Chapter 12

🚩Ch -12

Arc -1.12 မင်းသမီးအစားထိုး ထိမ်းမြားလက်ထပ်ခြင်း

စုဝမ်က ဝိုင်ခွက်ကို မြှောက်လိုက်ချိန်၌ ခန်းမတစ်ခုလုံးက တိတ်ဆိတ်သွား၏ ။ ထိုင်နေသော ထိုအမျိုးသားကို အချို့က မယုံကြည်နိုင်သောအကြည့် ၊ အချို့က အံ့အားသင့်နေသောအကြည့်ဖြင့် ကြည့်နေကြသည် ။

ယခုတွင် အားလုံးက ရှင်းရှင်းလင်းလင်း သဘောပေါက်သွားကြသည် ။ ယနေ့ စုအိမ်တော်၏ ဧည့်ခံပွဲက အားလုံးကို ထပ်ပြီးကြံစည်မနေတော့ရန် ပြောပြလိုက်ခြင်းဖြစ်၏ ။ သူတို့က သူတို့၏သားမက်ကို ရွေးချယ်ထားပြီးသား ဖြစ်သည်။

ရွှမ်းယွမ်ရွေ့က သူ့လက်ထဲရှိ ဝိုင်ခွက်ကို တင်းတင်းဆုပ်ထားလိုက်သည် ။ သူက သူ့ခွန်အားကို ထိန်းထားဖို့ ကြိုးစားသော်လည်း အကောင်းစားကြွေထည်ခွက်၌ အက်ကွဲရာများက ပေါ်လာ၏ ။ ဝိုင်စက်များက သူ့လက်ဖဝါးထဲ၌ ဟိုတစ်ကွက် ဒီတစ်ကွက် ပေကျံသွားသည် ။

ဘာလို့ သူလဲ ။

သူက ဘယ်လိုလုပ် ဖြစ်နိုင်ရတာလဲ ။

ရွှမ်းယွမ်ရွေ့လက်မခံနိုင်သလို ခံစားနေရသော်လည်း အခြားသောဧည့်သည့်များကတော့ " အဲ့ဒီလိုလား " ဟူသည့် အမူအရာကိုသာ ဖော်ပြထားသည် ။

" တော်ဝင်သမားတော်စီး "

စုဝမ်က ထိုနေရာတွင် ရပ်နေပြီး သမားတော်စီးကို သိမ်မွေ့စွာကြည့်လိုက်သည် ။

" ကျွန်မ ..ရှင့်ကို လေးစားပါတယ် ။ "

သူမက အခုနက ပြောလိုက်သောစကားကို တစ်ခါထပ်ပြောပြီး သမားတော်စီးကို ဝေဝါးနေသောအတွေးထဲမှ ဆွဲထုတ်လိုက်သည် ။ သမားတော်စီးက စိတ်လှုပ်ရှားစွာဖြင့် ရပ်နေပြီး စုဝမ်ကို တည့်တည့်ကြည့်နေ၏ ။

" စု...ကျွင်းကျူ..."

လျှာများထုံနေသကဲ့သို့ စိတ်လှုပ်ရှားနေသော သမားတော်စီးကို ကြည့်ရင်း စုဝမ်၏ နှုတ်ခမ်းတို့က ကွေးတက်သွားသည် ။

" ရှင်မရှိဘဲနဲ့ ၊ ဒီနေ့ရဲ့ ကျွန်မဆိုတာလည်း ရှိလာမှာမဟုတ်ဘူး ။ "

၎င်းက တည့်တိုးအဆန်ဆုံးဖွင့်ဟဝန်ခံခြင်းဖြစ်ပြီး သမားတော်စီး၏ လည်ပင်းက ချက်ချင်းပဲ နီရဲလာတော့သည် ။ သိမ်မွေ့ပုံရသောမျက်ဝန်းနှစ်စုံက စိတ်လှုပ်ရှားမှုတို့ဖြင့် လောင်ကျွမ်းတော့မည့် အတိုင်းပင်။

" ဒါက ကျွန်တော်လုပ်သင့်လုပ်ထိုက်တာပါပဲ ။ "

