БИР УМРГА ТЕНГ ДАҚИҚАЛАР

БИР УМРГА ТЕНГ ДАҚИҚАЛАР

https://t.me/gulchehramirzayeva_official

Мазкур мақола «Шуҳрат» медали соҳиби, шифокор-невролог Нозимжон Муртазаевнинг касбий жасорати ва эътирофга муносиб меҳнати ҳақида.


Инсон ҳаётида дақиқалар тақдирни ҳал қиладиган лаҳзалар бор. Айниқса, бош мияда қон айланишининг ўткир бузилиши — инсульт юз берганида вақтнинг қадри ўзгача. Ҳар бир дақиқа ортида инсоннинг ҳаёти, унинг оиласи, фарзандлари, ҳали амалга ошмаган орзулари туради. Шундай мураккаб вазиятларда шифокордан нафақат билим ва маҳорат, балки тезкор қарор, юксак масъулият ва матонат талаб этилади.

Миллий тиббиёт марказининг шифокор-неврологи Нозимжон Муртазаев ана шундай масъулиятли касбни ўз ҳаётининг мазмунига айлантирган ёш мутахассислардан биридир.

Ўзбекистон Республикаси Президентининг 2026 йил 26 октябрдаги Фармонига мувофиқ, Нозимжон Неъматович Муртазаевнинг «Шуҳрат» медали билан тақдирланиши унинг профессионал фаолиятига берилган юксак давлат эътирофи бўлди.

Бу мукофот замирида эса йиллар давомида эгалланган билим, хорижда орттирилган тажриба, тинимсиз изланишлар ва энг муҳими, инсон саломатлиги йўлида қилинган фидокорона меҳнат мужассам.

Касбга садоқат — оиладан бошланган қадрият.

1994 йил 11 январда Навоий вилоятининг Кармана туманида туғилган Нозимжоннинг тиббиётга кириб келиши тасодифий эмас. Унинг отаси Неъмат Пайзиллаевич Муртазаев ҳам неврология соҳасида меҳнат қилган шифокор. Онаси Сабоҳат Исомовна эса узоқ йиллар мактабда ўқитувчилик қилган.

Шифокорлик ва муаллимлик. Бир қараганда, икки хил касб. Аммо уларни бирлаштириб турадиган муштарак бир қадрият бор: инсонга хизмат қилиш. Бири саломатликни асраса, иккинчиси қалбларга илм ва маърифат уруғини қадаб, келажакни тарбиялайди.

Бундай оилавий муҳитда вояга етган ёшнинг тиббиётни танлаши авлодлар давомийлигининг ўзига хос ифодасидир.

Нозимжон Муртазаев 2019 йилда Тошкент тиббиёт академиясини тамомлади. Билимларини янада чуқурлаштириш мақсадида Россия Федерациясининг И.И. Мечников номидаги Шимоли-ғарбий давлат тиббиёт университетида неврология ихтисослиги бўйича ординатурада таҳсил олди.

2021–2024 йилларда Санкт-Петербургдаги тиббиёт муассасаларида, жумладан, Уруш фахрийлари госпитали ҳамда реанимация ва интенсив терапия тизимида фаолият юритди.

Айнан шу давр унинг клиник тафаккури, мураккаб ҳолатларда мустақил қарор қабул қилиш ва замонавий даволаш технологияларини қўллаш малакасини шакллантиришда муҳим босқич бўлди.

2024 йилда Ўзбекистонга қайтиб, Миллий тиббиёт марказида фаолиятини давом эттирди. 2026 йил май ойидан эса Нейрореанимация ва эпилаборатория бўлимига раҳбарлик қила бошлади.

Бугун унинг фаолиятида алоҳида аҳамият касб этаётган йўналиш — инсультга чалинган беморларга ўз вақтида, юқори технологик ва комплекс тиббий ёрдам кўрсатишдир.

Маълумки, инсульт дунё миқёсида ўлим ва узоқ муддатли ногиронликнинг асосий сабабларидан бири ҳисобланади. Бош мия қон томирларида юз берадиган ўткир ўзгаришлар беморнинг ҳаракатланиши, нутқи, хотираси ва мустақил яшаш имкониятларига жиддий таъсир кўрсатиши мумкин.

Шу боис замонавий инсультологияда энг муҳим вазифалардан бири касалликни эрта аниқлаш ва тегишли беморларда қон оқимини имкон қадар тез тиклашдан иборат.

Нозимжон Муртазаев Россия Федерацияси мутахассислари билан ҳамкорликда Миллий тиббиёт марказида нейрореанимация хизматини ривожлантириш, инсультга чалинган беморларга мультидисциплинар ёндашув асосида ёрдам кўрсатиш тизимини такомиллаштириш ишларида фаол қатнашди.

