Chapter 1

🚩Arc -1 (မင်းသမီးအစားထိုးထိမ်းမြားလက်ထပ်ခြင်း )

Chapter 1

ကြီးမြတ်သော ရှမင်းဆက်ခေတ်၌ ဖြစ်သည် ။ တိုင်းပြည်ကချမ်းသာ ကြွယ်ဝပြီး ပြည်သူများကလည်း ပျော်ရွှင်စွာ နေထိုင်နိုင်ကြ၏ ။ လက်ရှိ အုပ်စိုးနေသောမင်းမှာ ရွှမ်းယွမ်ဖော် ဟုအမည်တွင်သည် ။ ရိုးသားဖြောင့်မတ်သော ဧကရာဇ်တစ်ပါးဖြစ်ပြီး အရွယ်ကောင်းသို့ရောက်နေပြီဖြစ်သည် ။မင်းသားများကလည်း အရွယ်ရောက်လာကြပြီး သူတို့တာဝန်များကို စတင်ခွဲယူကာ နိုင်ငံရေး၌ သူတို့အရည်အချင်းကို ထုတ်ပြလာကြသည် ။

ဤကမ္ဘာ၏ အဓိကဇာတ်ကောင်မှာ မကောင်းသော စိတ်နေစိတ်ထားဖြင့် မွေးဖွားလာသည့်အပြင် မသန်မစွမ်းဖြစ်နေသည့် ငါးယောက်မြောက်မင်းသားဖြစ်၏ ။ သူ့မိခင်က နန်းတော် အစေခံမျှသာဖြစ်သောကြောင့် သူမက မိဖုရားအဖြစ် သတ်မှတ်မခံရသလို မိဖုရားတစ်ပါးလိုလည်း ဝတ်စားဆင်ယင်ရတာမျိုးမရှိပေ ။ ဤအကြောင်းပြချက်ကြောင့် အသက်ဆယ့်ခြောက်နှစ်အရွယ်တွင် မင်းသား (၅) က နန်းတော်မှ ထွက်ကာ သူ့ဖခင်က သူ့ကို ချီးမြှင့်လိုက်သော ချင်းဝမ်အိမ်တော်၌ အခြေချနေထိုင်လိုက်သည် ။

ထို့နောက် ၂ နှစ်အကြာတွင် သူက ထိမ်းမြားရမည့်အရွယ်သို့ရောက်လာသော်လည်း မည်သူကမှ သူတို့သမီးကို စိတ်ထားဆိုးရွားသည့်အပြင် ကိုယ်လက်အင်္ဂါချို့ယွင်းနေသော မင်းသားနှင့် လက်မထပ်စေချင်ပေ ။ ထိုနှစ် ဩဂုတ်လတွင် မင်းသား (၅) က ရုတ်တရက် ပြင်းထန်သော ရောဂါဝေဒနာကို ခံစားလိုက်ရသည် ။ သူ၏ မကောင်းသောကံကြမ္မာကို ကျော်လွှားနိုင်ဖို့အတွက် နိုင်ငံတော်ရှိ ဗေဒင်နက္ခတ်ပညာရှင်များက သူ့ကို သူနှင့် လက္ခဏာရှစ်ချက်လုံး တူညီသော မိန်းမပျို နှင့် လက်ထပ်ရမည်ဟု ဆိုလိုက်သည် ။

မမျှော်လင့်ထားစွာဖြင့် မင်းသား (၅) နှင့် လက္ခဏာရှစ်ချက်လုံး တူညီနေသော မိန်းမပျိုမှာ တော်ဝင်စိစစ်ရေးအရာရှိ၏ သမီးဖြစ်နေသည် ။ စိစစ်ရေးအရာရှိ၏ သမီးအမည်မှာ ယဲ့ကျီးဟွာ ဖြစ်ပြီး အဆင်းရော အချင်းပါပြည့်စုံသူအဖြစ်မွေးဖွားလာသည့်သူပင် ။ သူမက ဆယ့်ငါးနှစ်ပြည့်ပြီးရုံသာ ရှိသေးပြီး သူတို့အိမ်တံခါးသို့ လက်ထပ်ခွင့်တောင်းရန် လာရောက်နေကြသော အရာရှိ၏ သားတွေကလည်း မနည်းလှပေ ။

စိစစ်ရေးအရာရှိက သူ့သမီးပျို နှင့် မင်းသား (၅) တို့ လက္ခဏာ ရှစ်ချက်လုံး တူညီနေတာကို သိသွားသောအခါ သူနှင့် သူ့မိန်းမက အလွန်ကို စိတ်ဖိစီးရတော့သည် ။ သို့သော် ယဲ့ကျီးဟွာက အလွန်ပါးနပ်သည် ။ လက္ခဏာ ရှစ်ချက်လုံး တူညီနေသည့်အကြောင်းကို သူမ နှင့် သူမ မိသားစုကသာ သိထားပြီး ဧကရာဇ် နှင့် မင်းသား (၅)က မသိသေးတာကို သူမ သိနေသည့်အတွက် စတင်ပြီး အစီစဥ်ချတော့သည် ။