သမားတော်စီးက စုဝမ်ကမ်းပေးသော ဝိုင်ခွက်ကို ယူလိုက်သည် ။ ဤအချိန်တွင် စုဝမ်အတွက် သူလုပ်ပေးခဲ့ရသမျှ အားလုံးက ထိုက်တန်သွားပြီဟု တွေးမိသည် ။

လူနှစ်ယောက် အလယ်တွင် စားပွဲနိမ့်တစ်လုံးဖြင့် ခြားထားပြီး သူတို့ကတစ်ယောက်ကိုတစ်ယောက် ကြင်နာစွာကြည့်နေ၏ ။ သူတို့ကိုနှောင့်ယှက်မိမှာစိုးသည့်အလား မည်သူကမှ အသံမပြုရဲပေ ။ ခန်းမထဲရှိ လေထုကအနည်းငယ် စိမ်းသက်သွားသည် ။

စုဝမ်က သမားတော်စီး ဝိုင်သောက်ပြီးတဲ့အထိ စောင့်နေပြီးနောက် သူမ၏ ခန္ဓာကိုယ်က သိပ်နေလို့မကောင်းဖြစ်နေသည် ဟူသည့်ဆင်ခြေဖြင့် ခန်းမထဲမှ ထွက်သွားသည် ။ အားလုံးက တဖြည်းဖြည်းပုံမှန်ပြန်ဖြစ်လာ၏ ။

ကျွင်းကျူက ဒီအတိုင်းပဲ ထွက်သွားတာလား ။ ကြည့်ရတာ ငါတို့က သူတို့နှစ်ယောက်ရဲ့ဆက်ဆံရေး ဘယ်လောက်လိုက်ဖက်ညီလဲဆိုတာ မျက်မြင်ဖြစ်သွားအောင်ပဲ ဖိတ်ကြားထားခံရတာထင်တယ် ။

တကယ်တမ်းတွင် လူအများစုက သူတို့နှလုံးသားထဲ၌ မတည်မငြိမ်ဖြစ်နေသော်လည်း ဗိုလ်ချုပ်ကြီးစုက ဖိအားများလွှင့်ထုတ်ထားပြီး ဗိုလ်ချုပ်ငယ်လေးစုက တစ်ချိန်လုံး ပြုံးနေ၏ ။ တကယ်ပဲ လူတွေကို ချောက်ချားစေပြီး သူတို့ကိုကြည့်ရင်း ပျာယာခတ်သွားစေသည် ။

ကံကောင်းစွာဖြင့် ထိုကဲ့သို့ စိတ်မသက်မသာဖြစ်နေချိန်တွင် အားလုံးက သူတို့ထက်ပိုပြီး စိတ်သောကရောက်နေသောသူကို ရှာဖွေနေကြသည် ။ ထို့ကြောင့် ဧည့်သည်များက ရွှမ်းယွမ်ရွေ့၏ သုန်မှုန်နေသောမျက်နှာကိုကြည့်ရင်း ချက်ချင်းပဲ သူတို့၏ ထိခိုက်လွယ်သောစိတ်ကို ဖြေသိမ့်နိုင်သွားသည် ။

အရှင်သားယွဲ့ဝမ်လည်း ဒီကိုရောက်နေတယ်ဆိုတာ မမြင်ဘူးလား ။ ဘာလို့ သူ့မျက်နှာကို ကြည့်မနေတာလဲ ။ သူကိုင်ထားတဲ့ ဝိုင်ခွက်တောင်မှ အစိတ်စိတ်အမွှာမွှာကွဲသွားပြီ ။

ညနေခင်းတွင် သူက အားလုံး၏ဆွေးနွေးစရာတစ်ခုဖြစ်လာတာကို လုံးဝသတိမထားမိဘဲ ရွှမ်းယွမ်ရွေ့က ချက်ချင်း စုအိမ်တော်၏ အနောက်ပေါက်မှ ထွက်ခွာသွားတော့သည် ။ ယခုလောလောဆယ်၌ သူ့နှလုံးသားထဲတွင် မီးတောက်လောင်နေပြီး စိတ်ထွက်ပေါက်ပေးမှ ရတော့မည် ။

