Ayollarning mintaqaviy huquq va imkoniyatlarini kengaytirish bo‘yicha forum bo‘lib o‘tdi

 O‘zbekiston Respublikasi iqtisodiyot va moliya vazirining o‘rinbosari Gulnora Raximova 2024-yil 13–14-may kunlari ko‘hna Samarqand shahrida bo‘lib o‘tgan Osiyo xotin-qizlar forumining ilk kunida ishtirok etdi. Butun Osiyo bo‘ylab yetakchi rahbar va mutaxassislar butun gender tengligini muhokama qilish va targ'ib qilish va ayollar huquqlarini kengaytirish maqsadida “Xotin-qizlarning iqtisodiy, ijtimoiy va siyosiy huquq hamda imkoniyatlarini kengaytirish masalalariga mintaqaviy yondashuv” deb nomlangan forumda yig‘ildi.

O‘zbekiston Prezidenti Shavkat Mirziyoyev va xalqaro arboblar, jumladan, BMT Ayollar bo‘yicha ijrochi direktori Sima Sami Bahus qo‘llab-quvvatlagan tadbirda qit’aning ijtimoiy-siyosiy hamda iqtisodiy sohalarida ayollarning rolini kengaytirishga alohida e’tibor qaratildi.

Vazir oʻrinbosari Gulnora Raximova oʻz nutqida Oʻzbekistonda xotin-qizlar huquqlari va turli sohalardagi ishtirokini taʼminlash borasida erishilayotgan salmoqli yutuqlarga alohida toʻxtalib oʻtdi. Ijtimoiy himoyaga muhtoj xotin-qizlarni tizimli ravishda qo‘llab-quvvatlashga qaratilgan “Temir daftar”, “Ayollar daftari”, “Yoshlar daftari” kabi tashabbuslar bo‘yicha ma’lumotlar berildi. Bundan tashqari, mazkur islohotlarning iqtisodiy samaralari qayd etilib, tadbirkorlik va davlat boshqaruvida xotin-qizlarning ulushi sezilarli darajada oshgani ta’kidlandi.

Shuningdek, xotin-qizlarga foizsiz taʼlim kreditlari ajratish, tadbirkor va mutaxassislarni qoʻllab-quvvatlash uchun davlat budjetidan katta miqdorda mablagʻ ajratib kelinayotgani qayd etildi. Bu tashabbuslar O‘zbekistonda gender tengligini ta’minlash va xotin-qizlarning ijtimoiy-iqtisodiy holatini yaxshilashga qaratilgan strategiyaning muhim qismidir.

Bundan tashqari, vazirlik tomonidan gender budjetlashtirishni joriy etish bo‘yicha olib borilayotgan faol ishlar haqida so‘z yuritildi. Ushbu yondashuv gender tahlilini moliyaviy rejalashtirish va budjetlashtirish jarayonlariga integratsiyalash, barcha hukumat tashabbuslari hamda dasturlarida gender tengligini qo‘llab-quvvatlashni ta’minlashga qaratilgan. Bu ijtimoiy tenglik va davlat xarajatlaridagi samaradorlikni rag‘batlantiradi hamda gender tengligi bo‘yicha Barqaror rivojlanish maqsadlariga erishish yo‘lidagi muhim qadamdir.

Tadbir ishtirokchilari forum xalqaro hamkorlikni yanada rivojlantirish, ayollar huquqlari hamda imkoniyatlarini ta’minlash bo‘yicha ilg‘or tajriba va strategiyalarni ilgari surish uchun turtki bo‘lishiga umid bildirdi.

Forum Osiyodagi ayollar duch kelayotgan muammolarni yengish, ularning boshqaruv va ijtimoiy hayotdagi ishtirokini kuchaytirish bo‘yicha muloqot uchun platforma vazifasini bajardi.

Osiyo ayollari forumi osiyolik ayollarning ijtimoiy-iqtisodiy, siyosiy-huquqiy, madaniy-gumanitar faolligini oshirishga qaratilgan Samarqand deklaratsiyasining qabul qilinishi bilan yakunlandi. Ushbu konferensiya mintaqada gender tengligiga erishish bo‘yicha davom etayotgan hamkorlik va birgalikdagi sa’y-harakatlar uchun muhim yo‘nalishlarni belgilab berdi.

Iqtisodiyot va moliya vazirligi

Axborot xizmati