သူမ မိသားစုတွင် သူမ နှင့် နှစ်နာရီသာ ခြားပြီးမွေးလာသော ကိုယ်လုပ်တော်၏ သမီးရှိတာကို သူမ အမှတ်ရမိသည် ။ ထို့ကြောင့် သူမနေရာကို ညီမဖြစ်သူ နှင့် အစားထိုးလိုက်ဖို့ သူမ အကြံရသွား၏ ။

မင်းသား (၅) က မျက်နှာသာပေးခြင်းမခံရသော်လည်း သူက မင်းသားဟူသည့် ဘွဲ့ထူးကိုတော့ အပ်နှင်းခံထားရတုန်းပင် ။ ထို့ကြောင့် " ကံအညံ့ကို ဖယ်ရှားရန် " လက်ထပ်ဖို့အတွက် ကိုယ်လုပ်တော်၏ သမီးကို သူတို့က လိုလိုလားလား လက်လွှဲပေးလိုက်သည် ။ ဤနည်းလမ်းဖြင့် သူတို့က လူအစားထိုးပေးလိုက်တာကို ဖုံးကွယ်လိုက်နိုင်ရုံသာမက သူတို့၏ ဂုဏ်သိက္ခာကိုလည်း မူလအတိုင်း ဆက်ထိန်းနိုင်သွား၏ ။ ထို့အပြင် သူတို့မိသားစုက ဧကရာဇ်ထံမှလည်း အသိအမှတ်ပြုခံလိုက်ရသည် ။

ဤကိုယ်လုပ်တော်၏ သမီးက အားနည်းပျော့ညံ့ပြီး သည်းခံအောက်ကျို့တတ်တာကို ယဲ့ကျီးဟွာမှတ်မိသေးသည် ။ ထိုကဲ့သို့သော သူမျိုးက ဘာအရည်အချင်း ၊ ဘာအားသာချက်မှမရှိသလို မိသားစုကောင်းနှင့်လည်း ထိမ်းမြားနိုင်မှာမဟုတ်ပေ။ ရည်ရွယ်ချက်ကောင်းနှင့် သူမကပဲ သူမ၏အစ်မဖြစ်သူအနေနဲ့ သူ့ကို မင်းသမီးဖြစ်နိုင်မည့် အခွင့်အရေးကောင်းကို ပေးလိုက်မည် ။ သူမက တကယ်ကို ကောင်းကောင်းလုပ်ပေးလိုက်တာ ဖြစ်သည် ။

ရလဒ်အနေနှင့် ယဲ့ကျီးဟွာပြောသည့်အတိုင်း သူ့အခြေအနေကို ဖြေရှင်းနိုင်အောင် စိစစ်ရေးအရာရှိက သွားရောက်ဆွေးနွေးရတော့သည် ။ ဤသို့ဖြင့် သူမ၏ ကိုယ်လုပ်တော်မှမွေးသောညီမဖြစ်သူ ယဲ့ကျီးကျင်ကို ရွှမ်းယွမ်ချင်း နှင့်လက်ထပ်ဖို့ ချင်းဝမ်အိမ်တော်သို့ ပေးလိုက်သည် ။

ထိုအချိန်တုန်းက ယဲ့ကျီးကျင်မှာ ယဲ့မိသားစုတွင် မျက်နှာသာပေးမခံရသလို သူမ၏ မိခင်ကလည်း ကိုယ်လုပ်တော်သာသာမျှသာ ဖြစ်သည် ။ထို့ကြောင့် မိသားစု၏ စီစဥ်မှုကို ငြင်းဆန်ဖို့ အာဏာမျိုး သူမတွင်မရှိသည့်အတွက် တောက်ပသော အနီရောင် ဝေါယာဥ်ပေါ်တွင်သာ ထိုင်ပြီး ချင်းဝမ်ဖူ၏ မိသားစုဝင်ဖြစ်လာဖို့သာ ရှိတော့သည် ။

အားလုံး မထင်ထားတာက ယဲ့ကျီးကျင်၏ အားနည်းပျော့ညံ့ပုံက ရွှမ်းယွမ်ချင်း၏ ဆက်ဆက်ထိမခံဒေါသကို သွားဆွလိုက်မိတာပင် ။ မင်္ဂလာဦးညတွင် သွေးများက နေရာအနှံ့စင်သွား၏ ။ သုံးရက်ကြာပြီးနောက် ယဲ့ကျီးကျင်က သူမ မျက်လုံးများကို နောက်တစ်ဖန်ပြန်ဖွင့်လိုက်ပြီး လူတစ်ယောက်လုံး ပြောင်းလဲသွားတော့သည် ။

"အမှန်ပဲ ...မူလ ယဲ့ကျီးကျင်က သေဆုံးသွားပြီ အခု ၊ ဒီယဲ့ကျီးကျင်က မတူညီတဲ့ အချိန်နဲ့ အာကာသကို ဖြတ်သန်းလာတဲ့ ဝိဉာဥ်ပဲ ...သူမ ဖြတ်သန်းလာခဲ့ပြီ ..."