လတ်တလောတွင် ယဲ့ကျီးဟွာက တိတ်ဆိတ်နေ၏ ။ရွှမ်းယွမ်ရွေ့၏ မယုံသင်္ကာဖြစ်မှုများနှင့် လျစ်လျူရှူထားခြင်းတို့က လှုံ့ဆော်မှုဖြစ်စေပြီး လတ်တလော သူမ အခန်းအောင်းနေတာပဲဖြစ်နိုင်သည် ။ရံဖန်ရံခါ သူမက အနီရောင် နှင့် အစိမ်းရောင်များပါသောပန်းချီကားတို့ကို ရေးဆွဲတတ်ပြီး သူမ၏ ဂယောင်ချောက်ချားဖြစ်သည့် အကြိမ်ရေကလည်း တဖြည်းဖြည်းလျော့နည်းလာသည် ။

ယနေ့ညတွင် ယဲ့ကျီးဟွာက ချင်းလျိုပြုစုပြီးနောက် ပုံမှန်ထက် စောစောအိပ်ပျော်သွား၏ ။ သူမ အိပ်ပျော်နေချိန်၌ အသက်မရှူနိုင်လောက်အောင်အထိ တစ်စုံတစ်ရာသူမအပေါ်၌ ဖိထားလိမ့်မည်ဟု မထင်ထားမိပေ ။

ဤကဲ့သို့ အသက်မရှူနိုင်သော ခံစားချက်က သူမစိတ်ထဲ၌ ရုပ်ပုံများစွာကို ပေါ်လာစေသည် ။

ယဲ့အိမ်တော်က မျိုးဆက်သုံးဆက်တိုင်ကွပ်မျက်ခံရပြီး သူမကိုယ်တိုင်ကလည်း သေခါနီးဆဲဆဲ ခွင့်လွှတ်ပေးရန် တောင်းဆိုနေရသည် ။ စင်ပေါ်၌ ခေါင်းဖြတ်ခံရခြင်း ၊ အနီရောင်သွေးရဲရဲများ ဆက်တိုက်စီးဆင်းနေခြင်း ၊ မျှော်လင့်ချက်မရှိတော့သော နာကျင်မှု....

ဤအရာများက သူမ မဖြတ်တောက်နိုင်သော အတိတ်မှ အတွေ့အကြုံများဖြစ်သည် ။

ဘာလို့အဲ့လိုဖြစ်ရတာလဲ ။ သူမ အားလုံးကို အစကနေ ပြန်စပြီးသွားပြီလေ ။ ယဲ့ကျီးကျင် နဲ့ ရွှမ်းယွမ်ချင်းကိုလည်း သေချာပေါက် သတ်ပြီးသွားပြီ ။ ဘာလို့ အဲ့လို စိတ်ပျက်စရာတွေနဲ့ ကြောက်ရွံ့မှုတွေကို ခံစားနေရသေးတာလဲ ။

သူတို့ရဲ့ ဝိဉာဥ်တွေက သူမကိုလက်တုံ့ပြန်ဖို့ ပြန်ရောက်လာတာလား ။

ကြီးမြတ်သော ရှမင်းဆက်ခေတ်၌ လူတို့က သရဲတစ္ဆေ နှင့် နတ်ဘုရားများကို ယုံကြည်ကြသည် ။ ထို့ကြောင့် ပြန်လည်မွေးဖွားလာသော ယဲ့ကျီးကျင်က ထိုအရာများပေါ်၌ ပိုပြီး ယုံကြည်မှုရှိ၏ ။

သရဲထံမှ ထပ်ပြီး အဖိခံထားရပြီဟု တွေးလိုက်မိသောအခါ " ကြမ်းကြုတ်သောသရဲ " နှင့် ရင်ဆိုင်ခဲ့ဖူးသော ယဲ့ကျီးဟွာက ချက်ချင်းပဲ သူမ ခေါင်းအုံးအောက်မှ ကတ်ကြေးကို ယူလိူက်ပြီး အားကုန်သုံးကာ ထိုးစိုက်လိုက်သည် ။

" ငါနင့်ကို သတ်မယ် ၊ နင်တို့ အားလုံးကို သတ်ပစ်မယ် ။ "

" ငါ့ကို ထိခိုက်အောင်ဖို့ မစဥ်းစားရင် ပိုကောင်းမယ်။ ငါက အခုယွဲ့ဝမ်ဖေးပဲ ။ နင်တို့အားလုံး ငါ့ကံကြမ္မာကို ပြောင်းလဲဖို့ မတွေးထားတာက ပိုကောင်းမယ် ။ "

