘယ်သူလဲ "

သူက ရုတ်တရက် မေးလိုက်ပြီး သူ့အကြည့်များက စုဝမ်ပေါ်တွင် ကျရောက်နေ၏ ။ သူ့အကြည့်များက ယခုလို နက်ရှိုင်းနေတာမျိုး တစ်ခါမှ မမြင်ရဘူးပေ ။

" မင်း ဘယ်သူလဲ "

အတိအကျကို ထိုတစ်ခဏအတွင်း ရင်းနှီးနေသော ပြိုင်ဘက်ကင်းသည့် အထိအတွေ့ဖြင့် သူ့နှလုံးသားထဲတွင် ဆုပ်ကိုင်ထားသော မရေရောသည့် အရာတစ်ခုကို အတည်ပြုနိုင်သွားသည် ။

လွန်ခဲ့သော လေးနှစ်တုန်းက 'သူမ သေလျှင်တောင် ပြန်မလာဘူး' ဟု ဗြောင်ကျကျပြောသွားသောသူက ယခုပြန်ရောက်လာခဲ့သည် ။

လွန်ခဲ့သော လေးနှစ်တုန်းက သူ့ကို ထိတ်လန့်ကြောက်ရွံ့နေသောအကြည့်ဖြင့် ကြည့်ခဲ့သောသူက ယခုတွင် သူ့ကို သာမန်အတိုင်းသာကြည့်လာသည် ။

လွန်ခဲ့သောလေးနှစ်တုန်းက သူ့ကို စွန့်ပစ်ခံရခြင်း ၊ သစ္စာဖောက်ခံရခြင်းကို ခံစားစေခဲ့သည့်သူ ၊ သူ့ကို ဘယ်တုန်းကမှ ခွင့်လွှတ်မပေးလိုသည့်သူက ယခုတွင် သူ့နှလုံးသားကို ယောက်ယတ်ခတ်အောင်လုပ်နေ၏ ။

သုန်မှုန်နေတတ်သော သူများ၏ စိတ်ထားက အမြဲပြင်းထန်သည် ။

ထို့ကြောင့် ထိုနှစ်တုန်းက သူ့ကျယ်ကျဲဆီမှ စွန့်လွှတ်ခံလိုက်ရသော စုရွေ့က သူ့ကျယ်ကျဲလက်ထပ်သွားတာနှင့် တစ်ပြိုင်နက် စုမိသားစုကို ထိန်းချုပ်လိုက်သည် ။ သူက စုဝမ် နှင့် စုအိမ်တော်ကြားတွင် အရင်အဆက်အသွယ်ဖြတ်လိုက်ပြီး စုဝမ် နှင့် လွိကျူးကိုပါ အန်းဝူနှင့်စောင့်ကြည့်ခိုင်းထားသည် ။ စုဝမ်က အအေးနန်းဆောင်သို့ မောင်းထုတ်ခံရတာကို သိနေလျက်နှင့်တောင် စုရွေ့က ခေါင်းမာစွာဖြင့် လျစ်လျူရှူနေ၏ ။

မင်းက သစ္စာဖောက်ပြီး စွန့်လွှတ်ဖို့ကို ရွေးချယ်လိုက်မှတော့ ကံကြမ္မာကို နားလည်သဘောပေါက်ပြီး လက်ခံရမှာပေါ့ ။

အကယ်၍ စုဝမ်ကသာ ဇွဲကောင်းကောင်းဖြင့် သူမလမ်းအတိုင်းဆက်လျှောက်နေလျှင် သူမက ဝမ်အိမ်တော်တွင် သေသွားလျှင်တောင်မှ သူက လျစ်လျူမရှူဘဲ နေမိမှာမဟုတ်ဘူးလို့ တွေးမိသည် ။

သို့သော် သူမက ရုတ်တရက် သူ့ကို သူမ၏ အားနည်းမှုကို ပြလာ၏ ။

စုရွေ့ မှတ်ဉာဏ်ထဲရှိ စုဝမ်က သူမသေသွားလျှင်တောင်မှ ရွှမ်းယွမ်ရွေ့ကို လက်လွှတ်လိမ့်မည် မဟုတ်ပေ ။

