Бу йилги Халқаро математика олимпиадаси учун Ўзбекистон терма жамоаси қандай шакллантирилади?

Жорий йилги халқаро математика олимпиадаси масофавий тарзда 16-26 сентябрь кунлари ўтказилиши белгиланди. Бу ҳақда Олимпиада ташкилий қўмитаси баёнот берди.

Халқаро математика олимпиадасида (IMO) 6 та аъзодан иборат терма жамоа иштирок этади. Шунгача кўп босқичли саралаш олимпиадалари орқали терма жамоамиз таркиби аниқланган. Бироқ covid-19 пандемияси жорий йил саралаш тизимига  ўзгартиришларни киритишга мажбур қилмоқда.

Шу мақсадда, Ўзбекистон Республикаси Фанлар академияси ва Халқ таълими вазирлиги томонидан 2018 йилдан шу кунга қадар ўтказилган қуйидаги нуфузли халқаро ва республика математика олимпиадаларда иштирок этган юртимиз ўқувчиларининг натижалари чуқур таҳлил қилиниб, 2020 йилги халқаро математика олимпиадасида иштирок этувчи Ўзбекистон терма жамоаси таркиби шакллантирилади.

1. Мактаб ўқувчилари учун Ҳалқаро Математика Мусобақаси (Болгария, BIMC-2018)

2. Мактаб ўқувчилари учун Ҳалқаро Математика Мусобақаси (Жанубий Африка Республикаси, SAIMC-2019)

3. Мирзо Улуғбек номидаги Қўшимча Республика Математика олимпиадаси (Бухоро 2019)

4. Халқаро Жаутиков олимпиадаси (Қозоғистон 2020)

5. Халқаро Кавказ математика олимпиадаси (Майкоп 2020)

6. Бутунжаҳон Киберматематика мусобақаси (Масофавий 2020)

Саралаш олимпиадаси жорий йил август ойининг иккинчи ўнкунлигида масофавий тарзда ўтказилади. Халқаро тажрибага кўра саралаш иштирокчилари Zoom платформаси орқали видео кузатув остида бўлишлари лозим. Саралаш айнан халқаро математика олимпиадаси услубида 2 кун, ҳар куни 4,5 соат вақт давомида ўтказилади ва иштирокчилардан Алгебра, Геометрия, Сонлар Назарияси ва Комбинаторикага оид 3 тадан, жами 6 та масалани ечишлари талаб қилинади.

Саралаш натижаларига асосан, Халқ таълими вазирлиги ва юртимизнинг етакчи математик олимлари, академиклар томонидан якуний терма жамоа таркиби шакллантирилади.