အခန်းထဲရှိ မသဲကွဲသော အလင်းရောင်အောက်တွင် ယဲ့ကျီးဟွာက အသံကျယ်ကျယ်ဖြင့် ထပ်ခါထပ်ခါ အော်ဟစ်နေပြီး သူမ မျက်လုံးက ရက်စက်မှုများပြည့်နေ၏ ။ ဤအချိန်တွင် သူမ၏ မျက်လုံးများက နီရဲနေပြီး ကြောက်လန့်မှုများပြည့်နေသည့်အပြင်ရူးသွပ်နေသည့် အရိပ်ယောင်တို့လည်း ပါဝင်နေသည် ။

တစ်ခါသေပြီးတဲ့သူတွေ သေရမှာမကြောက်တော့ဘူးလို့ ဘယ်သူကပြောလဲ ။ တစ်ခါသေဖူးတဲ့သူတွေကပဲ အသက်ရှင်ဖို့က ဘယ်လောက်အရေးကြီးတယ်ဆိုတာကိုသိကြမှာ ။

ဤစိတ်ပင်ပန်းရသော နေ့ရက်များအတွင်း သူမက လုံးဝခြေကုန်လက်ပန်းကျနေသော်လည်း သူမ နှလုံးသားထဲတွင်တော့ သူမသေချာပေါက်ရှင်သန်ရမည်ဟူသည့် အသိကရှိနေသည် ။

ထို့ကြောင့် ဤရူးသွပ်သွားသည့်တစ်ခဏတွင် သူမက သူမ၏ အစွယ်များကို ထုတ်ပြလာ၏ ။ ၎င်းက ရွှမ်းယွမ်ရွေ့ သိထားသည့် နူးညံ့ပြီးကြင်နာတတ်သော ပုံစံမျိူးမဟုတ်ဘဲ ယုတ်မာပြီး ဆိုးရွားသောပုံစံမျိုး ဖြစ်နေသည် ။ ဤအခြေအနေထိရောက်အောင် တွန်းအားပေးခံရသော မည်သူမဆို ထိုကဲ့သို့ အဆုံးသတ်ရလိမ့်မည် ။

ရွှမ်းယွမ်ရွေ့ အတော်ကြာအောင် မှင်သက်သွားမိသည် ။ သူ၏ လှုပ်ရှားမှုများ တောင့်တင်းသွားသည့် တစ်ခဏတွင် ယဲ့ကျီးဟွာ၏ ကတ်ကြေးက သူ့အင်္ကျီလက်ကို ထိုးဖောက်သွားပြီး သူ့လက်မောင်း၌ သွေးများစွန်းထင်းသွား၏ ။ ရုတ်တရက် နာကျင်မှုက ရွှမ်းယွမ်ရွေ့ကို သတိပြန်ဝင်သွားစေသည် ။သူက လက်မြှောက်ကာ ယဲ့ကျီးဟွာလက်ထဲရှိ ကတ်ကြေးကို အတင်းလုယူလိုက်ပြီး သူ့လက်ဖဝါးကို လွှဲရိုက်သည် ။

" အပျက်မ "

ဤရိုက်ချက်တစ်ချက်က ခုနှစ်ဆလောက်အားပါပြီး ယဲ့ကျီးဟွာ၏ မျက်နှာ၌ လက်ငါးချောင်းရာ ထင်သွားသည် ။

သတိပြန်ဝင်လာသည်အထိ ရိုက်ခံလိုက်ရသော ယဲ့ကျီးဟွာက သူမ မျက်လုံးရှေ့တည့်တည့်တွင်ရှိနေသာ ရွှမ်းယွမ်ရွေ့ကို ဝေဝါးစွာကြည့်လိုက်သည်။

" ဝမ်...ဝမ်ယဲ "