သူ့အစ်မကို သူက သူ့ကိုယ်သူထက်တောင် ပိုနားလည်သေးသည် ။

ထို့ကြောင့် စုဝမ်ကို ကြိုဆိုပြီး စုအိမ်တော်သို့ ပြန်လာခိုင်းသည့်အချိန်ကတည်းက စုရွေ့က တိတ်တဆိတ် သူမကို လေ့လာနေ၏ ။ သူ့နှလုံးသားထဲတွင် တစ်ခုခုကို မသေမချာ ခံစားမိနေသော်လည်း ဘာပဲဖြစ်ဖြစ် သင့်တော်သောအဖြေကို ရှာမတွေ့ပေ ။

ဒီနေ့ ၊ အခုအချိန်မှာ သူအချိန်အကြာကြီးရှာနေရတဲ့ အဖြေကို နောက်ဆုံး ရှာတွေ့သွားပြီ ။

" ရှင်ဘာပြောလိုက်တာလဲ ။ "

စုရွေ့က သူမအား ထိုမေးခွန်းကိုမေးလာပြီး ထိုတစ်ခဏတွင် စုဝမ်၏ စိတ်အခြေအနေကလည်း မတည်ငြိမ်တော့ပေ ။ စုရွေ့၏ မေးခွန်းကြောင့် ၊ သူက သူမကို မေးနေသော်လည်း သူ့မျက်လုံးထဲတွင် အဖြေကရှိနေပြီဆိုတာကို သူမတွေ့လိုက်ရသည် ။

" မင်းက သူမ မဟုတ်တာကို ကိုယ်သိတယ် ။ "

စုရွေ့၏ အသံက အလွန်ကို တိကျနေ၏ ။

" ကျွန်မ..."

ထိုတစ်ခဏအတွင်း သူမ ဘာပြောရမလဲဆိုတာကို စုဝမ်တွေးလိုက်သည် ။

ရွှမ်းယွမ်ရွေ့က သူမကို နာကျင်စေပြီးတဲ့နောက်မှာ သူမရဲ စိတ်အခြေအနေကလည်း လုံးဝကို ပြောင်းလဲသွားတာမျိုး ဒါမှမဟုတ် အဲ့လိုတစ်ခုခုပေါ့ ။

ထိုကဲ့သို့ ဆင်ခြေမျိုးက သူမအကြိုက်နှင့် မကိုက်သော်လည်း သူမ စကားစပြောမည့်အချိန်တွင် စုရွေ့ ကထပ်ပြီး ဖြတ်ပြောလိုက်သည် ။

" မင်းပြောခဲ့တာ မှန်တယ် ။ ကိုယ်မင်းကို လက်ထပ်လို့ရတယ် ။ "

" ကျွန်မက ရှင့်ရဲ့ ကျယ်ကျဲလေ ။ ရှင် ခေါင်းရှုပ်..."

" မင်းက ကိုယ့်ကျယ်ကျဲမဟုတ်ဘူး ။ "

ခိုင်မာပြီး တိကျပြတ်သားသော အသံက စုဝမ်ကို နောက်တစ်ခါထပ်ပြီး စကားဖြတ်ပြောလိုက်သည် ။စုရွေ့က သူမကို ကြည့်နေပြီး ကျဥ်းမြောင်းသော မျက်ဝန်းတို့က တစ်ခါမှ မရှိဘူးသော စိတ်အခြေအနေကို ဖော်ပြနေ၏ ။

" ကိုယ် မင်းကို လက်ထပ်မယ် ။ "

ဤစကားကို ပြောပြီးနောက် စုဝမ်၏ ခံစားချက်ကို ဂရုစိုက်မနေတော့ဘဲ စုရွေ့၏ ခန္ဓာကိုယ်က စုဝမ်အပေါ်လဲကျသွားပြီး သတိလစ်သွားတော့သည် ။

သူ့ကျောဘက်က ဒဏ်ရာများနှင့် အလွန်ကို ရုပ်ပျက်ဆင်းပျက်ဖြစ်နေတာကို မြင်ရသောအခါ စုဝမ်၏ မျက်လုံးထဲ၌ အကြင်နာမဲ့သောအရိပ်ယောင်များ ပေါ်လာ၏ ။