ဤအခိုက်အတန့် အခုယဲ့ကျီးကျင်က သူတို့ရဲ့အမျိုးသမီးဇာတ်လိုက်ပဲ ။

သူမက သူမအလုပ်မှ အတွေ့အကြုံတို့ကို အသုံးချပြီး ရွှမ်းယွမ်ချင်း ရှေ့တွင် မျက်နှာသာပေးခံရမည့် ပုံစံမျိုး သရုပ်ဆောင်နေသည် ။ အဆုံး၌ သူမက ရွှမ်းယွမ်ချင်း နှင့် အတူရှိနိုင်သွား၏ ။

ရွှမ်းယွမ်ချင်းက ယဲ့ကျီးကျင်ကို ပြောလိုက်သည် ။ တကယ်တမ်းတွင် သူ့ခြေထောက်များက ပြန်ကောင်းသွားတာ ကြာပြီဖြစ်ပြီး ထီးနန်းကို လုဖို့အတွက် သူက ဤအကြောင်းကို ဖုံးကွယ်ရထားခြင်းပင် ။

" ကံ့အညံ့ကို ဖယ်ရှားဖို့ လက်ထပ်ခြင်း " က သူ၏ ဟန်ပြဇာတ်လမ်းသာဖြစ်ပြီး ဗေဒင်နက္ခတ်ပညာရှင်များကလည်း ယဲ့မိသားစုကို သူတို့ဘက်ပါလာအောင် ဆွဲသွင်းလိုက်ခြင်းသာ ဖြစ်သည် ။ သို့သော်လည်း ယဲ့မိသားစုက သတို့သမီးကို အစားထိုးပစ်လိမ့်မည်ဟု သူတို့ မမျှော်လင့်ထားခဲ့ပေ ။ ဤအခြေအနေတစ်ခုကြောင့် အစားထိုးထိမ်းမြားမည့် ယဲ့ကျီးကျင်က ရွှမ်းယွမ်ချင်း၏ အရှေ့တံခါးသို့ ပို့ဆောင်ခံလိုက်ရသည် ။

ထို့နောက်တွင် ရွှမ်းယွမ်ချင်း နှင့် ယဲ့ကျီးကျင်တို့က အတူတူ အစီစဥ်ချပြီး နောက်ဆုံး၌ အောင်မြင်မှုကို ရရှိသွား၏ ။ ယဲ့ကျားကတော့ မင်းသား (၃)ဘက်တွင် ရပ်တည်သည့်အတွက် နောက်ပို့ခံလိုက်ရသည် ။နောက်ဆုံး မင်းသား (၃) ရှုံးနိမ့်သွားချိန်တွင် ယဲ့မိသားစုက မျိုးရိုးစဥ်ဆက်သုံးဆက်တိုင် ကွပ်မျက်ခံလိုက်ရ၏ ။ ဇာတ်လမ်း၏ နောက်ဆုံးအကြီးကျယ်ဆုံး ဇာတ်သိမ်းမှာ ရွှမ်းယွမ်ချင်းက ဧကရာဇ်ဖြစ်လာပြီး ယဲ့ကျီကျင်းက အမျိုးသမီးများအားလုံး၏ စံပြ မိဖုရားတစ်ပါး ဖြစ်လာသည် ။

" မူလဇာတ်သိမ်းက ဒီလိုပဲ ဖြစ်သင့်တယ် ..."

သို့သော် မူလဇာတ်လမ်းတွင် ယဲ့ကျီးကျင်က မြေအောက်အကျဥ်းထောင်တွင် သေခါနီး အိပ်ယာပေါ်၌ လဲနေသော ယဲ့ကျီးဟွာကို သူမက ကူးပြောင်းလာသောသူဖြစ်ပြီး မူလ ယဲ့ကျီးကျင်က သေဆုံးသွားပြီ ဖြစ်ကြောင်း ပြောပြခဲ့သည် ။

" ဒါကြောင့် ငါ့ကို သွေး ရေထက်ပျစ်တယ် ဆိုတာမျိုးတွေ လာမပြောနဲ့ နင့်ညီမက နင့်ကြောင့်သေသွားရတာ ..."

ထို့နောက် သူမ၏ ထိတ်လန့်မှု ၊ အကြီးအကျယ်နောင်တရမှုတို့နှင့်အတူ ယဲ့ကျီးဟွာက မလိုလားစွာ သေဆုံးသွားရတော့သည် ။ မမျှော်လင့်ထားစွာဖြင့် သူမ၏ နက်ရှိုင်းသော မကျေမချမ်းအတွေးတို့က သူမကို ပြန်လည်မွေးဖွားစေ၏ ။

အမှန်တိုင်းဆိုရလျှင် ယဲ့ကျီးဟွာက အရည်အချင်းရှိသူဖြစ်သည် ။ သူမက ကြီးမြတ်သောရှမင်းဆက်ခေတ်၏ ဒေသခံအစစ်ဖြစ်ပြီး လေးစားသူများဝိုင်းနေသော ပညာရှင်အမျိုးသမီးပင် ။ ရွှမ်းယွမ်ချင်းကို သူမ ဂရုမစိုက်ရခြင်း၏ အကြောင်းအရင်းမှာ သူ့အဆင့်အတန်းက အရမ်းနိမ့်နေခြင်း တစ်ခုတည်းကြောင့်မဟုတ်ဘဲ သူမတွင် ချစ်ရမည့်သူ ရှိနေသည့်အတွက်ကြောင့်လည်း ဖြစ်သည် ။