သူမ ရက်ပေါင်းများစွာကြာအောင် မမြင်ရသေးသော သူမ၏ ယောက်ျားက ညလယ်ကြီး သူမဆီ ရောက်လာတာကို တွေ့လိုက်ရသောအခါ သူမနှလုံးသားက ပျော်ရွှင်သွားရပြီး ရွှမ်းယွမ်ရွေ့ ရင်ခွင်ထဲသို့ တိုးဝင်ဖို့လုပ်လိုက်သည် ။ သို့သော် ရွှမ်းယွမ်ရွေ့က ရုတ်တရက် အိပ်ယာပေါ်မှ ထသွားပြီး ယဲ့ကျီးဟွာကို ရွံရှာမုန်းတီးသလို ကြည့်လိမ့်မည်ဟု သူမ မထင်ထားမိပေ ။

" သွားစမ်း ၊ ငါ့ကို လာမထိနဲ့ ။ "

အစပိုင်းတွင် ယဲ့ကျီးဟွာနှင့် လက်ထပ်ခါစက ရွှမ်းယွမ်ရွေ့မှာ ဤအမျိုးသမီး၏ အလှ နှင့် နူးညံ့မှူကြောင့် ဆွဲဆောင်ခံလိုက်ရသည် ။ သေချာပေါက် သူမက ကာမဆက်ဆံရာတွင်လည်း သူ့လိုအင်ကို ဖြည်းဆည်းဖို့ အားကုန်သုံးခဲ့သေးသည် ။ ထိုကဲသို့ မိန်းမမျိုးနှင့် ဆက်နွယ်ရသော ဘယ်လိုယောကျ်ားမျိုးမဆို ရမ္မက်များက မြင့်တက်လာလိမ့်မည် ။

သို့သော် ထိုမိန်းမက ရူးနှမ်းလာပြီး အားလုံးကို ဖုံးကွယ်ထားသည့် ယုတ်မာရက်စက်သော မျက်နှာမျိုးကို ထုတ်ပြလာချိန်၌ ရွှမ်းယွမ်ရွေ့ ရုတ်တရက် စိတ်ဝင်စားမှုမရှိတော့တာကို ခံစားလိုက်ရသည် ။

အဲ့လို အမှိုက်မျိုးအတွက် သူက မမျှော်လင့်ထားလောက်အောင် စိတ်ထွေပြားသွားပြီး နှစ်ပေါင်းများစွာကြာအောင် သူမျှော်လင့်ခဲ့ရတဲ့ ကျွင်းကျူကို စွန့်ပစ်လိုက်မိတာလား ။

၎င်းက သူ့အမှားဖြစ်တာကို ရွှမ်းယွမ်ရွေ့က ဝန်မခံချင်ပေ ။ ဆန့်ကျင်ဘက်အားဖြင့် ၎င်းကို သူတွေးမိလေလေ ၊ ယဲ့ကျီးဟွာ၏ အမှားဟု သူခံစားရလေလေ ဖြစ်သည် ။ သူမက တိတ်တဆိတ်အကွက်ရွှေ့ပြီး သူ့ကို ချဥ်းကပ်ကာ သူနှင့် စုဝမ်ကြား စိတ်ဝမ်းကွဲပြားအောင် လုပ်ခဲ့သည် ။

ဝမ်အိမ်တော်တွင် ရွှမ်းယွမ်ရွေ့က အလွန်အမျက်ထောင်းထောင်းထနေသော်လည်း စုအိမ်တော်ကတော့ တိတ်ဆိတ်နေ၏ ။

ထိုဧည့်သည့်များ ထွက်သွားပြီးနောက်တွင် စုယွီဖုန်း နှင့် စုရွေ့တို့ တိုက်ခိုက်ကြလိမ့်မည်ဟု မည်သူမှ မထင်ထားပေ ။

အစောကတည်းက ဤသားမိုက်စုရွေ့ကို သင်ခန်းစာပေးဖို့ စုယွီဖုန်းက တွေးထားပြီးသားဖြစ်သည် ။သူ့အဖေ၏ ဓါးနှင့် ရင်ဆိုင်ပြီး ပြန်တိုက်ခိုက်ရချိန်တွင် စုရွေ့က လုံးဝအလျှော့မပေးပေ ။ ဖအေ နှင့် သားကြားရှိ တိုက်ပွဲက အလွန်ကြာရှည်ပြီး သူတို့ကို ခွဲထုတ်ဖို့လည်း ခက်ခဲ၏ ။