စုရွေ့ ..ဒီချိန်ကိုက်ဗုံးကတော့ အခုထိပြဿနာများနေတုန်းပဲ ။ပြီးတော့ ဒီလိုအရေးကြီးတဲ့အဆင့်မှာ ဖြစ်ရတယ်လို့ ။

ဤတစ်ခဏအတွင်း စုဝမ်က စုရွေ့၏ ခန္ဓာကိုယ်ကို သူမအပေါ်မှ ဖယ်ဖို့ နည်းလမ်းပေါင်း ၃၂ ခုလောက်စဥ်းစားလိုက်သည် ။ ဤအချိန်တွင် အခန်းတံခါးအပြင်ဘက်မှ လွိကျူး၏ အသံက ထွက်ပေါ်လာ၏ ။

လွိကျူး၏ အသံထွက်လာတာနှင့် စုဝမ်က သူမ၏ အောက်ခံအဝတ်အစားတို့ကို ဆွဲဖြဲလိုက်ပြီး သတိလစ်နေသော စုရွေ့ကို အားကုန်သုံးကာ သူမအပေါ်သို့ ထပ်ပြီး ဆွဲတင်လိုက်သည် ။

" ငါ့ကို ကယ်ပါ ။ လွိကျူး ငါ့ကို ကယ်ပါ ။ အဖေ .."

စုဝမ်၏ အသံက အားနည်းပြီး ထိတ်လန့်နေ၏ ။

" ဘန်း "

လွိကျူးလက်ထဲတွင် ကိုင်လာသော ရေခွက်က မြေကြီးပေါ်သို့ လွတ်ကျသွားသည် ။ သူမက အခန်းထဲကို မကြည့်ရဲတော့သလို ဒုတိယအကြိမ်တွင် ချက်ချင်းပဲ ပြေးထွက်သွား၏ ။

လွိကျုး၏ ဝေးကွာသွားသောခြေသံကို ကြားလိုက်ရပြီး စုဝမ် စိတ်သက်သာရာရသွားသည် ။ ထိုကဲ့သို့သော အကျင့်မကောင်းသည့်နေရာ၌ နာမည်ကြီးသော စုရွေ့လို လူမျိုးကိုအကွက်ဆင်ဖို့က လုံးဝမလွယ်ကူပေ ။

တစ်ခဏအတွင်း စုယွီဖုန်း၏ သတ်ဖြတ်လိုသော ပုံစံက စုဝမ်၏ ခြံဝင်းသို့ ရောက်ရှိလာ၏ ။သူ့နောက်တွင် သူမဆီသို့ အမြန်ပြန်ပြေးလာသော လွိကျူး ရှိနေသည် ။

" မင်းဒီလို ..စက်ဆုပ်စရာကောင်းတဲ့ကောင်ကတော့"

စုယွီဖုန်းတံခါးမှ ဝင်လာတာနှင့် တစ်ပြိုင်နက် ဆက်တိုက်လှုပ်ရမ်းနေသော အိပ်ယာ၏လိုက်ကာကိုတွေ့လိုက်ရပြီး သူမကုတင်ပေါ်ရှိ စုရွေ့၏ ပုံစံကိုလည်း ဝိုးတဝါးတွေ့လိုက်ရသည် ။ ယခုတွင် သူက စုဝမ်အပေါ်တွင် လဲနေပြီး သူ့အောက်ရှိ စုဝမ်က ငိုယိုကာ အကူအညီတောင်းနေ၏ ။

ဤမြင်ကွင်းကို တွေ့လိုက်ရသောအခါ စုယွီဖုန်းက ဒေါသတထောင်းထောင်းထလာပြီး ဆင်ခြင်တုံတရားပါ ကင်းမဲ့သွားရတော့သည် ။ သူတံခါးဘောင်မှ ဖြတ်လာတော့မည်အချိန်မှာပဲ သူ၏ အတွင်းအားတို့ကို အကုန်သုံးကာ အိပ်ယာပေါ်တွင် ရှိနေသေးသော စုရွေ့ကို ဖြတ်ရိုက်လိုက်သည် ။

