Адлия вазирлигининг vacancy.adliya.uz веб-сайтидаги носозликлар бартараф этилди
Адлия вазирлиги Жамоатчилик билан алоқалар бўлими#Munosabat
Ижтимоий тармоқларда Адлия вазирлигининг vacancy.adliya.uz веб-сайти орқали ишга кириш учун ҳужжатларни тақдим этиш ва тест жавоблари бўйича билдирилаётган эътирозлар юзасидан қуйидагилар маълум қилинади.
Жорий йилнинг 9-10 июль кунлари маълумотлар базаси сақланадиган серверларда техник сабабларга кўра узилишлар кузатилди. Ҳозирда иш фаолияти барқарор. Шу кунларда муддати тугаган ишга қабул қилиш бўйича эълонларнинг муддати жорий йилнинг 13 июль соат 23:59 гача узайтирилганлиги маълум қилинади.
Шунингдек, дастурий таъминотда кузатилган техник носозлик туфайли веб-сайтда ишга қабул қилиш бўйича танловнинг баъзи тест саволларида айрим жавоблар варианти такрорланиб қолгани юзасидан ҳам турли фикрлар билдирилди. Ушбу ҳолатларни бартараф этиш юзасидан дастурчилар ёрдамида тезкор чоралар кўрилди, носозликлар тузатилди.Таъкидлаш жоизки, мазкур веб-сайтда саволлар сони ва варианти жуда ҳам кўп ҳамда у мунтазам янгиланиб борилади. Бу жараёнда инсон омили аралашмайди. Нотўғри жавоблар ўша заҳоти автоматик равишда қайтарилади.
Шу ўринда, фуқароларимизга, ўз тақдирини адлия органлари билан боғламоқчи бўлганларга ишга қабул қилиш бўйича узайтирилган муддатлардан унумли фойдаланишга (https://youtu.be/JUw9sE-eOBU) чақирамиз.
Фаол жамоатчилик вакилларига эса уларнинг жонкуярлиги сабабли дастурий таъминотда кузатилган техник носозликлар тезкор аниқланиб, бошқа фойдаланувчиларда юзага келиши мумкин бўлган ноқулайликларнинг олди олинишида қўшган ҳиссаси учун миннатдорчилик билдирамиз.
Очиқлик ва шаффофликни таъминлаш йўлида биз билан елкама елка турганларга доимо кўмакдошмиз!