#manaviyatli insonlar
#yangi_O'zbekiston_mening_tasavvurimda#eng_yaxshi_insho
Buxoro Davlat Universiteti Fizika-matematika fakulteti matematika yo’nalishi
1-4 Mat 19 guruh talabasi Sohibova Gulnoza
YANGI O'ZBEKISTON - MENING TASAVVURIMDA.
Reja:
1.Kirish.
O’zbekistonning mustaqillikkacha bo’lgan mashaqqatli davri.
2. Asosiy qism.
I. Vatan sajdagoh kabi muqaddas.
II. Vatanimning tabiiy boyliklari.
III. O’zbekiston dunyo nigohida .
IV. Vatan qalbiga monand qadri baland avlod maskani.
3. Xulosa.
Vatanim faxrim mening.
“Vatanni sevmoq
Iymondandir (Hadisdan)
Vatan - kindik qonimiz to’kilgan , jonga jondosh, qalbga sirdosh eng ulug’ kalom. Tarixdan bizga ma’lumki, qadim zamonlardan boshlab u yoki bu mintaqalarda yirik imperiyalar vujudga kelib, ko’plab xalqlarni o’z manfaatlariga bo’yinsundirgan. Biroq ularning barchasi mazlum xalqlarning ozodlik, mustaqillik uchun kurashlari natijasida parchalanib ketgan. Dunyodagi yirik imperiyalardan biri bo’lmish SSSRning parchalanishi ham ana shu tarixiy qonuniy jarayonning natijasi bo’ldi. O’zbekiston Respublikasi Davlat mustaqilligining qo’lga kiritilishi ham ana shunday qonuniy-tarixiy jarayonlardan biri bo’ldi. O’zbekiston xalqi va rahbariyatining donishmandligi, sabotliligi va qat’iyatligi, uzoqni ko’ra bilishi natijasida uning davlat mustaqilligi tinch, demokratik, parlament yo’li bilan, ijtimoiy larzalarsiz, qurbonlar va vayronagarchiliksiz amalga oshdi. Jahon hamjamiyati O’zbekistonni quchoq ochib qabul qildi. Qisqa davr ichida O’zbekiston xalqi mamlakatimizning jahon hamjamiyatida munosib o’rin egallashiga asos bo’luvchi ulkan yutuqlarni qo’lga kiritdi.
Vatanparvarlik qadimiy tuyg’ulardan hisoblanadi. Aflotunning so’zlariga ko’ra, “Vatan ota va onadan qimmatroqdir”. Sharq mutafakkirlarining asarlarida vatanga bo’lgan muhabbat, eng oliy qadriyat sifatida qaraladi. Vatan tuyg’usi bo’lgan kishidagina vatanparvarlik jo’sh uradi. Respublikamiz birinchi Prezidenti I.A.Karimov aytganidek: “Vatanga muhabbat hissi odamning qalbida tabiiy ravishda tug’iladi. Ya’ni, inson o’zligini anglagan, nasl-nasabini bilgani sari yuragida vatanga bo’lgan muhabbat tuyg’usi ildiz otib, yuksala boradi. Bu ildiz qanchalik chuqur bo’lsa, tug’ulib o’sgan Vatanga muhabbat shu qadar cheksiz bo’ladi”.
Yurtimizni qancha ta’riflasak ham so’zlar yetmaydi. O’zbekistonning yer osti va yer usti boyliklari bisyor. Inson tabiatdan oladigan barcha moddiy boyliklar - yer-osti boyliklari, suv, havo, tuproq, o’simliklar , hayvonat olami va boshqalar tabiiy resurs (boylik) hisoblanadi. O’zbekiston tabiati va tabiiy boyliklarini muhofaza qilish - inson uchun zarur bo’lgan qazilma boyliklaridan oqilona foydalanish, suv va havoni toza saqlash , tuproqdan eroziyadan saqlash, o’simlik va hayvonat dunyosini tabiiy holicha asrab qolib, qayta tiklashni hamda xushmanzara joylar (sharshara, shovva, ajoyib manzaralar, buloq va boshqalar)ni tabiiy holicha saqlash kabilarni o’z ichiga oladi. Biz yurtimizning tabiiy boyliklarini qo’limizdan kelgancha muhofaza qilishimiz kerak.
Zamon shiddat bilan o’zgaryapti. Ma’lumki, mamlakatimizda yoshlarga oid davlat siyosati izchil davom ettirilmoqda. Unib-o’sib kelayotgan yosh avlodning jamiyatda o’z o’rnini topishi uchun aniq maqsadli dasturlar tatbiq etilmoqda. Ta’lim sohasida ham ko’p o’zgarishlar bo’lyapti masalan, yurtimizda “start-ap”lar tobora keng joriy etilmoqda. Ular, ayniqsa, yoshlar orasida ommmalashgan. Masalan, 2021-yilning mart oyida Yoshlarning “start-ap” tashabbuslarini qo’llab –quvvatlash dasturiga start berildi. Unda O’zbekistonning turli oliy ta’lim muassasalaridan mingdan ziyod talabalar ishtirok etdi. Keng qamrovli ushbu loyihada eng ko’p tashabbuslar elektron tijorat, ta’lim, kommunikatsiya va navigatsiya texnologiyalari, transport hamda yo’l infratuzilmasi, tibbiyot va biotexnologiyalar sohasiga tegishli bo’ldi. BMT tadqiqotiga ko’ra, O’zbekiston 2016 - yil yakunlari bo’yicha inson rivojlanishi yuqori darajada bo’lgan davlatlar qatoridan joy oldi.
Binobarin, yurtimiz dunyo tamaddunining beshiklaridan biri sifatida asrlar davomida Mag’rib va Mashriq o’rtasida ko’prik vazifasini o’tab, insoniyatning madaniy va ilmiy boyliklarini o’zida jam qilgan. Jonajon Vatanimiz ilm-fan va madaniyat taraqqiyotiga beqiyos hissa qo’shgan Al-Xorazmiy, Abu Rayhon Beruniy , Ibn Sino, Mirzo Ulug’bek singari buyuk alloma hamda mutafakkirlarni yetishtirib bergan. Ekspertlar e’tirof etishicha, o’zbekistonliklar azal-azaldan nafaqat uddaburon tijoratchi, iqtisodiyotni boshqarishga qodir, pul topishni hadisini olgan kishilar bo’lishgan, shu bilan birga, ilm-fan dovrug’ini yoyishga ham katta hissa qo’shgan.
Xulosa qilib aytadigan bo’lsak, biz yoshlarga yaratib berilayotgan imkoniyatlar , puxta bilim olishimiz uchun olib borilayotgan say-harakatlarni ba’zi davlatlarda yashayotgan bolalar hattoki tasavvur ham qilisholmaydi. Ayrim mamlakatalarda maktabda o’qish bolalarning katta orzusi hisoblanadi. Shunday ekan biz ham bu imkoniyatlarga javoban yaxshi bilim olib, kelajakda vatanimiz koriga yaraydigan, hayotda o’z o’rniga ega bo’lgan, malakali kadrlar bo’lib yetishishimiz kerak.
“…Dunyoda hech qachon eskirmaydigan, yo’qolmaydigan bebaho bir boylik borki, u ham bo’lsa, farzandiga bergan bilim va hunardir”. ( Shavkat Mirziyoyev ).