မနေ့ညတုန်းက စုယွီဖုန်း ဒဏ်ရာရထားသော်လည်း တစ်ညလုံး သူပြန်အားပြည့်နေပြီဖြစ်သည် ။ ထို့ကြောင့် ယခုတွင် သူ၏ အခြေအနေက အတော်ကောင်းနေသည် ။ သူရိုက်ချက်က ဒေါသများပါနေပြီး လုံးဝထိန်းချုပ်ထားခြင်းမရှိပေ ။ ရိုက်ချက်နှင့် အတူပါလာသော လေက သွေးရူးသွေးတန်းနှင့် အန္တရာယ်များသော လေထုကိုပါ သယ်ဆောင်လာ၏ ။

ဘယ်လောက်တောင် ကံဆိုးလိုက်သလဲ ။

ထိုတစ်ခဏတွင် စုဝမ်လည်း ကပ်ဆိုးအခြေအနေကို ခံစားလိုက်မိသည် ။ထိုကဲ့သို့ ဆင်ခြင်တုံတရားမဲ့သွားသော အချိန်တွင် စုယွီဖုန်း၏ တိုက်ခိုက်မှုက အလွန်ပြင်းထန်၏ ။ ထို့ကြောင့် ယခုတွင် စုဝမ်၏ ခန္ဓာကိုယ်ကလည်း ရိုက်ချက်မှလာသော လေဖြင့် လွှမ်းခြုံသွား၏ ။သူမက သူမဘဝအတွက် မစိုးရိမ်သော်လည်း သူမ၏ ငယ်ရွယ်သောခန္ဓာကိုယ်နှင့်သာဆိုလျှင် ထိုရိုက်ချက်၏ လေရိုက်ခတ်မှုဖြင့်တောင် ပြန်နာလန်ထူဖို့ အချိန်အတော်ယူရလိမ့်မည် ။

ထုံးစံအတိုင်း ထိုကဲ့သို့ အန္တရာယ်နှင့် နီးကပ်လာချိန်တွင် အသက်ဘေးကပ်ဆိုးကို ခံစားမိသည့်အလား တစ်ချိန်လုံး သတိလစ်နေသော စုရွေ့က မျက်လုံးပွင့်လာ၏ ။

ထိုမျက်လုံးများထဲရှိ စူးရှမှုက ရပ်တန့်လို့မရပေ ။

ထိုအချိန်တွင် လူနှစ်ယောက်၏ အကြည့်က တစ်တန်းထဲဆုံသွား၏ ။ စုရွေ့က သူ့အောက်တွင်ရှိနေသော စုဝမ်ကို တင်းတင်းဖက်ပြီး တစ်ဖက်သို့ ရွေ့လိုက်ရင်း သူမကို သူ၏ ခန့်ညားသောခန္ဓာကိုယ်ဖြင့် ကာပေးထားသည် ။ သူက ဒဏ်ရာရနေသော နောက်ကျောဖြင့် စုယွီဖုန်း၏ ရိုက်ချက်ကို အားကုန်သုံးကာ တတ်နိုင်သမျှ တောင့်ခံလိုက်သည် ။

" ဖူး.. "

ပူနွေးသော သွေးများက စုဝမ် မျက်နှာပေါ် ပေကျံကုန်၏ ။ သူမက မျက်တောင်ပင်မခတ်ဘဲ သူမနှင့် အလွန်နီးကပ်နေသော စုရွေ့ကို မယုံကြည်နိုင်သလို ကြည့်နေ၏ ။

သူမ၏ နှုတ်ခမ်းက လှုပ်ရှားသွားပြီး တစ်ခုခုပြောချင်သော်လည်း စုယွီဖုန်းက သူမကို ဘေးသို့ ဆွဲမလိုက်သည် ။

" ရှောင်ဝမ် ၊ အဖေက သမီးရဲ့ နစ်နာမှုကို ပြန်ပေးဆပ်ခိုင်းမယ် ။ငါ ဒီတိရစ္ဆာန်လေးကို သေအောင်ကို ရိုက်ပစ်မယ် ။ "

တစ်ဖက်တွင် စုယွီဖုန်းက စုဝမ်၏ ဖရိုဖရဲဖြစ်နေသောအဝတ်အစားများကို ကာပေးဖို့ ဝတ်ရုံကို ရှာနေပြီး တစ်ဖက်တွင် သူ၏ နီရဲနေသော မျက်လုံးတို့က အိပ်ယာပေါ်တွင် လဲနေသည့် သေလုဆဲဆဲ စုရွေ့ကို ကြည့်လိုက်သည် ။

