БИРОВНИКИ БУЮРМАС

Хўжайли туманида яшовчи фуқаро Г.А. ўз юмушларини тугатиб уйига қайтиб келганида кўзларига ишонмай, ҳайрон қолди. Чунки, уйи эшиги ланг очиқ ва хоналардаги нарсалар тартибсиз сочилиб ётарди.

Г.А уй ичини кўздан кечириб, сочилиб ётган нарсаларни йиғиштирар экан, буюмлари орасидаги йирик нарсалар ўрнида бироқ қимматбаҳо тақинчоқлари жавондаги жойида йўқ эканлигини англади. Ва зудлик билан содир бўлган воқеа ҳақида ички ишлар бўлимига хабар беради. Келиб тушган мурожаат юзасидан қидирув ишларини олиб боришда иштирок этаётган Хўжайли туман ИИБ ходимлари орадан бир-икки кун ўтиб, туманидаги бозорда ўғирланган тилла тақинчоқларни сотиш мақсадида олиб юрган 1991 йили туғилган С.С.ни   қўлга олади.

Дастлаб айбловни кескин рад этиб, тилла тақинчоқларнинг ўзиники эканлигини айтган С.С. кейинчалик буюмлар эгаси билан юзлаштириш чоғида айбини тан олишга мажбур бўлади.

Мазкур ҳолат юзасидан тўпланган ҳужжатлар судга оширилиб, айбдорга нисбатан тегишли жазо чораси тайинланди.

Азамат ПИРНИЯЗОВ,

«Postda» мухбири.