ကိုယ်လုပ်တော်မှမွေးသော သူမ၏ ညီမကို မင်္ဂလာပွဲအတွက် အစားထိုးလိုက်သည့်အကြောင်းအရင်းမှာ ပထမဆုံး သူမက သူမ၏ အချစ်ကို လက်မလျှော့ချင်သလို ၊ ဒုတိယအချက်အနေဖြင့် ဤ အစီစဥ်က မိသားစုနှစ်စုနှင့် မိဘများသာမက ကိုယ်လုပ်တော်သမီးအတွက်ပါ နှစ်ဦးနှစ်ဖက်အကျိုးအမြတ်ရလိမ့်မည်ဟု တွေးမိသောကြောင့်ပင် ။

သူမ၏ ညီမဖြစ်သူက မင်္ဂလာဦးည၊ သတို့သမီးအခန်းထဲမှာပဲ ရွှမ်းယွမ်ချင်းရဲ့လက်အောက်မှာ သေဆုံးသွားလိမ့်မယ်လို့ ဘယ်သူကထင်ထားပါ့မလဲ...ပြီးတော့ ကူးပြောင်းလာပြီး သူ့ညီမရဲ့ ခန္ဓာကိုယ်ကို ပိုင်သွားတဲ့ သူက ရွှမ်းယွမ်ချင်းနဲ့တောင် ပေါင်းစည်းသွားသေးတယ် ...ကူးပြောင်းလာတဲ့ ယဲ့ကျီးကျင်က သူမချစ်သူကို သေစေရုံတင်မကဘူး ၊ ယဲ့မိသားစုကို မျိုးဆက်သုံးဆက်ကိုပါ ကွပ်မျက်စေခဲ့တယ် ...

ယဲ့ကျီးဟွာ တကယ်ပဲ ယဲ့ကျီးကျင်ကို မုန်းတီးမိသည် ။ သူတို့ဆက်ဆံရေးက ဘယ်လိုမှ ပြန်မသင့်မြတ်နိုင်တော့ပေ ။

သူမက အခုတော့ ပြန်လည်မွေးဖွားလာခဲ့ပြီ ။

ချင်းဝမ်ဖူအိမ်တော်နှင့် ယဲ့ကျီးကျင် ထိမ်းမြားပြီး တစ်လအကြာအချိန်၌ ယဲ့ကျီးဟွာက ပြန်လာမွေးဖွားလာသည် ။ ဤအချိန်တွင် မူလကိုယ် ယဲ့ကျီးကျင်က သေးဆုံးသွားပြီ ဖြစ်သည် ။

ညီမဖြစ်သူ၏ ခန္ဓာကိုယ်ကို ကူးပြောင်းလာသော မိန်းကလေးက ယူသွားပြီဆိုတာ ယဲ့ကျီးဟွာ သိသည် ။သူမက တစ်ဘဝစာရှင်သန်ခဲ့ဖူးပြီး ကျော်ကြားသော အမျိုးသမီးပညာရှင်လည်း ဖြစ်၏ ။ သူမက စိတ်ငြိမ်ငြိမ်ထားပြီး အရင်ဘဝမှ အတွေ့အကြုံများကို ပြန်စဥ်းစားလိုက်သည် ။ ထို့နောက်တွင် ယဲ့ကျီးဟွာက စတင်ပြီး ပြန်လည်တိုက်ခိုက်တော့သည် ။

သူမ ပထမဆုံး လုပ်ရမည့်အရာက မင်းသား (၃) ရွှမ်းယွမ်ရွေ့ နှင့် စကားပြောကြည့်ဖို့ပင် ။ ဒီအမျိုးသားက အတိတ်ဘဝတွင် သူမ၏ ယောကျ်ား ၊ သူမ ချစ်ရသည့်သူဖြစ်သော်လည်း ဖွင့်ဟဝန်မခံဘူးသူ ။ ထို့နောက် ယဲ့ကျီဟွား၏ စည်းရုံးသိမ်းသွင်းမှုကြောင့် ယဲ့ကျားက မင်းသား (၃) ဘက်တွင် ရပ်တည်ခဲ့ခြင်းပင် ။ ရွှမ်းယွမ်ရွေ့က ဉာဏ်ရည်မြင့်ပြီး ကောင်းမွန်သော အကျင့်စရိုက်မျိုးရှိကာ ချောမောခန့်ညားသူဖြစ်သည် ။ ထို့ကြောင့် တော်ဝင်မိသားစုထဲတွင် သူက ထောက်ခံမှုအများဆုံးရသူ လည်းဖြစ်၏ ။ လူအများက သူ့ကို အိမ်ရှေ့စံအဖြစ် ထားပေးဖို့ အကြံပြုကြသည် ။

