Ассалому алайкум ҳурматли, Бектемир туманида яшовчи қадрдонларим!

Нуроний отахонлар, мўътабар онахонлар мехнаткаш ака укалар ва азиз опа-сингиллар!

Бугун мен, туман раҳбари сифатида Сиз азизларимга, муҳтарам Президентимизнинг коронавирус пандемиясига қарши курашиш борасида ўтказилган йиғилишларидаги халқимизга қилган мурожаатномаларидан келиб чиқиб, мухим вазифалар юзасидан ўз мурожаатимни йўлламоқчиман. 

Бугунги кунда бутун дунё, инсоният мураккаб даврни бошидан кечирмоқда. Мамлакатимизда эпидемиологик вазиятни жиловлаш, аҳоли саломатлигини ҳар томонлама ҳимоя қилиш учун барча чоралар давлатимиз томонидан кўрилмоқда.

Ҳурматли Бектемир ахолиси!

Бугунги кунда Бектемир туманида коронавирус пандемиясини олдини олиш мақсадида туман Тиббиёт бирлашмасида махсус Штаб ташкил қилинган бўлиб, Бектемир тумани Санитария-эпидемиологик осойишталик маркази ҳамда ҳуқуқни муҳофаза қилувчи органлари билан ҳамкорликда кечаю-кундуз касалликка қарши-курашиш ва уни олдини олиш бўйича барча зарур чора-тадбирлар амалга оширилмоқда.

Шу фурсатдан фойдаланиб, бу курашнинг олдинги сафларида чинакам жасорат ва матонат кўрсатаётган жонкуяр ва олижаноб шифокорларимизга ўзимнинг чуқур миннатдорчилигимни билдирмоқчиман.

Барчамизни ташвишга солаётган коронавирус пандемиясига қарши курашишда, биз мутасадди раҳбарларни синовли кунларда тўғри тушуниб, қўллаб-қувватлаётган азиз халқимга ўзимнинг чуқур раҳматимни айтаман.

Мен туман раҳбари сифатида сизларни ишонтириб айтаманки, коронавирус тарқаб кетмаслиги учун ҳукуматимиз ҳамда шахсан Президентимиз томонларидан барча зарур чоралар кўрилган. Аммо шу синовли дамларда туманимиз аҳолиси, ҳар бир идора раҳбарлари, жамоатчилик вакиллари бирлашиб, бир ёлкадош бўлиб ҳаракат қилишимиз зарур. Касалликни маҳалламизга, уйимизга, оиламизга кириб келмаслигини олдини олиш учун энг аввало ўзимиз ва ўзлигимизни англашимиз ҳамда масъулигимизни тушуниб етишимиз лозим.

Ҳар қандай қийинчиликка қарамасдан, ўз хизмат бурчини виждонан бажараётган ака-укаларимиз, опа-сингилларимиз, ўғил-қизларимиз фидойилигини юксак қадрлаб, аҳолимиз ўртасида ваҳима ва саросима гаплар тарқалишига асло йўл қўймаслигимиз лозим.

Нуроний отахонларимиз, мунис онахонларимиз ўз жонкуярлиги, сабр-бардоши, эзгу дуолари билан халқимизни ушбу касалликдан тезроқ қутилишимиз учун яратгандан сўраб ҳар дақиқа дуо қилишларини такрор ва такрор сўраб қолардим.

Мен бугунги кунда уй шароитида таҳсил олаётган ўқувчи ёшларимиздан, уйда бўш вақтларини бекор ўтказмасликларини, Он-лайн дарсларни қунт билан ўзлаштиришларини, Китоб ўқиб, билимларини ошириб, бадантарбия ва жисмоний машқлар билан уй шароитида мунтазам шуғулланишларини истаб қолардим!

Азиз ватандошлар, нуроний отахон ва мунис онахонлар, қадрли ёшлар!

Буюк бобомиз Абу Али Хусайин ибн Абдуллоҳ ибн Сино айтганларидек,

Ваҳиманинг ўзи ярим касалликдир,

Хотиржамлик ярим соғлиқдир,

Сабр эса шифонинг бошланишидир,

деган сўзлари бизнинг халқимизга ярашади.

Шу ўринда ҳаммамиз янада жипслашиб, сабр-матонатли бўлсак, шифокорлар тавсияларига тўлиқ амал қилсак, албатта, бу касалликни тезроқ енгиб ўтамиз!

Бу курашда тиббий чоралар билан бирга юксак тафаккур, қатъий интизом, сабр-тоқат ва улкан масъулият кўрсатишимиз лозим. Бу сифатлар бизнинг энг асосий ва энг таъсирчан қуролимизга айланиши шарт.

Мен ва менинг жамоам, шунингдек, тегишли мутасадди ташкилот раҳбарлари ана шундай мард ва матонатли, меҳр-оқибатли туманимиз аҳолисининг ақл-заковатига, унинг метин иродаси ва қатъиятига тўла ишонамиз.

Жонажон диёримизда муҳтарам Президентимизнинг олиб бораётган одилона сиёсатларида ҳеч бир инсон, ҳеч бир оила давлатимиз ва жамиятимиз эътибори ва ғамхўрлигидан четда қолмайди!

Яратганнинг ўзи бутун халқимизни ва жонажон диёримизни бу офатдан тезроқ озод қилсин, барчамизни ўз паноҳида асрасин!

Давлатимиз раҳбари биз мутасадди ташкилот раҳбаларига ҳамда мард ва матонатли, меҳр-оқибатли халқимизга ишонади, биз раҳбарлар халқимизнинг саломатлиги учун курашмоқдамиз, Сиз бизга елкадош бўлинг, Биз сиз учун ишда қолдик, Сиз биз учун уйда қолинг!