ညလယ်ကျော်ချိန်တွင် မြို့တော်တစ်ခုလုံးက အိပ်စက်နေကြသည် ။

စုဝမ်၏ ဘေး၌ အခြားအရိပ်တစ်ခုရှိနေသေးသော်လည်း နောက်ဆုံးအကြိမ်ကနှင့် မတူဘဲ စုဝမ်က သတိထားနေမိသည် ။

ညအမှောင်တွင် သူမ၏ အကြည့်တို့က ကြည်လင်နေပြီး သူမဘေးရှိလူကို မလိုအပ်သောအမူအရာမျိုးမပါဘဲ ကြည့်လိုက်သည် ။

" ကြည့်ရတာ ၊ ရှင်နိုင်သွားပြီထင်တယ် ။ "

သွေးများစွန်းထင်းနေသော လက်က ရုတ်တရက် သူမမျက်နှာကို ပွတ်သပ်လိုက်သည် ။

" မင်းသာ သမားတော်စီးကို လက်ထပ်ရဲရင် ၊ ကိုယ်သူ့ကို သင်းကွပ်ပစ်မယ် ။ "

စုရွေ့၏ အသံက စူးရှနေပြီး သူ၏ သွေးများစွန်းထင်းနေသော မျက်နှာနှင့် လိုက်ဖက်ညီနေ၏။ မနက်ခင်း အစောပိုင်း တိတ်ဆိတ်နေချိန်တွင် သူက အလွန်ကို ရက်စက်ပြီး ကြောက်စရာကောင်းနေသည့်ပုံပေါ်သည် ။

" အင်း"

စုဝမ်က ပြန်တုံ့ပြန်လာသည် ။

" အဲ့ဒါက သမားတော်စီး မဟုတ်ရင်ရော "

" ဒါဆို အဲ့ဒီလူက ချက်ချင်း အပိုင်းပိုင်းခုတ်ခံရပြီး ခွေးစာကျွေးခံရမှာပေါ့ ။ "

စုရွေ့က တည့်တိုးဆန်စွာ ပြန်ဖြေလိုက်သည်။ သမားတော်စီးကို သူက အထူးဆက်ဆံပေးခြင်းမျိုးမဟုတ်ပေ ။ ၎င်းက သူ့နှလုံးသားထဲတွင် စုဝမ်၏ အသက်က အဖိုးတန်ပြီး သူမကို ကုသပေးနိုင်သောသူကလည်း သမားတော်စီးသာ ရှိသည်ဟု ခံစားမိနေခြင်းကြောင့်ဖြစ်၏ ။ထို့ကြောင့် သမားတော်စီးက သေလို့မဖြစ်သော်လည်း သူ့ကို သင်းကွပ်ပစ်လို့တော့ရသည် ။ သခင်လေးစုက မည်သည့်ဖိအားကိုမှ ခံစားမနေရပေ ။

" ဒါဆို..အဲ့ဒါက ရှင်ဆိုရင်ရော "

စုဝမ်က မမျှော်လင့်ထားစွာဖြင့် သူမဘေးတွင်ရှိနေသော စုရွေ့ကို သေချာကြည့်လိုက်သည် ။

စုရွေ့၏ လက်ချောင်းများက တင်းကျပ်သွားပြီး ထိုနေရာတွင် သစ်သားတုံးလို ရပ်နေ၏ ။ သူ့အသက်ရှူသံပင် ရပ်သွားပုံရသည် ။

စုရွေ့၏ အခုလိုပုံစံကို မြင်နေရတာတောင် စုဝမ်က သူ့ကို လွှတ်ပေးချင်ပုံမရပေ ။ မျက်ဝန်းတစ်စုံက စုရွေ့၏ မျက်နှာကိုသာ မလှုပ်မယှက်ကြည့်နေ၏ ။

" ကျွန်မပြောတာက..ကျွန်မ လက်ထပ်မယ့်လူက ရှင်ဖြစ်နေရင်ရောလို့ "

စကားလုံးတစ်လုံးချင်းစီ၌ ရပ်တန့်သွားပြီး စကားလုံးတိုင်းလိုလိုက နှလုံးသားကို ထိုးနှက်နေသည့် အတိုင်းပင် ။

🚩

Chapter 12

Report Page