ရွှမ်းယွမ်ရွေ့၏ အရည်အချင်းအပြင် သူမ၏ အကူအညီ နှင့်သာဆိုလျှင် ရွှမ်းယွမ်ချင်းကို အနိုင်ရလိမ့်မည်ဟု ယဲ့ကျီးဟွာက ယုံကြည်၏ ။

ထို့ကြောင့် ယဲ့ကျီးဟွာက ရွှမ်းယွမ်ရွေ့၏ ဝမ်အိမ်တော်နှင့် လက်ထပ်လိုက်သောအခါ အလိုအလျောက် နှစ်ဖက်တိုက်ခိုက်ဖို့ ကြေညာပြီးသားဖြစ်သွားသည် ။

နှစ်ဖက်၏ နောက်ဆုံးထွက်လာသောအဖြေမှာ သဘာဝကျကျပင် ပြန်လည်မွေးဖွားလာပြီး လက်ဦးမှုရယူနိုင်သော ယဲ့ကျီးဟွာဖြစ်ပြီး ပြန်လည်တိုက်ခိုက်မှုတွင် အနိုင်ရသွားသည် ။

ယခုတွင် ရွှမ်းယွမ်ချင်း၏ အကွက်ချမှုက ဖော်ထုတ်ခံလိုက်ရပြီ ဖြစ်သည် ။ ယဲ့ကျီးကျင်ကလည်း နတ်ဆိုး အဖြစ် ခေါင်းစဥ်တပ်ခံရပြီး တစ်နာရီအကြာတွင် နှစ်ယောက်လုံး သေမိန့်ပေးခံလိုက်ရ၏ ။

ဤအချိန်တွင် သူမသာ မစ်ရှင်ကမ္ဘာထဲ ဝင်ရောက်လာခြင်းမရှိပါက ဤကမ္ဘာ၏ ဇာတ်သိမ်းက ပြီးပြည့်စုံလိမ်မည်ဟု စုဝမ် တွေးမိသည် ။

"ဟီး..ဟီး ...တကယ်ကို နောင်တရစရာပဲ ဘာလို့လဲဆိုတော့ သူမ ရောက်လာပြီလေ ..."

" အဟွတ်..အဟွတ် "

ချောင်းဆိုသံက ကန်လန့်ကာ ခြားထားသည့် တစ်ဖက်၌ အိပ်ယာပေါ်တွင် ခေါင်းအုံများအဆင့်ဆင့်ထပ်ထားသည့် ပေါ်တွင် လှဲနေသည့် မိန်းကလေးထံမှ ဖြစ်သည် ။

ချောင်းဆိုးသံကြားသောအခါ အစိမ်းရောင်အစေခံဝတ်စုံနှင့် မိန်းကလေးက တွန့်ဆုတ်စွာဖြင့် လိုက်ကာကို ဆွဲလိုက်ပြီး

" ကျွင်းကျူ ၊ ကျွင်းကျူ နိုးလာပြီလား ..."

(note* ကျွင်းကျူ - မင်းသမီး )

" အမ်း "

စုဝမ်က ဖြူဖျော့နေသော မျက်နှာနှင့်အားနည်းစွာ ဖြင့် သူမ မျက်လုံးများကို ဖွင့်ပြီး အစေခံမိန်းကလေးကို ကြည့်လိုက်သည် ။ ဤအစေခံမိန်းကလေးက မူလကိုယ်၏ လူယုံတော် လွိကျူး ဖြစ်ပြီး လက်ရှိ၌ သူမဘေးတွင် ကျန်ရှိသည့် တစ်ဦးတည်းသောသူဆိုတာ သူမ သိသည် ။

" လွိကျုး ၊ ပြောင်ကော ဘယ်မှာလဲ ငါသူနဲ့ တွေ့ချင်တယ် "

( ပြောင်ကော- ဝမ်းကွဲအစ်ကို )

သူမ နိုးလာလာချင်း စုဝမ်က သူမယောက်ျားကို မေးနေတာ တွေ့ရသောအခါ လွိကျူး အရမ်း စိတ်ပူပန်မိ၏ ။

" ကျွင်းကျူ ၊ ဝမ်ယဲ ..သူ.. ဝမ်ယဲက ကွပ်မျက်တဲ့နေရာကို သွားပြီ "

( ဝမ်ယဲ - အရှင် )

ယနေ့က ရွှမ်းယွမ်ချင်း ကွပ်မျက်ခံရမည့်နေ့ပင် ။ သူနှင့် ရွှမ်းယွမ်ရွေ့ကြားတွင် အနိုင်ရသူက ပေါ်ထွက်သွားပြီဖြစ်သည် ။

လွိကျူး၏ တုံ့ပြန်ချက်အရ ဤအရာကို လုံးဝမမျှော်လင့်ထားသလိုတော့ သူမ မခံစားမိပေ ။ သို့သော် အားနည်းပြီးပျော့ညံ့သော ကြာပန်းဖြူလေးဖြစ်သည့် မူလကိုယ်ကို ပြန်တွေးမိသောအခါ မျက်ရည်များဝဲနေသည့် လွိကျူးကို စုဝမ် သနားစွာ ကြည့်မိသည် ။

" လွိကျူး ၊ ပြောင်ကောက ငါ့ကို ထပ်လာမတွေ့နိုင်တော့ဘူးလား "