Унинг бевосита раҳбарлигида ўткир ишемик инсульт ҳолатларида эрта диагностика, тромболизис ва тромбоэкстракция амалиётларини тизимли ташкил этиш дастури йўлга қўйилди.

Тромболизис — қон томирини тўсиб қўйган тромбни махсус дори воситалари ёрдамида эритишга, тромбоэкстракция эса тромбни томир ичидан механик усулда чиқаришга қаратилган юқори технологик даволаш усулларидир. Тўғри танланган беморларда бу муолажалар бош мияда қон айланишини тиклаш ва оғир асоратлар хавфини камайтириш имконини беради.

Рақамларга мурожаат қилайлик.

Тақдим этилган маълумотларга кўра, 2026 йил май ойидан буён Миллий тиббиёт марказида мазкур дастур доирасида 400 дан ортиқ беморга ёрдам кўрсатилган. Шулардан 45 нафарига тромболизис, 20 та ҳолатда эса тромбоэкстракция амалиёти бажарилган.

Нозимжон Муртазаевнинг касбий фаолияти давомида бош мия қон айланишининг ўткир бузилишлари билан боғлиқ 500 дан ортиқ мураккаб, жумладан, кам инвазив юқори технологик амалиётларни амалга оширгани ҳам унинг тажрибасидан далолат беради.

Албатта, тиббиётда ҳар бир рақамнинг ортида инсон тақдири туради. Бугун ўз оёғида юришни, фарзандининг овозига жавоб қайтаришни, яқинлари даврасига қайтишни истаётган бемор учун ўз вақтида кўрсатилган малакали ёрдамнинг қадрини ҳеч қандай рақам билан ўлчаб бўлмайди.

Шифокорлик касбининг буюклиги ҳам шунда.

Нозимжон Муртазаев эришилган натижалар билан чекланиб қолмаяпти. 2025 йилда Россиянинг Новосибирск шаҳридаги нейрохирургия маркази ва Туркиянинг Истанбул шаҳридаги «Ажибадем» клиникаларида неврологик ҳаракат патологияларида юқори технологик тиббий ёрдам кўрсатиш бўйича малакасини оширди.

Хорижда эгалланган билим ва тажрибани ўз юрти тиббиёти равнақига йўналтириш бугунги кун мутахассиси учун муҳим фазилатдир. Чунки замонавий тиббиётда янгиликка интилиш — шунчаки касбий қизиқиш эмас, балки бемор олдидаги масъулият ҳамдир.

Унинг ташаббуси билан ёш неврологлар учун амалий маҳорат дарслари ташкил этилмоқда, хорижлик мутахассислар билан тажриба алмашиш йўлга қўйилмоқда. Бу эса бир шифокорнинг билим ва кўникмалари янада кенгроқ мутахассислар жамоасига етиб бориши учун имконият яратади.

Дарҳақиқат, ҳақиқий мутахассиснинг ютуғи фақат ўз меҳнати натижалари билангина белгиланмайди. Унинг билими шогирдлар фаолиятида давом этса, яратган тажрибаси тизимга айланса, ана шунда касбий хизматнинг кўлами янада орта боради.

Бугун мамлакатимизда соғлиқни сақлаш тизимини ривожлантириш, илғор диагностика ва даволаш усулларини жорий этиш, юқори малакали миллий кадрлар салоҳиятини оширишга катта эътибор қаратилмоқда. Нозимжон Муртазаев сингари изланувчан, ташаббускор ёш шифокорлар фаолияти ана шу янгиланишларнинг амалий ифодасидир.

Давлат мукофоти инсонни ортда қолган меҳнат йўли учун шарафлаш билан бирга, унинг зиммасига янги масъулият ҳам юклайди. Айниқса, инсон саломатлиги учун курашаётган шифокор учун бу масъулиятнинг мезони жуда юксак.

«Шуҳрат» медали соҳиби Нозимжон Муртазаевнинг бугунги фаолияти ана шу ишонч ва масъулият билан чамбарчас боғлиқ.

У ҳали касбий камолотнинг янги босқичларига қадам қўймоқда. Олдинда янги изланишлар, замонавий даволаш имкониятларини кенгайтириш, шогирдлар тарбиялаш ва инсон саломатлигини асрашдек эзгу мақсадлар турибди.

Зотан, шифокорнинг ҳақиқий шуҳрати фақат мукофотларда эмас. У беморнинг яна ҳаётга умид билан боқишида, оиласига қайтишида, инсон умрига қўшилган имкониятларда намоён бўлади.

Бир умрга тенг дақиқалар учун курашаётган шифокорнинг энг буюк мукофоти ҳам, энг улуғ масъулияти ҳам — инсон ҳаётидир.

Гулчеҳра МИРЗАЕВА, журналист-публицист.

Report Page