БОБО-BOBO
БОБО
Бобо, сўзнинг чўғини тоза қилдинг,
Теран маъноларин овоза қилдинг.
Чучук сўзимга ўлмас жон киюрдинг,
Тафаккурни таратмоққа буюрдинг.
Сўзингдин жон топти туркий олам,
На ёлғиз туркий олам, барча одам.
Дуру гавҳар қўлингдан элга сочдинг,
Сукут оқшомида кўзимни очдинг.
Қуёшдек ўйларинг руҳим ёритди,
Каломинг жилваси оламни тутди.
Тилимни ўйларимда бор қилдинг,
Ўзимни ўзлигимга ёр қилдинг.
Бобо, сендан жоним топти наволар,
Синиқ руҳимдаги битди яролар.
Тафаккур риштасин туйғудан эшдинг,
Мангу қўшиқ қилиб жонимга қўшдинг.
Сўзингни фикру ҳикматга йўғирдинг,
Башар ҳиссини эзгуликка бурдинг.
Бутун девонларингдир дард боғи,
Ҳаётнинг порлагувчи гулчироғи.
Туғилган кунда сени ёд айлай,
Ижозат бер муборакбод айлай.
Паришон сўзларимда меҳр пинҳон,
Агарчи санъатимда бор нуқсон.
Қўлимдан ушла, бошқар, йўл йироқдир,
Камолга йўлламоғинг яхшироқдир.
Қўлим бўшдир, Бобо, чанқоқ дилим бор,
Шууримда етилган ҳосилим бор.
Уни куйлай десам овоз бергил,
Буюк ижод сари парвоз бергил.
Улуғ кунларда эслаш яхши ишдир,
Адо қилмоқ ҳақинг бизга юмушдир.
Ўз юртингда мақомингдан хабар йўқ,
Сени англашга ишлардан асар йўқ.
Мозорингни кўриб бағрим эзилди,
Кўзимдан тирқираб ёшлар тизилди.
Мазоринг «ўқчи дўконига ўхшар»(1),
Шу ўқлардан руҳинг безовта, қақшар.
Ёвуз руҳлар сени бегона тутгай,
Бу иш бирлан юрак уйин совутгай.
Бобо, ёшим кетиб мудраб йиқилсам,
Қарилик оғриғин тортиб сиқилсам.
Турарга сўзларинг-ла куч ато бер,
Туганмас давлатинг менга туто бер.
Қалам майдонида қад рост турсам,
Ўманчим(2) олти юз ёшингни кўрсам.
Қўлим, қўйним тўлиб, борсам тўйингга,
Хаста бу чолни ҳам чорла уйингга.
Келар куз хирманимни янчиб олсам,
Тафаккур мевасин суфрангга солсам.
Шўнғиб кетсам сўзинг осмони бўйлаб,
Қидирсам кон яна эн, ёни бўйлаб.
Топиб чиқсам дуру олмос кондин,
Совурсам жон бошига ҳар томондин.
Уни жон бўйнига этсам ҳамойил,
Яшашга завқманд элларни ноил(3).
✍ Ишонч ТЎРА,
Шимолий Америка, Канада
Изоҳлар:
1.Навоийдан кўчирма
2.Уманч–умид, илинж
3.Ноил–баҳраманд қилмоқ
Турон адиблари телеграм канали.
BOBO
Bobo, soʼzning choʼgʼini toza qilding,
Teran maʼnolarin ovoza qilding.
Chuchuk soʼzimga oʼlmas jon kiyurding,
Tafakkurni taratmoqqa buyurding.
Soʼzingdin jon topti turkiy olam,
Na yolgʼiz turkiy olam, barcha odam.
Duru gavhar qoʼlingdan elga sochding,
Sukut oqshomida koʼzimni ochding.
Quyoshdek oʼylaring ruhim yoritdi,
Kaloming jilvasi olamni tutdi.
Tilimni oʼylarimda bor qilding,
Oʼzimni oʼzligimga yor qilding.
Bobo, sendan jonim topti navolar,
Siniq ruhimdagi bitdi yarolar.
Tafakkur rishtasin tuygʼudan eshding,
Mangu qoʼshiq qilib jonimga qoʼshding.
Soʼzingni fikru hikmatga yoʼgʼirding,
Bashar hissini ezgulikka burding.
Butun devonlaringdir dard bogʼi,
Hayotning porlaguvchi gulchirogʼi.
Tugʼilgan kunda seni yod aylay,
Ijozat ber muborakbod aylay.
Parishon soʼzlarimda mehr pinhon,
Agarchi sanʼatimda bor nuqson.
Qoʼlimdan ushla, boshqar, yoʼl yiroqdir,
Kamolga yoʼllamogʼing yaxshiroqdir.
Qoʼlim boʼshdir, Bobo, chanqoq dilim bor,
Shuurimda yetilgan hosilim bor.
Uni kuylay desam ovoz bergil,
Buyuk ijod sari parvoz bergil.
Ulugʼ kunlarda eslash yaxshi ishdir,
Ado qilmoq haqing bizga yumushdir.
Oʼz yurtingda maqomingdan xabar yoʼq,
Seni anglashga ishlardan asar yoʼq.
Mozoringni koʼrib bagʼrim ezildi,
Koʼzimdan tirqirab yoshlar tizildi.
Mazoring “oʼqchi doʼkoniga oʼxshar”(1),
Shu oʼqlardan ruhing bezovta, qaqshar.
Yovuz ruhlar seni begona tutgay,
Bu ish birlan yurak uyin sovutgay.
Bobo, yoshim ketib mudrab yiqilsam,
Qarilik ogʼrigʼin tortib siqilsam.
Turarga soʼzlaring-la kuch ato ber,
Tuganmas davlating menga tuto ber.
Qalam maydonida qad rost tursam,
O'manchim(2) olti yuz yoshingni koʼrsam.
Qoʼlim, qoʼynim toʼlib, borsam toʼyingga,
Xasta bu cholni ham chorla uyingga.
Kelar kuz xirmanimni yanchib olsam,
Tafakkur mevasin sufrangga solsam.
Shoʼngʼib ketsam soʼzing osmoni boʼylab,
Qidirsam kon yana en, yoni boʼylab.
Topib chiqsam duru olmos kondin,
Sovursam jon boshiga har tomondin.
Uni jon boʼyniga etsam hamoyil,
Yashashga zavqmand ellarni noil(3).
✍ Ishonch TO‘RA,
Shimoliy Amerika, Kanada
Izohlar:
1.Navoiydan koʼchirma
2.Umanch–umid, ilinj
3.Noil–bahramand qilmoq
Turon adiblari telegram kanali va guruhi 👇
@Turonadiblari 👈 kanalimiz,
@Turon_adiblari 👈 guruhimiz.
https://t.me/Turonadiblari