ရွှမ်ယွမ်ရွေ့က သူမကို ဤအအေးဆောင်တွင် ပိတ်ထားပြီး မူလကိုယ်၏ခန္ဓာကိုယ်က တစ်နေ့ထက်တစ်နေ့ ပိုအခြေအနေဆိုးလာ၏ ။ နေ့တိုင်း သူမခေါင်းက မူးနောက်နေပြီး ခေါင်းကြည်လင်နေသောအချိန်က အနည်းငယ်သာရှိသည် ။ သူမ ခေါင်းကြည်ပြီး နိုးလာသည့်အချိန်တိုင်းလည်း ဤမေးခွန်းကို မေးလေ့ရှိသည် ။

စုဝမ်၏ မျှော်လင့်ချက်အပြည့်နှင့် မျက်ဝန်းကိုကြည့်ပြီး လွိကျူးက စကားလမ်းကြောင်းလွှဲလိုက်၏။

သူတို့၏ ကျွင်းကျူက ဝမ်ဖေးရာထူးမှ ဖယ်ရှားခံရပြီး အဆက်အသွယ်အားလုံးဖြတ်တောက်ခံထားရချိန်တွင် ဝမ်ဖူအိမ်တော်၌ မင်္ဂလာပွဲအတွက်ပြင်ဆင်နေကြပြီး ယဲ့ကျီးဟွာဟူသော မိန်းမက နန်းတော်တွင် တစ်ဦးတည်းသော ဝမ်ဖေး ဖြစ်လာလိမ့်မည် ။

လွိကျူးက ဒါတွေအားလုံး စုဝမ်ကို မပြောပြရဲပေ ။ သူမ၏ သခင်က ကလေးဘဝကတည်းက ကျန်းမာသောခန္ဓာကိုယ်မရှိတာကို သူမ သိသည် ။ ယခုသူမက အားနည်းပျော့ညံ့နေပြီး မည်သည့်လှုံဆော်မှုကိုမှ ခံလို့မရတော့ပေ ။

ထို့ကြောင့် လွိကျူးက တိတ်တိတ်နေဖို့သာ ရွေးချယ်လိုက်သည် ။ဤအချိန်တွင် ယဲ့ကျီးဟွာကို သူမ တိတ်တဆိတ် မုန်းတီးနေမိသည် ။

အဆုံးကျတော့ အဲ့ဒီမိန်းမက ဘာလဲ ...

"လွန်ခဲ့တဲ့တစ်နှစ် ဧည့်ခံပွဲမှာ ဝမ်ယဲက မူးပြီး သူမနဲ့ တစ်ညတာကုန်ဆုံးမိသွားရုံပဲမဟုတ်ဘူးလား ဝမ်ယဲအတွက် ပြဿနာအများကြီးဖြစ်စေသလို သူမကို လက်ထပ်ပြီး နန်းတော်ကို ပြန်ခေါ်လာဖို့ လိုလို့လား...ဝမ်ယဲက မင်းသမီးကို တစ်ဘဝလုံးကောင်းကောင်းဆက်ဆံပါ့မယ်လို့ ကတိပေးထားပေမယ့်လည်း အဲ့ဒီမိန်းမ တံခါးကနေ ဝင်လာကတည်းက ဝမ်ယဲက ကျွင်းကျူအပေါ် တဖြည်းဖြည်း အေးဆက်သွားတော့တာပဲ ။ ကျွင်းကျူရဲ့ ခန္ဓာကိုယ်က မကောင်းလို့ ဝမ်ယဲကို မစောင့်နိုင်ဘူးဆိုတာ ဟုတ်ပေမဲ့ သူမလည်း ဒါမျိုး ဖြစ်စေချင်လို့မှ မဟုတ်တာပဲ ..."

"အဲ့ဒီ မြေခွေးမက ကျွင်းကျူရဲ့ ခန္ဓာကိုယ်မကောင်းတာကို အခွင့်ကောင်းယူပြီး ဝမ်ယဲကို နည်းလမ်းပေါင်းစုံနဲ့ မြူဆွယ်ဖို့လုပ်တာ ၊ ပြီးတော့ ဝမ်ယဲရဲ့ ကလေးကိုတောင် ယူဖို့လုပ်လိုက်သေးတယ် ကျွင်းကျူက တကယ်ဒေါသထွက်ပြီး စိတ်နှလုံးကြေကွဲနေရပြီ ..."

