Бугун ёзнинг биринчи куни. Халқ таъбири билан айтганда, пишиқчилик, ғалвирни сувдан кўтарадиган, деҳқоннинг меҳнати тарозига қўйиладиган кунлар ҳам келди.  Эл-юртимиз хирмони бунёдкорлари учун шарафли ва масъулиятли мавсум бошланмоқда.

Бу йил вилоятимизнинг азму шижоатли, ўз ишининг усталари бўлган миришкорлари томонидан халқимиз ризқу насибаси бўлган бошоқли дон экинларидан мўл ҳосил етиштирилди.

Галдаги муҳим ва масъулиятли вазифа —катта сарф-ҳаражат ва улкан меҳнат эвазига етиштирилган ғалла ҳосилини нест-нобуд қилмай ўриб-янчиб, қабул пунктлари — хирмонларга жойлаб олишдир.  

Бугун бутун дунёда озиқ-овқат хавфсизлиги масаласи ҳар қачонгидан долзарб бўлиб турган бир вақтда бу мавсумнинг масъулияти ва аҳамияти, айниқса, беқиёсдир. 

Бугун эрта тонгдан вилоятимиз фаоллари, нуронийлар, депутатлар, туман ва шаҳар ҳокимлари, фермер ва кластерлар раҳбарлари, қишлоқ хўжалиги соҳаси мутасаддилари билан мана шу муҳим мавсум олдидан Зангиота зиёратгоҳида йиғилдик. 

Эзгу таомилга кўра, муаззам маскан зиёрат қилиниб,  ўтганлар руҳи покига тиловатлар қилинди. Дуога қўл очар эканмиз, баракали хирмон кўтаришга бел боғлаган бободеҳқонларимизнинг касбу корига унум, эл дастурхонига тўкинлик, юртимизга тинчлик, элимизга омонлик тилаб, эзгу ниятлар қилдик.

#эзгулик

#хирмонга_барака

#кун_тартиби