" သူ "

စုရွေ့က ပါးစပ်အပြည့် သွေးများကို အန်ထုတ်လိုက်ပြီး သူ၏ မျက်လုံးတို့က ပမာမခန့်အမူအရာမျိုးရှိနေဆဲဖြစ်သည် ။

" ကျွန်တော်က တိရိစ္ဆာန်လေးဆိုရင် အဖေကဘာလဲ ။ တိရစ္ဆာန်ကြီးလား ။ "

" လူယုတ်မာ ၊ သားမိုက်၊ ငါမင်းကို သေအောင်ကို ရိုက်ပစ်မယ် ။ "

စုရွေ့ကြောင့် ထပ်ပြီး ဒေါသထွက်လာသော စုယွီဖုန်းက တစ်ဟုန်ထိုးတိုးလာပြီး သူ့ကို ထပ်ရိုက်ချင်သော်လည်း စုရွေ့က ဖြည်းဖြည်းချင်း ခက်ခက်ခဲခဲဖြင့် သူ့ကိုယ်ကို ကြွလိုက်ပြီး သူ့အင်္ကျီရင်ဘက်ထဲတွင် အမြဲဆောင်ထားနေကျ ကျားတံဆိပ်ကို ထုတ်ပြလိုက်သည် ။ သူက စုယွီဖုန်းကို ကြည့်ရင်း လှောင်နေသည့် ပုံမျိုး ဖြစ်နေ၏ ။

" သခင်ကြီးစု ၊ ခင်ဗျားရဲ့ လုပ်ဖော်ကိုင်ဘက်ကို သတ်တယ်ဆိုတာက တိုင်းပြည်ကို သစ္စာဖောက်တာနဲ့ အတူတူပဲ ။ "

တစ်စုံတစ်ယောက်က တိုင်းပြည်ကို သစ္စာဖောက်တာ...

ဤစကားတို့က စုယွီဖုန်းကို အကြီးအကျယ်လှုံ့ဆော်ပေးလိုက်ပြီး ရွေးချယ်စရာမရှိ သူ့လှုပ်ရှားမှုတို့ကို အတင်းရပ်တန့်စေလိုက်ရသည် ။

ဤအချိန်တွင် စုရွေ့က သူ့သားဖြစ်နေရုံသာမကလက်ရှိ မင်းဆက်၏ စစ်သူကြီးတစ်ယောက်လည်း ဖြစ်နေတာကို အမှတ်ရလိုက်သည် ။သူက ကြီးမြတ်သော ရှမင်းဆက်ခေတ်၌ မရှိမဖြစ် စစ်နတ်ဘုရားလို ပြရုပ်မျိုး ဖြစ်၏ ။

စုယွီဖုန်း လက်သီးဆုပ်ထားပြီး ဖြေလျော့လိုက်သည်။ တိုင်းပြည် နှင့် မိသားစုဝင်ကြားတွင် သူ့တစ်ဘဝလုံးနှစ်မြှုပ်ထားသော တိုင်းပြည်ကိုသာ နောက်ဆုံး၌ ရွေးချယ်လိုက်ရသည် ။

" ရှောင်ဝမ် ၊ အဖေက မင်းကို အဝေးကို ခေါ်သွားပေးမယ် ။"

စုယွီဖုန်းက စုဝမ်ကို ခေါ်သွားတာနှင့် စုရွေ့၏ တင်းမာသောအမူအရာက ချက်ချင်း ဖြူလျော့လာ၏ ။

" ဖူး "

သူက ရုတ်တရက် ပါးစပ်အပြည့် သွေးတစ်ပွက်အန်ထုတ်လိုက်ပြီး သူ့တစ်ကိုယ်လုံးကလည်း အိပ်ယာပေါ်သို့ လဲကျသွား၏ ။ သူ့မျက်လုံးများ ထပ်မမှိတ်သွားခင် စုရွေ့က စကားအနည်းငယ်ကို တီးတိုးရေရွတ်လိုက်သည် ။

" တကယ် ရက်စက်တာပဲ ။ "

🚩

Chapter 13

Report Page