သူမက အဲ့ဒီမိန်းမကို သွားရှာပြီး စကားများခဲ့ပေမဲ့လည်း နှစ်ယောက်စလုံး ရေထဲပြုတ်ကျပြီး ထိုမိန်းမကို ကိုယ်ဝန်ပျက်ကျသွားစေ၏ ။ ကျွင်းကျူလည်းပဲ အလွန်ကို ဝမ်းနည်းနေရသည် ။

ဤအကြောင်းကြောင့် လွိကျူးက အတွေးလွန်နေပြီး ရုန်းမထွက်နိုင်ပေ ။ စုဝမ်က အိပ်ယာပေါ်တွင်သာ တိတ်တဆိတ်ထိုင်နေပြီး သူမခံစားချက်များကို စုစည်းနေ၏ ။

ဟုတ်ပေသည် ။ မူလကိုယ်၏ အမည်ကလည်း စုဝမ် ပဲဖြစ်၏ ။ ဒါက သူမရွေးချယ်လိုက်သော သူမ၏ ရွေလက်ချောင်းပင် ။ နယ်ပယ်ဖြိုခွင်းရေးသမားများအားလုံးက သူတို့၏ ရွှေလက်ချောင်းကို စိတ်ကြိုက်ရွေးချယ်ပိုင်ခွင့်ရှိပြီး စုဝမ်က အမြဲတမ်း သူမနာမည်အတိုင်း ရှိနေဖို့ ရွေးချယ်ထားသည် ။

သူမက အခြားသူတစ်ယောက်၏ နာမည်ဖြင့် အခေါ်ခံရတာကို သဘောမကျပေ ။ ဤအသုံးမဝင်သော အရာက သူမကို နာမည်သာမပြောင်းသွားစေပြီး ဘာမှဖြစ်လာစေမည် မဟုတ် ။

သို့သော် ဒါက စုဝမ်အတွက် လုံလောက်ပြီ ဖြစ်သည်။

အဘယ်ကြောင့်ဆိုလျှင် သူမ ရင်းနှီးနေပြီးသားဖြစ်သော ကမ္ဘာ၏ ဇာတ်ကောင်များနှင့် ဇာတ်ကွက်က သူမအတွက် အကြီးဆုံး ဝှက်ဖဲပင် ။

သူမက ရရှိထားသော ဇာတ်လမ်းကို ဖတ်ကြည့်လိုက်သောအခါ ဤဇာတ်လမ်းက အံ့သြဖို့ကောင်းသည်ဟု သူမ ခံစားမိ၏ ။ ဤ ယဲ့ကျီးဟွာက ပိုလို့ အံ့အားသင့်စရာပင် ။ သူမက ရွှမ်းယွမ်ရွေ့ကို ဂရုစိုက်ဆုံးသူဟု ခံစားရပြီး ရွှမ်းယွမ်ရွေ့ မူးနေသောအခါ သူမက သူနှင့် တစ်ညအတူကုန်ဆုံးဖို့ အခွင့်ကောင်းယူလိုက်သည် ။ သူမက သူနှင့် တစ်ညတာ ကုန်ဆုံးလိုက်သည့်အကြောင်းက ဖော်ထုတ်ခံလိုက်ရသောအခါ သူမက သူ့ကို ကူညီပြီး ဖုံးကွယ်ပေးဖို့လုပ်သော်လည်း ဧကရာဇ်က လက်ထပ်ဖို့ အမိန့်ချမှတ်လိုက်သည် ။

ဘာပဲဖြစ်ဖြစ် သူမရဲ့ ဝမ်ဖူအိမ်တော်နဲ့ လက်ထပ်ဖို့ ဆန္ဒကပြည့်သွားပြီး ပထမဇနီးဖြစ်တဲ့ ကျွင်းကျူကလည်း ကြာကြာအသက်မရှင်နိုင်ဘူးဆိုတာ သူမ သိနေတဲ့အတွက် ဒါကို သူမ တောင့်ခံထားနိုင်မှာပဲ ဒီလိုအချိန်မျိုးမှာ သူမက ဘာလို့ မစောင့်နိုင်ရမှာလဲ ...

"သူမက သူမကိုယ်သူမ နှစ်သိမ့်ဖို့ ကျွင်းကျူက ဘာပဲဖြစ်ဖြစ် သေတော့မှာပဲ ဆိုတဲ့စိတ်နဲ့တောင် နှလုံးသွင်းလိုက်သေးတယ် ... ဒါကြောင့် သူမက ကျွင်းကျူကို သူမနဲ့ အတူတူ ရေထဲဆွဲချသွားပြီး အပျင်းဖျားစေခဲ့တာ ပြီးတော့ ဒါက ကံကြမ္မာပဲတဲ့လား သူမရဲ့ အမှား မဟုတ်ဘူးပေါ့ ..."

ထို့နောက်တွင် ကိုယ်ဝန်ကလည်း ပျက်ကျသွား၏ ။ သူမက ကြာကြာအသက်မရှင်နိုင်တဲ့ ကျွင်းကျူကို သိုးရေခြုံထားတဲ့ ယဲ့ကျီးကျင်နဲ့ အတူတူပဲလို့ တွေးနေတာ ဖြစ်သည် ။

ဤကဲ့သို့ အဓိပ္ပါယ်မရှိသော အတွေးမျိုးက ယစ်မူးနေတာကြောင့်ပဲ ဖြစ်ရမည် ။

တကယ်တမ်း အခြေခံကျကျတွေးကြည့်မည်ဆိုလျှင် ဤမူလကိုယ်မှာ ရွှမ်းယွမ်ရွေ့၏ နှလုံးသည်းညှာလေး ဖြစ်သည် ။ ယဲ့ကျီဟွား ပြန်လည်မမွေးဖွားခင်က သူတို့က အခြားသူများထံမှပင် မနာလိုခံရသော စံပြစုံတွဲဖြစ်သည် ။ကျွင်းကျူ သေဆုံးသွားသည့်တိုင်အောင် ရွှမ်းယွမ်ရွေ့က သူမကို ချစ်နေဆဲပင် ။

သို့သော် ဤကမ္ဘာတွင်တော့ ယဲ့ကျီးဟွာက ပြန်လည်မွေးဖွားလာ၏ ။ သူမက ရွှမ်းယွမ်ရွေ့ ဘဝထဲကို ပါဝင်ပတ်သက်လာသည် ။ ကိုယ်ရောင်ကိုယ်ဝါများကို သူမ ဘယ်က ရရှိလာသလဲ မသိရသော်လည်း သူမက အလွန်တောက်ပနေ၏ ။ အချိန်အတိုင်းအတာတစ်ခုအတွင်း ရွှမ်းယွမ်ရွေ့က ယဲ့ကျီးဟွာနှင့် အခြေအနေတိုးတက်လာပြီး အိပ်ယာပေါ်တွင် ကူးလူးဆက်နွှယ်မိသည် အထိပင် ။ဤသို့ ဆက်နွှယ်မိပြီးနောက် သူက သူမကို အလွန်အသိအမှတ်ပြုပြီး နေ့ရောညပါ သူမကိုပဲ တောင့်တနေတော့သည် ။ သူက ပထမဇနီးအပေါ်ကို တဖြည်းဖြည်းအေးစက်လာပြီး ယဲ့ကျီးဟွာ၏ ကိုယ်ဝန်ပျက်ကျသွားမှုနှင့်ပက်သက်၍ သူက တကယ်ပဲ ယဲ့ကျီးဟွာ၏ သွေးထိုးစကားကို ယုံကြည်သွား၏ ။ စုဝမ်က ရက်စက်သောစိတ်ဖြင့် သူ၏ မွေးဖွားမလာသေးသော ကလေးကို သတ်လိုက်သည်ဟု ထင်နေသည် ။

ရလဒ်အနေဖြင့် စုဝမ်က အမြှောက်စာဇာတ်ကောင် ဖြစ်သွား၏ ။ အမဲစက်ရှိသော ကျွင်းကျူဝမ်ဖေးအနေဖြင့် သူမက အအေးဆောင်သို့ပို့ခံရပြီး လျစ်လျူရှူခံရသော ဝမ်ဖေးအဟောင်း ဖြစ်လာသည်။

တကယ်တမ်းတွင် ဇနီးဟောင်း သို့မဟုတ် ပထမဇနီးဆိုသော အနေအထားမျိုးက စုဝမ်၏ အကြိုက်မဟုတ်ပေ ။ စုဝမ်က အမြဲတမ်း " ရည်းစားဟောင်း " ဆိုသည့်အခြေအနေမျိုးကိုပဲရွေးပြီး အေးစက်သည့်သူမျိုးအနေဖြင့် သူမတွင် OCD လည်းရှိသည် ။

( OCD - obsessive conpulsive disorder)

သူမက ဇာတ်လိုက် သို့မဟုတ် မည့်သည့် အထီးမျိုးနှင့်မဆို အသားချင်းထိရမှာကို မကြိုက်ပေ ။

သို့သော် ဤတစ်ခေါက်တွင်တော့ စုဝမ်က ခြွင်းချက်ထားပြီး ရွေးချယ်လိုက်သည် ။

( 10,000 points အတွက်သာ မဟုတ်ရင်ပေါ့ )

မူလကိုယ်က အမြဲတမ်းနာမကျန်းဖြစ်နေသည့်အတွက် သူမက ရွှမ်းယွမ်ရွေ့နှင့် အခန်းမျှမသုံးပေ။

ထို့အပြင် ဤကမ္ဘာ၏ ယဲ့ကျီးဟွာက စုဝမ်မျက်လုံးထဲ၌ သူမက တကယ်အထင်သေးစရာပင် ။ အတိတ်ဘဝတွင် သူမက စိတ်ကြီးဝင်ပြီး ကိုယ့်ကိုယ်ကို အလွန်ထက်မြက်သည်ဟု မှတ်ယူကာ သူမ၏ ညီမကို မင်းသား(၅) ဆီတွန်းပို့ပြီး အားလုံးအတွက်အကျိုးရှိလိမ့်မည်ဟုပင် ထင်နေသည် ။ သူမက လုံးဝ အသုံးမကျပေ ။ ထိုအသုံးမကျသော မင်းသားနှင့် တွဲလိုက်ပါက တကယ်ကို အံ့အားသင့်စရာပင် ။

ဒါက ဘယ်လို စိတ်သဘောထားမျိုးလဲ ...

သူမ ပြန်လည်မွေးဖွားပြီးနောက် သူမ၏ညီမဖြစ်သူက ကူးပြောင်းလာသောမိန်းကလေးကြောင့် သေဆုံးသွားရသည်ဟုပင် ပြောနေသေးသည် ။

ဒီလိုလူမျိုးက တကယ်ကို ပြောစရာစကားမဲ့စေတာပဲ။

xxxxx

Chapter 1

Report Page